劳工部蒙多基里办招聘论坛 2205岗位 500人到场

“ខ្មែរជួយរកការងារ និងផ្ដល់ការងារឱ្យខ្មែរ”៖ ក្រសួងការងារនាំយកឱកាសការងារជាង ២ពាន់កន្លែង និងការបណ្តុះបណ្តាលជំនាញដោយឥតគិតថ្លៃជូនដល់ប្រជាពលរដ្ឋនៅមណ្ឌលគិរី (មណ្ឌលគិរី)៖ ក្រសួងការងារនិងបណ្តុះបណ្តាលវិជ្ជាជីវៈ តាមរយៈវេទិកាការងារ សន្តិសុខសង្គម និងការបណ្តុះបណ្តាលវិជ្ជាជីវៈ បាននាំយកឱកាសការងារសរុបចំនួន ២ ២០៥ កន្លែង អត្ថប្រយោជន៍ ប.ស.ស. និងកម្មវិធី TVET ទៅផ្សព្វផ្សាយជូនប្រជាពលរដ្ឋដល់មូលដ្ឋានជាង ៥០០នាក់ ជាពិសេសអតីតពលករមកពីប្រទេសថៃ និងយុវជនកំពុងរកការងារធ្វើ នាព្រឹកថ្ងៃសៅរ៍ ទី៧ ខែវិច្ឆិកា ឆ្នាំ២០២៦ នៅបរិវេណសាលាក្រុងសែនមនោរម្យ ខេត្តមណ្ឌលគិរី។ ថ្លែងក្នុងវេទិកា ក្រោមប្រធានបទ “ខ្មែរជួយរកការងារ និងផ្ដល់ការងារឱ្យខ្មែរ” ឯកឧត្តម សោម អូន រដ្ឋលេខាធិការ នៃក្រសួងការងារនិងបណ្តុះបណ្តាលវិជ្ជាជីវៈ បានលើកឡើងពីតួនាទីស្នូល និងគោលនយោបាយសំខាន់ៗរបស់ក្រសួងលើវិស័យការងារ បេឡាជាតិសន្តិសុខសង្គម និងការបណ្តុះបណ្តាលវិជ្ជាជីវៈ។ នាឱកាសនេះ ក្នុងស្មារតីយកចិត្តទុកដាក់ខ្ពស់ចំពោះជីវភាពរស់នៅរបស់ប្រជាពលរដ្ឋ ក្រសួងបាននាំយកក្រុមហ៊ុន សហគ្រាស និងរោងចក្រមកផ្សព្វផ្សាយឱកាសការងារជាង ២ពាន់កន្លែង ដើម្បីឱ្យអតីតពលករមកពីប្រទេសថៃ និងយុវជនកំពុងរកការងារធ្វើអាចចុះឈ្មោះ សម្ភាស និងទទួលបានការងារភ្លាមៗ។ ឯកឧត្តមបានគូសបញ្ជាក់ពីសារៈសំខាន់នៃការងារដែលជា “ប្រភពចំណូល ជួយឱ្យជីវភាពមានស្ថិរភាព” ជាពិសេសគឺការងារក្នុងស្រុកសម្រាប់កសាងជីវភាពប្រកបដោយ “សុវត្ថិភាព” និងរួមចំណែកដោយផ្ទាល់ដល់ការអភិវឌ្ឍសេដ្ឋកិច្ចជាតិ។ មិនត្រឹមតែទទួលបានប្រាក់ឈ្នួលសមរម្យ ការងារក្នុងស្រុកក៏ទទួលបានអត្ថប្រយោជន៍ជាច្រើន ជាពិសេស ប.ស.ស រួមមាន៖ ផ្នែកហានិភ័យការងារ ផ្នែកថែទាំសុខភាព និងផ្នែកសោធន ព្រមទាំងផ្តល់ “សុភមង្គល” ក្នុងគ្រួសារផងដែរ។ ផ្ទុយទៅវិញ ការងារចំណាកស្រុកខុសច្បាប់គឺប្រឈមនឹងហានិភ័យ ការកេងប្រវ័ញ្ចកម្លាំងពលកម្ម ខ្វះការគាំពារសុខភាព ការរើសអើង និងរស់ចាកឆ្ងាយពីគ្រួសារ។ ក្នុងករណីបងប្អូនចង់ទៅធ្វើការនៅក្រៅប្រទេស ឯកឧត្តមបានលើកទឹកចិត្តឱ្យចុះឈ្មោះនៅក្រុមហ៊ុនបញ្ជូនពលករស្របច្បាប់ ដែលផ្តល់ប្រាក់ខែ និងមានសុវត្ថិភាពខ្ពស់ជាងនៅប្រទេសថៃ។ ទន្ទឹមនឹងនេះ បងប្អូនក៏អាចទទួលបានការបណ្តុះបណ្តាលជំនាញវិជ្ជាជីវៈ តាមរយៈកម្មវិធី TVET ១,៥លាន ដោយឥតគិតថ្លៃ ដែលមានដូចជា ផ្នែកសំណង់ ជួសជុលគ្រឿងម៉ាស៊ីន គ្រឿងអគ្គិសនី បរិក្ខារត្រជាក់ ដុតនំ ឆុងកាហ្វេ និងផ្នែកសាឡនជាដើម។ ក្រោយពីបញ្ចប់ការសិក្សា បងប្អូនអាចប្រើប្រាស់ជំនាញទាំងនេះបង្កើតជាមុខរបរផ្ទាល់ខ្លួន ឬ អាចរកការងារធ្វើជាមួយក្រុមហ៊ុនក្នុងស្រុកទទួលបានប្រាក់ខែខ្ពស់ជាងមុន។ សម្រាប់បងប្អូនមានបណ្ណក្រីក្រ គឺរៀនជំនាញមិនអស់លុយហើយថែមទាំងទទួលបានប្រាក់ឧបត្ថម្ភពីរាជរដ្ឋាភិបាលផងដែរ។ ឯកឧត្តមក៏បានអំពាវនាវឱ្យបងប្អូនចងចាំ និងទាក់ទងលេខ Hotline ១២៩៧ សម្រាប់ព័ត៌មានពីឱកាសការងារ ឬ រៀនជំនាញវិជ្ជាជីវៈ និងលេខ ១២៨៦ សម្រាប់ផ្នែក ប.ស.ស.។ សូមបញ្ជាក់ថា ឱកាសការងារទាំងនេះ ត្រូវបានផ្តល់ដោយក្រុមហ៊ុន ថាកូ អាហ្រ្គី, Socfin, ធនាគារ វឌ្ឍន: អាស៊ី ចំកាត់ (ABA) ខេត្តមណ្ឌលគិរី, LOLC, AMK, និង មហានគរ៕ #MLVT #HENGSour