洪玛尼率团访问越南VNPT 考察数字政府管理

រសៀលថ្ងៃទី២៥ ខែកញ្ញា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានដឹកនាំគណៈប្រតិភូយុវជនកម្ពុជា ធ្វើទស្សនកិច្ចនៅសម្ព័ន្ធក្រុមហ៊ុនប្រៃសណីយ៌ និងទូរគមនាគមន៏វៀតណាម (VNPT) ដើម្បីស្វែងយល់ពីការអភិវឌ្ឍវិស័យច្ចេកវិទ្យាព័ត៌មាន និងប្រៃសណីយ៍វៀតណាម ជាពិសេសការប្រើប្រាស់បច្ចេកវិទ្យាក្នុងការគ្រប់គ្រងរដ្ឋបាល និងសង្គមឌីជីថល។ ទទួលដំណើរគណប្រតិភូកម្ពុជានាពេលនោះ រួមមានឯកឧត្តម តូ ហ្សុងថាយ ប្រធានក្រុមប្រឹក្សាភិបាលក្រុមហ៊ុន VNPT និងថ្នាក់ដឹកនាំជាន់ខ្ពស់ជាច្រើនរូបទៀត។ ឯកឧត្តមប្រធានក្រុមប្រឹក្សាភិបាល បានថ្លែងអំណរគុណដល់គណៈប្រតិភូកម្ពុជា ដែលមានការចាប់អារម្មណ៏អញ្ជើញមកបំពេញទស្សនកិច្ចនៅក្រុមហ៊ុនសម្ព័ន្ធ VNPT នៅពេលនេះ។ ឯកឧត្តមបានបញ្ចាក់ថា VNPT ត្រូវបានបង្កើតឡើងក្នុងឆ្នាំ ១៩៤៥។ ជាមួយនឹងការរីកចម្រើនជាបន្តបន្ទាប់របស់ខ្លួន បច្ចុប្បន្ននេះ ក្រុមហ៊ុនមានអតិថិជនប្រើប្រាស់បណ្តាញនេះចំនួន ៣៥លាននាក់ ដែលចំនួននេះ បានអនុញ្ញាតឲ្យក្រុមហ៊ុនជ្រើសយកនូវការប្រើប្រាស់បច្ចេកវិទ្យាទំនើបចុងក្រោយជាច្រើន ដើម្បីបម្រើបាននូវសេចក្តីត្រូវការរបស់ប្រជាជនវៀតណាមទូទាំងប្រទេស។ មានប្រសាសន៍តបនៅពេលនោះ ឯកឧត្តម ហ៊ុន ម៉ានី បានថ្លែងអំណរគុណដល់ការទទួលបដិសណ្ឋារកិច្ចដ៏កក់ក្តៅរបស់ឯកឧត្តមប្រធានក្រុមប្រឹក្សាភិបាល និងបានចូលរួមអបអរសារទរដល់ការរីកចម្រើនឥតឈប់ឈររបស់ក្រុមហ៊ុន។ ឯកឧត្តមសង្ឃឹមថា ទស្សនកិច្ចនៅពេលនេះ នឹងផ្តល់នូវបទពិសោធថ្មីៗដល់ថ្នាក់ដឹកនាំយុវជនកម្ពុជា ជាពិសេសលើការគ្រប់គ្រងរដ្ឋបាល និងសង្គមឌីជីថល ដែលប្រទេសវៀតណាមបាន និងកំពុងអនុវត្តប្រកបដោយផ្លែផ្កា។ **👉🏽តំណភ្ជាប់ទៅកាន់បណ្តាញសង្គមរបស់ ស.ស.យ.ក.** 🌐**uyfc.org** 📱[**Facebook**](https://www.facebook.com/uyfccambodia) 📱[**YouTube**](https://www.youtube.com/@unionofyouthfederationcambodia)** ** 📱[**Telegram**](https://t.me/uyfc_news)** ** 📱** **[**TikTok**](https://www.tiktok.com/@uyfccambodia?_t=8fUJ9WcjHX8)