柬埔寨公务员普查委员会将于2026年11月初对社会福利部进行

គណៈកម្មការជំរឿនមន្ត្រី ត្រៀមចុះពិនិត្យវត្តមាន និងរចនាសម្ព័ន្ធនៃក្រសួងសង្គមកិច្ច អតីតយុទ្ធជន និងយុវនីតិសម្បទា នាដើមខែវិច្ឆិកា ខាងមុខនេះ ក្រុមការងារជំរឿនមន្ត្រីនៃក្រសួងមុខងារសាធារណៈ និងក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំកិច្ចប្រជុំបច្ចេកទេសមួយ នារសៀលថ្ងៃទី២៣ ខែកញ្ញា ឆ្នាំ២០២៦ នេះ នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីពិភាក្សាលើផែនការសកម្មភាព ត្រៀមចុះធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីរាជការជាក់ស្តែង។ កិច្ចប្រជុំនេះ ត្រូវបានដឹកនាំរួមគ្នាដោយ ឯកឧត្តម អែវ ប៊ុនថុល រដ្ឋលេខាធិការ និងជាប្រធានក្រុមការងារធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធ និងឯកឧត្តម ប្រាក់ សុខយូរ រដ្ឋលេខាធិការប្រចាំការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងមានការចូលរួមពីថ្នាក់ដឹកនាំ និងមន្ត្រីជំនាញជាច្រើនរូបទៀត។ ជាលទ្ធផលនៃកិច្ចពិភាក្សានេះ ក្រុមការងារបានឯកភាពលើផែនការសកម្មភាព ដោយគ្រោងនឹងបើកយុទ្ធនាការចុះធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីរាជការជាក់ស្តែងនៅតាមបណ្តាអង្គភាពចំណុះទីស្តីការក្រសួងទាំងអស់ ចាប់ពីថ្ងៃទី០៣ ដល់ថ្ងៃទី០៥ ខែវិច្ឆិកា ឆ្នាំ២០២៦ ខាងមុខនេះ។ យុទ្ធនាការរយៈពេល ៣ ថ្ងៃពេញនេះ នឹងផ្តោតលើការងារសំខាន់ៗរួមមាន ការស្រង់វត្តមានពិតប្រាកដដោយចុះផ្ទៀងផ្ទាត់ទិន្នន័យមន្ត្រីដែលកំពុងបំពេញការងារផ្ទាល់នៅតាមអគ្គនាយកដ្ឋាន នាយកដ្ឋាន និងការិយាល័យ ដើម្បីធានាភាពត្រឹមត្រូវ និងតម្លាភាពនៃចំនួនមន្ត្រីជាក់ស្តែង។ ទន្ទឹមនឹងនេះ ក្រុមការងារក៏បានត្រៀមលក្ខណៈរួចជាស្រេចនូវការកំណត់ទីតាំងជាក់លាក់ សម្ភារបច្គេកទេស និងឧបករណ៍ឌីជីថលទំនើបៗ សម្រាប់បម្រើឱ្យការប្រមូល និងផ្ទៀងផ្ទាត់ទិន្នន័យមន្ត្រី ដើម្បីធានាបាននូវភាពរហ័សទាន់ចិត្ត និងត្រឹមត្រូវ។ ដើម្បីឱ្យដំណើរការយុទ្ធនាការជំរឿននៅដើមខែវិច្ឆិកានេះ ទទួលបានលទ្ធផលល្អប្រសើរ គណៈកម្មការចុះជំរឿនមន្ត្រី សូមអំពាវនាវដល់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃគ្រប់អង្គភាពចំណុះក្រសួងទាំងអស់ មេត្តាផ្តល់កិច្ចសហការឱ្យបានស្អិតរមួត និងត្រៀមរៀបចំរាល់ឯកសារពាក់ព័ន្ធ ព្រមទាំងវត្តមានឱ្យបានគ្រប់ៗគ្នា ទៅតាមកាលវិភាគដែលបានកំណត់៕