劳工部官员执行公务遇车祸身亡 部门举行悼念仪式

ថ្នាក់ដឹកនាំក្រសួងការងារ អញ្ជើញចូលរួមពិធីបុណ្យគម្រប់ខួប ៧ថ្ងៃ លោក អ៉ី សូដា ដែលទទួលមរណភាពដោយសារគ្រោះថ្នាក់ចរាចរណ៍ក្នុងពេលបំពេញបេសកកម្មក្នុងខេត្តពោធិ៍សាត់ (ពោធិ៍សាត់)៖ នារសៀលថ្ងៃទី២៤ ខែឧសភា ឆ្នាំ២០២៦ នេះ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមពិធីបុណ្យគម្រប់ខួប ៧ថ្ងៃ របស់លោក អ៉ី សូដា អនុប្រធានការិយាល័យអធិការកិច្ចការងារ និងវិវាទការងារ នៃមន្ទីរការងារនិងបណ្តុះបណ្តាលវិជ្ជាជីវៈខេត្តពោធិ៍សាត់ ដែលបានទទួលមរណភាព កាលពីថ្ងៃអង្គារ ទី១៩ ខែឧសភា កន្លងទៅ ដោយសារគ្រោះថ្នាក់ចរាចរណ៍ក្នុងពេលបំពេញបេសកកម្មនៅក្នុងខេត្តពោធិ៍សាត់។ នាឱកាសដ៏ក្រៀមក្រំនេះ លោកជំទាវរដ្ឋលេខាធិការប្រចាំការ ក្នុងនាមថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងការងារនិងបណ្តុះបណ្តាលវិជ្ជាជីវៈ បានសម្តែងនូវសេចក្តីសោកស្តាយ និងចូលរួមរំលែកទុក្ខយ៉ាងជ្រាលជ្រៅបំផុត ជាមួយក្រុមគ្រួសារនិងញាតិមិត្តនៃសពចំពោះការបាត់បង់ស្វាមីជាទីស្រលាញ់ និងកូនប្រុសដ៏កត្ត្តញ្ញូ ព្រមទាំងជាធនធានមនុស្សដ៏មានតម្លៃម្នាក់ ដែលបានបូជាកម្លាំងកាយចិត្ត បំពេញការងារក្នុងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈនាពេលកន្លងមក។ ​ទន្ទឹមនឹងការចូលរួមរំលែកទុក្ខដ៏ក្រៀមក្រំជាមួយក្រុមគ្រួសារនៃសព លោកជំទាវក៏បាននាំយកបច្ច័យចូលរួមពិធីបុណ្យ និងឧទ្ទិសមគ្គផលជូនដល់ដួងវិញ្ញាណក្ខន្ធលោក អ៉ី សូដា សូមបានទៅកាន់សុគតិភពកុំបីឃ្លៀងឃ្លាតឡើយ។ ឆ្លៀតក្នុងឱកាសនោះដែរ លោកជំទាវរដ្ឋលេខាធិការប្រចាំការ ក៏បានអញ្ជើញទៅសាកសួរសុខទុក្ខមន្ត្រី ៣រូបទៀត ដែលកំពុងសម្រាកព្យាបាលនៅគេហដ្ឋាន បន្ទាប់ពីជួបគ្រោះថ្នាក់ចរាចរណ៍ក្នុងពេលបំពេញបេសកកម្មជាមួយគ្នានៅខេត្តពោធិ៍សាត់ កាលពីពេលថ្មីៗនេះផងដែរ៕ #MLVT #HENGSour