国会第七委员会与旅游部共商旅游业发展策略

[English Below] កិច្ចប្រជុំពិភាក្សាការងារ រវាងគណៈកម្មាធិការអប់រំ យុវជន កីឡា វប្បធម៌ សាសនា វិចិត្រសិល្បៈ និងទេសចរណ៍ នៃរដ្ឋសភា ជាមួយក្រសួងទេសចរណ៍ ​ដោយទទួលបានការចាត់តាំងដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ​កម្ពុជា, ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំគណៈប្រតិភូជាន់ខ្ពស់ក្រសួងទេសចរណ៍ អញ្ជើញចូលរួមកិច្ចប្រជុំពិភាក្សាការងារជាមួយគណៈកម្មការអប់រំ យុវជន កីឡា វប្បធម៌ សាសនា វិចិត្រសិល្បៈ និងទេសចរណ៍ នៃរដ្ឋសភា (គណៈកម្មការទី៧) ដឹកនាំដោយ ឯកឧត្តម ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា ដើម្បីធ្វើសេចក្តីរាយការណ៍ស្តីពី វឌ្ឍនភាពការងារ បញ្ហាប្រឈម និងទិសដៅការងារអនុវត្តបន្តរបស់ក្រសួងទេសចរណ៍ ក្នុងការអនុវត្តកម្មវិធីនយោបាយ និងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។ ​ កិច្ចប្រជុំដ៏មានសារៈសំខាន់នាព្រឹកនេះ ក៏មានការអញ្ជើញចូលរួមពីឯកឧត្តម លោកជំទាវ អនុប្រធាន សមាជិក សមាជិកា នៃគណៈកម្មការទី៧ និងគណៈកម្មការជំនាញនានានៃរដ្ឋសភា, ព្រមទាំងគណៈប្រតិភូក្រសួងទេសចរណ៍ មាន ឯកឧត្តមរដ្ឋលេខាធិការប្រចាំការ និងឯកឧត្តម លោកជំទាវ ថ្នាក់ដឹកនាំ និង ថ្នាក់អគ្គនាយក និងលោក លោកស្រី ប្រធាននាយកដ្ឋាន សរុបចំនួន ៨២រូប នៅវិមានរដ្ឋសភា។ ក្នុងឱកាស​ដ៏ឧត្តុង្គឧត្តម ឯក​ឧត្ដមរដ្ឋមន្ត្រី បាន​ធ្វើ​សេចក្ដី​រាយការណ៍​អំពីស្ថានភាពទូទៅនៃវិស័យទេសចរណ៍កម្ពុជា, បង្ហាញអំពីកិច្ចខិតខំប្រឹងប្រែង វឌ្ឍនភាពការងារ និងសមិទ្ធផលសម្រេចបាន, ​លើកឡើងពីបញ្ហាប្រឈមដែលជាកត្តាខាងក្នុង និង កត្តាខាងក្រៅ, ព្រមទាំងកាលានុវត្តភាពថ្មីៗដែលអនុគ្រោះដល់វិស័យទេសចរណ៍, ក៏ដូចជាដាក់ចេញនូវទិសដៅការងារអនុវត្តបន្តដើម្បីរក្សាភាពធន់នៃវិស័យទេសចរណ៍ និងរក្សានូវភាពប្រកួតប្រជែងខ្ពស់ក្នុងតំបន់ និងពិភពលោក។ ​ ជាមួយគ្នានេះ ឯកឧត្តមរដ្ឋមន្ត្រី ក៏បានជម្រាបជូន អំពីវិធានការអន្តរាគមន៍ជាបន្តបន្ទាប់របស់រាជរដ្ឋាភិបាល ដោយក្នុងនោះ រាជរដ្ឋាភិបាល នីតិកាលទី៦ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា ដោយបានដាក់ចេញនូវវិធានការ ១១ជុំ ដើម្បីស្តារ និងជំរុញកំណើនសេដ្ឋកិច្ចក្រោយវិបត្តិជំងឺកូវីដ-១៩។ ដោយឡែក