洪玛尼慰问实居省三隆穆尼杰县逝者家属

ឯកឧត្តម ឈួរ សុបញ្ញា បានពាំនាំការចូលរួមរំលែកមរណៈទុក្ខរបស់ឧបនាយករដ្ឋមន្រ្តី ហ៊ុន ម៉ានី ប្រធានក្រុមការងារចុះមូលដ្ឋានខេត្តកំពង់ស្ពឺ ជូនក្រុមគ្រួសារសពឧបាសិកា ជា វេទ ព្រឹទ្ធាចារ្យនៅឃុំដំណាក់រាំង ស្រុកសាមគ្គីមុនីជ័យ ======= ខេត្តកំពង់ស្ពឺ៖ នៅល្ងាចថ្ងៃសុក្រ ១២រោច ខែជេស្ធ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១២ ខែមិថុនា ឆ្នាំ២០២៦ ឯកឧត្តម ឈួរ សុបញ្ញ ប្រធានក្រុមការងារបានដឹកនាំក្រុមការងារឃុំដំណាក់រាំងចូលរួមគោរពវិញ្ញាណក្ខន្ធ និងរំលែកមរណទុក្ខយ៉ាងក្រៀមក្រំជាមួយក្រុមគ្រួសារសពឧបាសក ជា វេទដែលជាប្រជាជនរស់នៅភូមិទំនប់បាក់ ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ។ ក្នុងឱកាសនោះ ឯកឧត្តមបាននាំយកនូវការចូលរួមរំលែកមរណទុក្ខដោយស្មោះស្ម័គ្របំផុតរបស់ឯកឧត្តម ឧបនាយករដ្ឋមន្រ្តី ហ៊ុន ម៉ានី ប្រធានក្រុមការងារចុះមូលដ្ឋានខេត្តកំពង់ស្ពី និងឯកឧត្តម អ៊ុក កោសា ប្រធានក្រុមការងារចុះជួយស្រុកសាមគ្គីមុនីជ័យជូនចំពោះក្រុមគ្រួសារសពផងដែរ។ ឯកឧត្តមបានមានប្រសាសន៍ថា មរណភាពរបស់ឧបាសក ជា វេទ មិនត្រឹមតែជាការបាត់បង់សមាជិកគ្រួសារជាទីគោរពស្រឡាញ់ប៉ុណ្ណោះទេ ប៉ុន្តែក៏ជាការបាត់បង់ ព្រឹទ្ធាចារ្យដ៏ចំណាស់មួយរូបរបស់ភូមិស្រុក ដែលបានឆ្លងកាត់បទពិសោធន៍ជីវិតជាច្រើនជំនាន់ និងបានរួមចំណែករក្សាទុកប្រពៃណីទំនៀមទម្លាប់ និងតម្លៃសីលធម៌ដ៏ល្អប្រពៃរបស់សហគមន៍។ ក្នុងរយៈពេលជាងមួយសតវត្សនៃជីវិត ឧបាសក ជា វេទ បានក្លាយជាសាក្សីរស់នៃការប្រែប្រួលសង្គមជាច្រើនដំណាក់កាល និងជាបុគ្គលដែលប្រជាពលរដ្ឋក្នុងមូលដ្ឋានគោរពរាប់អាន ដោយសារភាពស្លូតបូត សុចរិតភាព ការគោរពព្រះពុទ្ធសាសនា និងការរស់នៅជាគំរូល្អសម្រាប់កូនចៅ និងអ្នកជំនាន់ក្រោយ។ ក្រុមការយើងបានសម្តែងនូវសេចក្តីសោកស្តាយយ៉ាងជ្រាលជ្រៅ ព្រោះមនុស្សចាស់ គឺជាបណ្ណាល័យរស់ ជាឃ្លាំងនៃបទពិសោធន៍ ជាប្រភពនៃប្រាជ្ញា និងជាសសរស្តម្ភសីលធម៌របស់គ្រួសារ និងសហគមន៍។ ការបាត់បង់ព្រឹទ្ធាចារ្យមួយរូប គឺជាការបាត់បង់នូវអ្នកដែលបានបន្សល់ទុកនូវមរតកផ្នែកគំនិត គុណធម៌ និងការអប់រំដល់កូនចៅជាច្រើនជំនាន់។ជីវិតរបស់លោកគឺជាគំរូនៃសេចក្ដីអត់ធ្មត់ ការលះបង់ និងការរស់នៅដោយសុចរិតភាព ដែលបានបន្សល់ទុកជាមរតកជីវិតដ៏មានតម្លៃសម្រាប់កូនចៅ និងញាតិមិត្ត ជិតខាង។ទោះបីជារូបកាយបានឃ្លាតឆ្ងាយទៅតាមច្បាប់ធម្មជាតិ ប៉ុន្តែសេចក្ដីស្រឡាញ់ ការថែទាំ និងគុណបំណាច់របស់លោក នឹងនៅស្ថិតស្ថេរជានិច្ចក្នុងបេះដូងកូនចៅ និងសាច់ញាតិទាំងឡាយ ដូចព្រះពុទ្ធបរមគ្រូបានត្រាស់ថា“សព្វេ សង្ខារា អនិច្ចា” អ្វីៗទាំងអស់ដែលកើតឡើង តែងតែរលាយបាត់ទៅវិញជាធម្មតា។ ការយល់ដឹងអំពីសច្ចធម៌នេះ ជួយឲ្យយើងទទួលយកការបាត់បង់ដោយសន្តិភាព និងបន្តប្រព្រឹត្តអំពើល្អ ដើម្បីឧទ្ទិសជាកុសលជូនដល់អ្នកដែលបានចាកចេញ។ ក្នុងឱកាសដ៏សោកសៅនោះ ឯកឧត្តម និងក្រុមការងារសូមបួងសួងឧទ្ទិសកុសលផលបុណ្យទាំងឡាយ ជូនដល់វិញ្ញាណក្ខន្ធឧបាសក ជា វេទ សូមបានទៅកាន់សុគតិភព កុំបីឃ្លៀងឃ្លាតឡើយ។