柬越司法部长举行会晤 承诺加强两国法律合作

ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌បានទទួលជួបឯកឧត្ដម Hoang Thanh Tung រដ្ឋមន្ត្រីក្រសួងយុត្តិធម៌នៃសាធារណរដ្ឋសង្គមនិយមវៀតណាម និងសហការី ដើម្បីសម្តែងការគួរសម និងពិភាក្សាការងារ ===================== ទីស្តីការក្រសួងយុត្តិធម៌៖ នៅព្រឹកថ្ងៃសៅរ៍ ១៤រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១០ ខែតុលា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌បានទទួលជួបឯកឧត្ដម Hoang Thanh Tung រដ្ឋមន្ត្រីក្រសួងយុត្តិធម៌នៃសាធារណរដ្ឋសង្គមនិយមវៀតណាម និងសហការី ដើម្បីសម្តែងការគួរសម និងពិភាក្សាការងារ។ ជាកិច្ចចាប់ផ្តើម ឯកឧត្តមឧបនាយករដ្ឋមន្ត្រី បានសម្ដែងនូវការស្វាគមន៍យ៉ាងកក់ក្ដៅចំពោះឯកឧត្ដម Hoang Thanh Tung និងសហការី ដែលបានអញ្ជើញមកកាន់ព្រះរាជាណាចក្រកម្ពុជា និងក្រសួងយុត្តិធម៌នាពេលនេះ ហើយក៏បានសម្ដែងនូវការអបអរសាទរជូនចំពោះឯកឧត្ដម ដែលត្រូវបានតែងតាំងជារដ្ឋមន្ត្រីក្រសួងយុត្តិធម៌នៃសាធារណរដ្ឋសង្គមនិយមវៀតណាម។ ឆ្លៀតក្នុងឱកាសនេះ, ឯកឧត្តមឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះទំនាក់ទំនងកិច្ចសហប្រតិបត្តិការផ្នែកច្បាប់គ្រប់ជ្រុងជ្រោយរវាងប្រទេសទាំង ២ ផងដែរ។ ជាការឆ្លើយតប, ឯកឧត្ដម Hoang Thanh Tung ក៏បានថ្លែងអំណរគុណជូនចំពោះ ឯកឧត្តមឧបនាយករដ្ឋមន្ត្រី ដែលបានចំណាយពេលវេលាដ៏មានតម្លៃក្នុងការទទួលឯកឧត្ដមនាពេលនេះ និងបានថ្លែងអំណរគុណចំពោះកិច្ចសហប្រតិបត្តិការដ៏ល្អដែលក្រសួងយុត្តិធម៌កម្ពុជាបានផ្ដល់ជូនភាគីវៀតណាមនាពេលកន្លងមក។ នៅក្នុងជំនួបនេះ, ឯកឧត្តមឧបនាយករដ្ឋមន្ត្រី និងឯកឧត្ដម Hoang Thanh Tung បានពិភាក្សាអំពីកិច្ចការមួយចំនួន រួមមាន៖ (១)-ការបញ្ចប់ការចរចា និងឈានទៅដល់ការចុះហត្ថលេខាឱ្យបានឆាប់លើអនុស្សរណៈនៃការយោគយល់គ្នាស្តីពីសហប្រតិបត្តិការលើវិស័យច្បាប់ និងយុត្តិធម៌ រវាងក្រសួងយុត្តិធម៌នៃព្រះរាជាណាចក្រកម្ពុជា និងក្រសួងយុត្តិធម៌នៃសាធារណរដ្ឋសង្គមនិយមវៀតណាម, (២)-ការរៀបចំសន្និសីទលើកទី៣ នៃតុលាការខេត្តជាប់ព្រំដែនរួមរវាងវៀតណាម-កម្ពុជា នៅប្រទេសវៀតណាម។ ជាកិច្ចបញ្ចប់ ឯកឧត្តមឧបនាយករដ្ឋមន្ត្រី និងឯកឧត្តម Hoang Thanh Tung បានបញ្ជាក់អំពីការប្ដេជ្ញាចិត្តបន្តទំនាក់ទំនងយ៉ាងជិតស្និត និងកិច្ចសហប្រតិបត្តិការល្អរវាងក្រសួងយុត្តិធម៌នៃព្រះរាជាណាចក្រកម្ពុជា និងក្រសួងយុត្តិធម៌នៃសាធារណរដ្ឋសង្គមនិយមវៀតណាម។