柬埔寨公务员招考引入观察员机制 提升透明度

ការចូលរួមរបស់ «អ្នកសង្កេតការណ៍» គ្រប់ដំណើរការប្រឡងជ្រើសរើសមន្ត្រីរាជការ មិនត្រឹមតែធានាបាននូវតម្លាភាព សុក្រឹត្យភាពប៉ុណ្ណោះទេ ប៉ុន្តែក៏ជាឱកាសទទួលបានចំណេះដឹងនិងបទពិសោធជាក់ស្តែង រាល់ដំណើរការប្រឡងប្រជែងជ្រើសរើសមន្រ្តីរាជការឱ្យចូលបម្រើការងារនៅតាមក្រសួង ស្ថាប័ននានា ការជ្រើសរើសអ្នកសង្កេតការណ៍ស្ម័គ្រចិត្ត មិនត្រឹមតែជាយន្តការមួយដែលធានាបាននូវតម្លាភាព សុក្រឹតភាព ប្រសិទ្ធភាព និងភាពជឿទុកចិត្តប៉ុណ្ណោះទេ ប៉ុន្តែវាក៏ជាវេទិកាមួយដែលផ្តល់នូវចំណេះដឹង និងបទពិសោធយ៉ាងច្រើនសន្ធឹកសន្ធាប់ដល់អ្នកចូលរួមផងដែរ។ ក្នុងដំណើរការប្រឡងនីមួយៗ គឺតែងតែមានវត្តមានអ្នកសង្កេតការណ៍ស្ម័គ្រចិត្ត ដែលជាអ្នកតំណាងរបស់មហាជនមកពីស្ថាប័ននិងគ្រឹះស្ថាននានាចូលរួម។ ការចូលរួមនេះ គឺធ្វើឡើងស្របតាមនិយាមនីតិវិធីប្រតិបត្តិការប្រឡង ដើម្បីធានាឱ្យដំណើរការប្រឡងប្រព្រឹត្តទៅដោយរលូន ផ្តល់ភាពងាយស្រួល ជាពិសេសគឺការកសាងទំនុកចិត្តខ្ពស់ដល់បេក្ខជនប្រឡងប្រជែងគ្រប់រូប។ ចំណុចកត់សម្គាល់ អ្នកសង្កេតការណ៍ទាំងអស់ មិនមែនត្រឹមតែមកចូលរួមសង្កេតការណ៍ប៉ុណ្ណោះទេ ប៉ុន្តែអ្នកសង្កេតការណ៍ថែមទាំងទទួលបាននូវព័ត៌មានយ៉ាងច្បាស់លាស់ និងការយល់ដឹងស៊ីជម្រៅអំពីការអនុវត្តតួនាទី និងភារកិច្ច តាមរយៈការធ្វើបទបង្ហាញ និងការចែករំលែកដោយផ្ទាល់ពីសំណាក់ ប្រធាន ឬតំណាងអនុគណៈកម្មការនានានៃគណៈកម្មការរៀបចំការប្រឡង ទាំងនៅក្នុងដំណាក់កាលនៃការប្រឡង និងដំណាក់កាលធ្វើកំណែសន្លឹកកិច្ចការបេក្ខជន គណៈកម្មការតែងតែរៀបចំជាមាតិកាចែករំលែកចំណេះដឹង បទពិសោធពាក់ព័ន្ធនឹងការរៀបចំការប្រឡង ក៏ដូចជាផ្តល់ចំណេះដឹងផ្នែកមុខងារសាធារណៈបន្ថែមដល់អ្នកសង្កេតការណ៍។ តាមរយៈយន្តការនេះ អ្នកសង្កេតការណ៍គ្រប់រូបបានទទួលនូវបទពិសោធដោយផ្ទាល់ខ្លួនឯង តាមរយៈការតាមដាននូវរាល់សកម្មភាពតាំងពីចំណុចចាប់ផ្តើមការប្រឡងប្រជែង ការកែសន្លឹកកិច្ចការ រហូតដល់ការប្រកាសលទ្ធផលជាផ្លូវការជូនបេក្ខជន។ ដំណើរការទាំងអស់នេះ បានធ្វើឱ្យអ្នកសង្កេតការណ៍គ្រប់រូបយល់ដឹងយ៉ាងច្បាស់គ្រប់ដំណាក់កាលទាំងអស់នៃយន្តការ និងនីតិវិធីជ្រើសរើសមន្ត្រីរាជការរបស់គណៈកម្មការរៀបចំការប្រឡងជែងនៃក្រសួងមុខងារសាធារណៈ៕