柬埔寨司法部及计划部公务员选拔考试阅卷启动

**ព្រឹកនេះ គណៈកម្មការចាប់ផ្តើមដំណើរការកែសន្លឹកកិច្ចការ នៃការប្រឡងប្រជែងជ្រើសរើសមន្ត្រី ចូលបម្រើការងារក្នុងក្រសួងយុត្តិធម៌ និងក្រសួងផែនការ (វិញ្ញាសាសរសេរលើកទី១)** នាព្រឹកថ្ងៃទី១៥ ខែកញ្ញា ឆ្នាំ២០២៦ នេះ ចាប់ពីម៉ោង ៧:០០ព្រឹកតទៅ គណៈកម្មការរៀបចំការប្រឡងប្រជែង បានចាប់ផ្តើមដំណើរការកែសន្លឹកកិច្ចការរបស់បេក្ខជន សម្រាប់ការប្រឡងប្រជែងជ្រើសរើសមន្ត្រីរាជការស៊ីវិល ចូលបម្រើការងារក្នុងក្របខ័ណ្ឌក្រសួងយុត្តិធម៌ និងមន្ត្រីផ្អែកលើកិច្ចព្រមព្រៀងការងារចូលបម្រើការងារនៅវិទ្យាស្ថានជាតិស្ថិតនៃក្រសួងផែនការ សម្រាប់វិញ្ញាសាសរសេរលើកទី១។ នៅមណ្ឌលកំណែសាលាភូមិន្ទរដ្ឋបាល ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង បានអញ្ជើញដឹកនាំពិនិត្យដោយផ្ទាល់ទៅលើរបៀបរបប និងនីតិវិធីកែសន្លឹកកិច្ចការប្រឡង ដោយមានការអញ្ជើញចូលរួមសង្កេតការណ៍ និងត្រួតពិនិត្យដោយផ្ទាល់ពីតំណាងក្រសួងសាមីទាំងពីរ (ក្រសួងយុត្តិធម៌ និងក្រសួងផែនការ) តំណាងក្រសួងសេដ្ឋកិច្ច និងហិរញ្ញវត្ថុ តំណាងអង្គភាពប្រឆាំងអំពើពុករលួយ តំណាងសាកលវិទ្យាល័យ និងសាធារណជនស្ម័គ្រចិត្តដែលចូលរួមជាអ្នកសង្កេតការណ៍។ សូមជម្រាបថា កំណែសន្លឹកកិច្ចការបានចាប់ផ្តើមដំណើរការជាផ្លូវការ តាមរយៈការកាត់ក្បាលសន្លឹកកិច្ចការ ការចុះលេខកូដ និងនីតិវិធីបច្ចេកទេសនានា ដែលស្ថិតក្រោមការឃ្លាំមើលយ៉ាងដិតដល់ និងជាប់ជាប្រចាំពីអង្គភាពប្រឆាំងអំពើពុករលួយ និងអនុគណៈកម្មការត្រួតពិនិត្យ និងវាយតម្លៃ។ ដំណើរការទាំងមូលត្រូវបានអនុវត្តយ៉ាងម៉ឺងម៉ាត់ ស្របតាមនិយាមនីតិវិធីប្រតិបត្តិដែលបានកំណត់ ដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ក្នុងស្មារតី «ជាប់ដោយមោទនភាព ធ្លាក់ដោយអស់ចិត្ត»។