旅游部部长会见相关协会及中国投资者，计划吸引中国电影制作公司

[English Below] សមាគមជំរុញការលើកកម្ពស់សេដ្ឋកិច្ច និងពាណិជ្ជកម្មកម្ពុជា-អាស៊ាន ប្តេជ្ញាសហការជាមួយផលិតករដ៏ល្បី លោក Frank See ទាក់ទាញក្រុមហ៊ុនផលិតភាពយន្តធំៗ ក្នុងប្រទេសចិនមកថតភាពយន្តទេសចរណ៍នៅកម្ពុជា ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនឯកឧត្តម Bo Shanglang ប្រធានសមាគមជំរុញការលើកកម្ពស់សេដ្ឋកិច្ច និងពាណិជ្ជកម្មកម្ពុជា-អាស៊ាន (Promotion of Economic and Trade Cambodia-ASEAN Association) និងសហការី ព្រមទាំងវិនិយោគិនចិនជានាយកគ្រប់គ្រងទូទៅក្រុមហ៊ុនអាកាសចរណ៍ China Southern Airlines និងក្រុមហ៊ុន Luzhou Laojiao International Development ចូលជួបសម្តែងការគួរសម ​រាយការណ៍ពីសកម្មភាពសមាគម និងពិភាក្សាការងារស្តីពីការពង្រឹង និងពង្រីកកិច្ចសហប្រតិបត្តិការទេសចរណ៍កម្ពុជា-ចិន ជាពិសេសលើគំនិតផ្តួចផ្តើម «ទេសចរណ៍ និងភាពយន្ត» នៅទីស្តីការក្រសួងទេសចរណ៍។ ក្នុងជំនួបប្រកបដោយផ្លែផ្កានេះ ឯកឧត្តមរដ្ឋមន្ត្រី បានស្វាគមន៍យ៉ាងកក់ក្តៅចំពោះឯកឧត្តម Bo Shanglang និងវិនិយោគិនចិន ព្រមទាំងបានកោតសរសើរ វាយតម្លៃខ្ពស់ និងថ្លែងអំណរគុណចំពោះសមាគម និងវិនិយោគិនចិន ដែលបានចូលរួមគាំទ្រ និងផ្សព្វផ្សាយសក្តានុពលទេសចរណ៍ និងវិនិយោគរបស់កម្ពុជា ទៅកាន់ប្រជាជន សហគ្រាស និងវិនិយោគិននៅសាធារណរដ្ឋប្រជាមានិតចិន ព្រមទាំងបានបានគូសបញ្ជាក់ថា កម្ពុជា និងចិន ជាមិត្តដែកថែប និងជាដៃគូយុទ្ធសាស្ត្រគ្រប់ជ្រុងជ្រោយ ដែលបានបន្តពង្រឹង និងពង្រីកកិច្ចសហប្រតិបត្តិការលើគ្រប់វិស័យ រួមទាំងវិស័យទេសចរណ៍ផងដែរ។ ទន្ទឹ​មនឹងនេះ ឯកឧត្តមរដ្ឋមន្ត្រី ក៏បានលើកឡើងពីគោលនយោបាយរបស់រាជរដ្ឋាភិបាលក្រោមការដឹកនាំប្រកបដោយជវភាព និងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការផ្សារភ្ជាប់ «ទេសចរណ៍ និងភាពយន្ត» ដោយបញ្ជាក់ថា ក្រសួងទេសចរណ៍ កំពុងដឹកនាំក្រុមការងារអន្តរក្រសួង ដើម្បីសម្របសម្រួល និងគាំទ្រការផលិតភាពយន្តទេសចរណ៍នៅកម្ពុជា ក្នុងគោលបំណងប្រែកម្ពុជាឱ្យក្លាយជាគោលដៅថតភាពយន្តអន្តរជាតិ តាមរយៈការសម្រួលនីតិវិធី ការបង្កើតយន្តការច្រកចេញ-ចូលតែមួយ និងការផ្សព្វផ្សាយទីតាំងថតភាពយន្តដ៏សម្បូរបែបរបស់កម្ពុជា ដែលរួមមានប្រាសាទ បេតិកភណ្ឌវប្បធម៌ ឆ្នេរសមុទ្រ ព្រៃភ្នំ និងធម្មជាតិដ៏ស្រស់ស្អាត។ ជាមួយគ្នានេះដែរ ឯកឧត្តម Bo Shanglang បានបង្ហាញការប្តេជ្ញាចិត្តក្នុងការសហការជាមួយក្រសួងទេសចរណ៍ ដើម្បីទាក់ទាញក្រុមហ៊ុនផលិតភាពយន្តធំៗ របស់ប្រទេសចិន និងក្នុងតំបន់រដ្ឋបាលពិសេសហុងកុង មកថតភាពយន្តខ្នាតធំ នៅកម្ពុជា ព្រមទាំងជួយផ្សព្វផ្សាយសភាពការណ៍ពិត សុខសុវត្ថិភាពនៅកម្ពុជាទៅកាន់ប្រជាជន និងធុរជនចិន ដើម្បីពង្រឹងការតភ្ជាប់បណ្តាញធុរកិច្ច និងការវិនិយោគរវាងប្រទេសទាំងពីរ។ ជាកិច្ចបញ្ចប់ ឯកឧត្តមរដ្ឋមន្ត្រី បានស្នើសមាគមជំរុញការលើកកម្ពស់សេដ្ឋកិច្ច និងពាណិជ្ជកម្មកម្ពុជា-អាស៊ាន បន្តផ្សព្វផ្សាយព័ត៌មានពិតអំពីស្ថានភាពនយោបាយ សង្គម សេដ្ឋកិច្ច និងសន្តិសុខរបស់កម្ពុជា និង ការផ្សព្វផ្សាយគោលនយោបាយលើកលែងទិដ្ឋាការសម្រាប់ប្រជាជនចិនទៅកាន់ទីផ្សារចិនការរៀបចំកម្មវិធី FAM Trip សម្រាប់ប្រតិបត្តិករទេសចរណ៍ អ្នកផលិតមាតិកា និងសារព័ត៌មានចិន ព្រមទាំងជួយផ្សព្វផ្សាយពីការលើកទឹកចិត្តខ្ពស់របស់រាជរដ្ឋាភិបាលក្នុងការទាក់ទាញក្រុមហ៊ុនផលិតភាពយន្ត អ្នកបង្កើតមាតិកា និងវិនិយោគិនចិន មកថតភាពយន្ត ផលិតមាតិកាទេសចរណ៍ និងវិនិយោគនៅកម្ពុជា ដើម្បីរួមចំណែកលើកកម្ពស់កិត្យានុភាព និងសក្តានុពលទេសចរណ៍កម្ពុជាលើឆាកអន្តរជាតិ។ គួរបញ្ជាក់ផងដែរថា សមាគមជំរុញការលើកកម្ពស់សេដ្ឋកិច្ច និងពាណិជ្ជកម្មកម្ពុជា-អាស៊ាន (Promotion of Economic and Trade Cambodia-ASEAN Association) គឺជាសមាគមដែលមានបេសកកម្មជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម វប្បធម៌ និងការតភ្ជាប់ធុរកិច្ចរវាងកម្ពុជា និងចិន ដោយមានបណ្តាញការិយាល័យតំណាងនៅរដ្ឋធានីប៉េកាំង និងបណ្តាខេត្តធំៗ ក្នុងប្រទេសចិន និងបណ្តាប្រទេសក្នុងតំបន់អាស៊ាន ហើយជាដៃគូដ៏មានសក្តានុពលក្នុងការគាំទ្រការផ្សព្វផ្សាយទេសចរណ៍កម្ពុជា និងការពង្រីកកិច្ចសហប្រតិបត្តិការរវាងប្រទេសទាំងពីរ។ ទីស្តីការក្រសួងទេសចរណ៍ ថ្ងៃទី១៣ ខែកញ្ញា ឆ្នាំ២០២៦។ (កម្មវិធីជំនួបជាមួយដៃគូសហប្រតិបត្តិការអន្តរជាតិលើកទី៤៤ ឆ្នាំ២០២៦)