旅游部拟引入K-1国际赛事 推广昆棉文化助力体育旅游

[English Below] ទេសចរណ៍កីឡា ជាកម្លាំងចលករមួយក្នុងការទាក់ទាញភ្ញៀវទេសចរអន្តរជាតិ និងផ្សព្វផ្សាយ «គុនខ្មែរ» ទៅកាន់ពិភពលោក ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោក Daisuke Teraguchi, Chief of International Operations នៃ K-1 ចូលជួបសម្តែងការគួរសម និងពិភាក្សាការងារពាក់ព័ន្ធនឹងការជំរុញ និងអភិវឌ្ឍទេសចរណ៍កីឡា (Sports Tourism) នៅកម្ពុជា។ ជំនួបពិភាក្សានេះ ក៏មានការចូលរួមពីឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ និងលោក Rick Shin, President of Kombat Global ដោយផ្តោតសំខាន់លើការពង្រឹងកិច្ចសហប្រតិបត្តិការរវាងវិស័យទេសចរណ៍ និងកីឡាប្រយុទ្ធ ដើម្បីប្រែក្លាយព្រឹត្តិការណ៍ទេសចរណ៍កីឡាទៅជាផលិតផលទេសចរណ៍ដ៏ទាក់ទាញ និងជំរុញការផ្សព្វផ្សាយសក្កានុពល​ទេសចរណ៍​កម្ពុជាទៅកាន់ទីផ្សារអន្តរជាតិ។ កិច្ចពិភាក្សាបានផ្តោតលើស្វែងរកលទ្ធភាពនាំយក និងរៀបចំព្រឹត្តិការណ៍កីឡាទេសចរណ៍កម្រិតអន្តរជាតិនៅកម្ពុជា ដើម្បីទាក់ទាញកីឡាករ អ្នកគាំទ្រ និងភ្ញៀវទេសចរអន្តរជាតិមកទស្សនាកម្ពុជា, កិច្ចសហប្រតិបត្តិការជាមួយស្ថាប័ន និងដៃគូកីឡាអន្តរជាតិ ដើម្បីផ្សព្វផ្សាយ «គុនខ្មែរ» និងអត្តសញ្ញាណវប្បធម៌ខ្មែរទៅកាន់ពិភពលោក។ ក្នុងឱកាសនោះ ឯកឧត្តមរដ្ឋមន្ត្រីបានគូសបញ្ជាក់ថា៖ «កីឡា និងទេសចរណ៍ មានទំនាក់ទំនងយ៉ាងជិតស្និទ្ធ។ ការនាំយកព្រឹត្តិការណ៍កីឡាកម្រិតអន្តរជាតិមករៀបចំនៅកម្ពុជា មិនត្រឹមតែជួយទាក់ទាញកីឡាករ អ្នកគាំទ្រ និងភ្ញៀវទេសចរពីជុំវិញពិភពលោកប៉ុណ្ណោះទេ ប៉ុន្តែជាឱកាសដ៏មានតម្លៃក្នុងការផ្សព្វផ្សាយគោលដៅទេសចរណ៍ វប្បធម៌ អរិយធម៌ និងជាពិសេស “គុនខ្មែរ” ដែលជាកេរដំណែល និងអត្តសញ្ញាណដ៏មានតម្លៃរបស់ជាតិខ្មែរ ទៅកាន់ឆាកអន្តរជាតិ»។ ឯកឧត្តម ហួត ហាក់ រដ្ឋមន្ត្រីក្រសួង​ទេសចរណ៍ ក៏បានស្វាគមន៍ និង​គាំទ្រ​ចំពោះកិច្ចសហប្រតិបត្តិការជាមួយ K-1, សហព័ន្ធកីឡាប្រដាល់គុនខ្មែរ, Kombat Global និងដៃគូពាក់ព័ន្ធ ដើម្បីនាំយកព្រឹត្តិការណ៍កីឡាប្រយុទ្ធកម្រិតអន្តរជាតិមករៀបចំនៅកម្ពុជា ដែលនឹងរួមចំណែកបង្កើនភាពទាក់ទាញនៃទេសចរណ៍កីឡា ពង្រីកទីផ្សារទេសចរណ៍ និងលើកកម្ពស់កិត្តិនាមកម្ពុជានៅលើឆាកអន្តរជាតិ។ K-1 គឺជាស្ថាប័នដែល​រៀប​ចំ​ព្រឹត្តិការណ៍កីឡាប្រយុទ្ធដ៏ល្បីល្បាញមួយរបស់ជប៉ុន និងទទួលបានការទទួលស្គាល់យ៉ាងទូលំទូលាយក្នុងវិស័យកីឡាប្រយុទ្ធអន្តរជាតិ។ តាមរយៈការរៀបចំព្រឹត្តិការណ៍ប្រកួតកម្រិតខ្ពស់ K-1 បានទាក់ទាញកីឡាករល្បីៗ និងអ្នកគាំទ្រកីឡាប្រយុទ្ធពីប្រទេសជាច្រើន ហើយមានការផ្សព្វផ្សាយទៅកាន់ទស្សនិកជនអន្តរជាតិ។ សណ្ឋគារ សូហ្វីតែល សៀមរាប, ថ្ងៃ​ទី​៣១ ខែ​កក្កដា ឆ្នាំ​២០២៦