公务部与内政部将于7月23日在内政部联合举办研讨会，旨在分享

ថ្នាក់ដឹកនាំ និងក្រុមការងារបច្ចេកទេសអន្តរក្រសួង ជួបប្រជុំពិនិត្យវឌ្ឍនភាពការងារសំខាន់ៗត្រៀមរៀបចំសិក្ខាសាលាចែករំលែកបទពិសោធនៃការចូលរួមរបស់អាជ្ញាធរមូលដ្ឋានក្នុងការកសាងអង្គភាពផ្តល់សេវាសាធារណៈគំរូក្នុងវិស័យអប់រំនិងវិស័យសុខាភិបាលនាពេលខាងមុខ។ ថ្នាក់ដឹកនាំ និងក្រុមការងារជំនាញអន្តរក្រសួង មកពី ក្រសួងមុខងារសាធារណៈ ក្រសួងមហាផ្ទៃ និងលេខាធិការដ្ឋាន គ.ជ.អ.ប. នាព្រឹកថ្ងៃទី១៧ ខែកក្កដា ឆ្នាំ២០២៦ បានជួបប្រជុំគ្នាពិនិត្យវឌ្ឍនភាព​ការងារឆ្ពោះទៅកាន់ការរៀបចំសិក្ខាសាលាចែករំលែកបទពិសោធនៃការចូលរួមរបស់អាជ្ញាធរមូលដ្ឋានក្នុង ការ​​កសាង​អង្គភាព​ផ្តល់សេវាសាធារណៈគំរូ​ក្នុងវិស័យអប់រំនិងវិស័យសុខាភិបាល ដែលនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៦ឆាប់ៗនេះ នៅក្រសួងមហាផ្ទៃ។ ក្រុមការងារបច្ចេកទេសអន្តរក្រសួង បានពិភាក្សាលើសេចក្ដីព្រាងរបៀបវារៈនៃកម្មវិធី ក៏ដូចជាបែងចែកតួនាទីភារកិច្ច ដល់ក្រុមការងារបច្ចេកទេសក្នុង​ការរួមចំណែកទទួលខុសត្រូវលើភារកិច្ចដែលបានឯកភាពគ្នា ធ្វើយ៉ាងណាឱ្យដំណើរការនៃការត្រៀមរៀបចំសិក្ខាសាលានាពេលខាងមុខនេះ ប្រព្រឹត្តទៅរលូន​ ច្បាស់លាស់ រៀបរយ និងទាន់ពេលវេលា។ ជាលទ្ធផល អង្គប្រជុំបានសម្រេចឯកភាពលើរបៀបវារៈមួយចំនួនដូចជា ការកែសម្រួលលើរបៀបវារៈនៃកម្មវិធី ការកំណត់យកទីតាំងរៀបចំកម្មវិធី ការរៀបចំបែងចែកក្រុមការងារបច្ចេកទេស និងការៀបចំបែបបទរដ្ឋបាលនានា ជាពិសេសគឺការរៀបចំគាំទ្រផ្សេងៗដែលសម្រួលដល់អ្នកចូលរួមក្នុងសិក្ខាសាលាទាំងផ្ទាល់ និងតាមប្រព័ន្ធអនឡាញ (Zoom) ផងដែរ។ សូមជម្រាបថា សិក្ខាសាលាចែករំលែកបទពិសោធដែលសហការរៀបចំដោយក្រសួងមុខងារសាធារណៈ និងក្រសួងមហាផ្ទៃ ធ្វើឡើងក្នុងគោលបំណងចែករំលែកឧត្តមានុវត្តន៍ និងបំផុសចលនានៃការចូលរួមរបស់អាជ្ញាធរមូលដ្ឋានក្នុងការពង្រឹងនិងលើកកម្ពស់អភិបាលកិច្ច និងគុណភាពសេវាអប់រំនិងសុខាភិបាលមូលដ្ឋានឱ្យកាន់តែប្រសើរជូនប្រជាជន៕