柬埔寨教师支持职能调动新机制

**លោកគ្រូ អ្នកគ្រូ សម្តែងការគាំទ្រពេញទំហឹងចំពោះ «យន្តការប្រឡងផ្ទេរការងារបែបថ្មី» មានភាពយុត្តិធម៌ តម្លាភាព និងសុក្រឹតភាព** នៅក្នុងដំណើរការរៀបចំការប្រឡងប្រជែងផ្ទៃក្នុង សម្រាប់ការផ្ទេរ និងផ្លាស់ប្តូរទីកន្លែងបម្រើការងាររបស់មន្ត្រីរាជការគ្រូបង្រៀនមកកាន់រាជធានីភ្នំពេញ លោកគ្រូ អ្នកគ្រូ ដែលជាបេក្ខជនមកពីបណ្ដាខេត្តនានា បានសម្តែងនូវការពេញចិត្ត និងសប្បាយរីករាយចំពោះរបត់កែទម្រង់ថ្មីនេះ ដោយលោកគ្រូ អ្នកគ្រូចាត់ទុកថាជា «យន្តការប្រកបដោយគុណាធិបតេយ្យ សមធម៌ និងតម្លាភាពពិតប្រាកដ»។ បេក្ខជនបានលើកឡើងថា យន្តការនេះមានភាពយុត្តិធម៌ខ្លាំងណាស់ ព្រោះវាបានបើកឱកាសឱ្យលោកគ្រូ អ្នកគ្រូទូទាំងប្រទេស មានសិទ្ធិដាក់ពាក្យប្រឡងស្មើៗគ្នា។ ពីមុនមក យន្តការផ្ទេរការងារត្រូវបានបិទ ដែលធ្វើឱ្យគ្រូៗ ខ្វះឱកាសក្នុងការស្វែងរកដំណោះស្រាយផ្ទេរទៅជិតផ្ទះ ឬកន្លែងដែលខ្លួនចង់បាន។ បេក្ខជនម្នាក់បានគូសបញ្ជាក់ថា "ខ្ញុំឃើញយន្តការថ្មីនេះ ខ្ញុំពេញចិត្តហើយគិតថាល្អខ្លាំង ព្រោះការផ្ទេរនេះជារឿងស្មុគស្មាញ និងពិបាកមែនទែន។ ដល់ពេលក្រសួង បើកឱ្យមានការប្រឡង គឺជាឱកាសមួយ ដែលយើងអាចប្រឹងប្រែង បញ្ចេញសមត្ថភាពប្រជែងយកទីតាំងដែលយើងចង់បាន ដោយផ្អែកលើសមត្ថភាពរៀងខ្លួន គ្មានការងាកចម្លង ហើយក៏គ្មានអ្នកណាមកអន្តរាគមបានឡើយ។" បេក្ខជនបានសម្តែងការត្រេកអរចំពោះការសម្របសម្រួលលក្ខខណ្ឌដាក់ពាក្យ ដោយមិនទាមទារបែបបទរដ្ឋបាលច្រើន ឬការសុំការអនុញ្ញាតខ្វាត់ខ្វែងស្មុគស្មាញដូចមុនឡើយ។ "លក្ខខណ្ឌថ្មីនេះ គឺយើងអត់ចាំបាច់មានភាពស្មុគស្មាញលើបែបបទរដ្ឋបាលទេ គឺបំពេញពាក្យតាមប្រព័ន្ធអនឡាញ ហើយក៏មិនត្រូវការឯកសារច្រើនដែរ ត្រូវការតែឯកសារចាំបាច់មួយចំនួនប៉ុណ្ណោះ។ យើងមិនបាច់ធ្វើដំណើរចុះឡើងច្រើនដងឡើយ គឺធ្វើដំណើរមកតែម្ដង ដើម្បីចូលរួមការប្រឡង ហើយរង់ចាំដឹងលទ្ធផលតែម្ដង។" លោកគ្រូ អ្នកគ្រូទាំងអស់ បានសំណូមពរយ៉ាងទទូចដល់ក្រសួងមុខងារសាធារណៈ ក្រសួងអប់រំ យុវជន និងកីឡា និងអ្នកពាក់ព័ន្ធទាំងអស់ សូមមេត្តារៀបចំគោលការណ៍នីតិវិធី នៃការប្រឡងប្រជែងផ្ទេរទីតាំងការងារដ៏មានតម្លាភាពបែបនេះឱ្យមានជាបន្តបន្ទាប់ និងជារៀងរាល់ឆ្នាំ។