រាជរដ្ឋាភិបាល នីតិកាលទី៧ ក្រោមការដឹកនាំដ៏ប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក៏បានបន្តដាក់ចេញនូវវិធានការអន្តរាគមន៍ ចំនួន ១១ទៀត ដើម្បីគាំទ្រដល់វិស័យទេសចរណ៍ឱ្យកាន់តែមានភាពធន់ទប់ទល់នឹងវិបត្តិ, បន្តរក្សាភាពប្រកួតប្រជែង, ព្រមទាំងពង្រឹងទំនុកចិត្ត និងបង្កើនភាពជឿជាក់លើវិស័យទេសចរណ៍កម្ពុជាឱ្យកាន់តែខ្លាំងឡើងបន្ថែមទៀត។ ទន្ទឹមនេះ ឯកឧត្តមរដ្ឋមន្រ្តី ក៏បានជម្រាបជូនបន្ថែមថា វិស័យទេសចរណ៍ ជាវិស័យដែលមានភាពប្រទាក់ក្រឡាដែលត្រូវការចូលរួមយ៉ាងជិតស្និទ្ធពីគ្រប់ភាគីពាក់ព័ន្ធទាំងអស់ ដោយឈរលើអភិក្រម «ជវភាពនៃប្រព័ន្ធតួអង្គតែមួយ» ក្នុងន័យនេះ ក្រសួងទេសចរណ៍ បានដាក់ចេញនូវសសរស្តម្ភយុទ្ធសាស្ត្រនៃកិច្ចសហប្រតិបត្តិការចំនួន ៦ រួមមាន៖ ទី១).កិច្ចសហប្រតិបត្តិការនៅថ្នាក់ជាតិ ជាមួយអន្តរក្រសួង ស្ថាប័ន, ទី២).កិច្ចសហប្រតិបត្តិការជាមួយរដ្ឋបាលថ្នាក់ក្រោមជាតិ, ទី៣).កិច្ចសហប្រតិបត្តិការជាមួយវិស័យឯកជនទាំងក្នុងស្រុក និងក្រៅស្រុក, ទី៤).កិច្ចសហប្រតិបត្តិការអន្តរជាតិ, ទី៥).កិច្ចសហប្រតិបត្តិការជាមួយបណ្តាញសារព័ត៌មាន និងអ្នកផលិតមាតិកាព័ត៌មាន, Influencers, KoLs និងទី៦).ការចូលរួមពីបុគ្គលម្នាក់ៗ។ ជាការឆ្លើយតប ឯកឧត្តមប្រធានគណៈកម្មការទី៧ បានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែង វឌ្ឍនភាព និង សមិទ្ធផលនៅក្នុងវិស័យទេសចរណ៍ ក្រោមការតម្រង់ទិសដ៏ខ្ពង់ខ្ពស់ជាប់ប្រចាំរបស់សម្តេចធិបតីនាយករដ្ឋមន្ត្រី ក៏ដូចជាការអនុវត្តតួនាទីភារកិច្ចប្រកបដោយការទទួលខុសត្រូវខ្ពស់ របស់ ឯកឧត្តមរដ្ឋមន្រ្តី ហួត ហាក់ និង ថ្នាក់ដឹកនាំ ព្រមទាំងមន្ត្រីរាជការគ្រប់លំដាប់ថ្នាក់របស់ក្រសួងទេសចរណ៍។ ទន្ទឹមនេះ ជាមួយការទទួលស្គាល់ និងកត់សម្គាល់នូវរាល់បញ្ហាប្រឈមនានានៅក្នុងវិស័យទេសចរណ៍ អង្គប្រជុំក៏បានឯកភាពលើយុទ្ធសាស្ត្រគន្លឹះ និងទិសដៅការងារដែលក្រសួងទេសចរណ៍បានដាក់ចេញ ព្រមទាំងបានផ្តល់នូវអនុសាសន៍សំខាន់ៗដ៏មានសារៈប្រយោជន៍មួយចំនួនទៀត ដើម្បីជាមូលដ្ឋានសម្រាប់ក្រសួងទេសចរណ៍យកទៅសម្រួចផែនការសកម្មភាពឱ្យកាន់តែមានប្រសិទ្ធភាព និង ប្រសិទ្ធផលខ្ពស់ សំដៅជំរុញវិស័យទេសចរណ៍បន្តជាចន្ទល់សេដ្ឋកិច្ចជាតិដ៏សំខាន់។ វិមានរដ្ឋសភា ព្រឹកថ្ងៃទី២៤ ខែសីហា ឆ្នាំ២០២៦