柬埔寨重申边境立场 配合东盟观察团实地考察奥比占乡

កម្ពុជា សម្របសម្រួលក្រុមសង្កេតការណ៍អាស៊ាន ចុះពិនិត្យស្ថានភាពនៅឃុំអូរបីជាន់ និងបញ្ជាក់ជំហរមិនទទួលស្គាល់ការកែប្រែព្រំដែនដោយកម្លាំងយោធា លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានឱ្យដឹងថា នៅព្រឹកថ្ងៃទី១៧ ខែឧសភា ឆ្នាំ២០២៦ វេលាម៉ោង ០៩:០០នាទី ក្រុមអ្នកសម្របសម្រួល (CLG) របស់ព្រះរាជាណាចក្រកម្ពុជា បានសម្របសម្រួលជូនក្រុមអ្នកសង្កេតការណ៍អាស៊ាន (AOT) ដឹកនាំដោយប្រធានបេសកកម្ម ហ្វីលីពីន ចុះសង្កេតការណ៍ ផ្ទៀងផ្ទាត់ និងរាយការណ៍ស្ថានភាពព្រំដែន នៅតំបន់ភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ តំបន់នេះជាទីតាំងដែលប្រជាពលរដ្ឋកម្ពុជាប្រើប្រាស់ និងអាស្រ័យផលយូរមកហើយ ហើយកម្ពុជាបន្តគ្រប់គ្រងក្រោយបទឈប់បាញ់បន្ទាន់រវាងកម្ពុជា-ថៃ ដែលមានសុពលភាពចាប់ពីថ្ងៃទី២៧ ខែធ្នូ ឆ្នាំ២០២៥។ ក្រុមសង្កេតការណ៍ក៏បានពិនិត្យលើការអនុវត្តវិធានការនានា ក្នុងសេចក្តីប្រកាសរួមបន្ទាប់ពីបទឈប់បាញ់ផងដែរ។ ក្នុងឱកាសនេះ ភាគីកម្ពុជាបានបញ្ជាក់ជាថ្មីថា ការងារវាស់វែង និងខណ្ឌសីមាព្រំដែនលើដីជាក់ស្តែង គឺជាសមត្ថកិច្ចផ្តាច់មុខរបស់គណៈកម្មការចម្រុះខណ្ឌសីមាព្រំដែនគោក (JBC) ខណៈកងកម្លាំងប្រដាប់អាវុធ និងអាជ្ញាធរមូលដ្ឋាន មិនមានសិទ្ធិកំណត់ ឬបញ្ជាក់ខ្សែព្រំដែនឡើយ។ ការងារនេះត្រូវអនុវត្តដោយក្រុមវាស់វែងចម្រុះ (JSTs) ក្រោមរចនាសម្ព័ន្ធ JBC នៃភាគីទាំងពីរ។ ជាមួយគ្នានេះ កម្ពុជាបានបញ្ជាក់យ៉ាងច្បាស់ថា មិនទទួលស្គាល់ដាច់ខាតនូវការកែប្រែខ្សែព្រំដែនអន្តរជាតិណាមួយ ដែលផ្ទុយពីឯកសារផ្លូវច្បាប់ពាក់ព័ន្ធ រួមមាន អនុសញ្ញា និងសន្ធិសញ្ញាបារាំង-សៀម ផែនទីផ្លូវការខណ្ឌសីមា កំណត់ហេតុគណៈកម្មការបច្ចេកទេស និងកិច្ចព្រមព្រៀងពាក់ព័ន្ធដូចជា MOU ឆ្នាំ២០០០ និង TOR ឆ្នាំ២០០៣។ បន្ថែមពីនេះ កម្ពុជាក៏បានបដិសេធការកែប្រែព្រំដែនណាមួយ ដែលកើតចេញពីការប្រើប្រាស់កម្លាំង ទាំងអតីតកាល បច្ចុប្បន្ន និងអនាគត ហើយបានអំពាវនាវឱ្យភាគីថៃ សហការចាត់បញ្ជូនក្រុម JSTs ចុះវាស់វែងលើដីជាក់ស្តែង និងរៀបចំកិច្ចប្រជុំ JBC ឱ្យបានឆាប់រហ័ស។ រាជរដ្ឋាភិបាល និងក្រសួងការពារជាតិ ក៏បានបញ្ជាក់ពីការប្តេជ្ញាចិត្តបន្តគោរព និងអនុវត្តយ៉ាងតឹងរឹងនូវសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅកម្ពុជា-ថៃ (GBC) និងកិច្ចព្រមព្រៀងសន្តិភាពផ្សេងៗ ដើម្បីស្តារឡើងវិញនូវប្រក្រតីភាព សន្តិភាព និងស្ថិរភាពយូរអង្វែងតាមបណ្តោយព្រំដែន៕