商务部推进腰果政策评估 强化数据采集与行业竞争力

(ភ្នំពេញ)៖ នាព្រឹកថ្ងៃពុធ ទី២៩ ខែមេសា ឆ្នាំ២០២៦ ក្រសួងពាណិជ្ជកម្មបានរៀបចំសិក្ខាសាលាស្តីពី “វិធីសាស្ត្រតាមដាន និងវាយតម្លៃការអនុវត្តគោលនយោបាយជាតិស្តីពីស្វាយចន្ទី ឆ្នាំ២០២២-២០២៧” ក្រោមអធិបតីភាព ឯកឧត្តម រាជ រ៉ា រដ្ឋលេខាធិការ និងជាអនុប្រធានអចិន្ត្រៃយ៍ នៃគណៈកម្មការអន្តរក្រសួងតាមដាន និងវាយតម្លៃការអនុវត្តគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ (គ.ត.គ.ស.) ដោយទទួលបានការគាំទ្រ និងសហការជាមួយគម្រោង EU-German CAPSAFE និងមានការចូលរួមពីតំណាងសហភាពអឺរ៉ុបប្រចាំព្រះរាជាណាចក្រកម្ពុជា ឯកឧត្តម លោកជំទាវ សមាជិក សមាជិកានៃ គ.ត.គ.ស. និងសមាជិក សមាជិកាលេខាធិការដ្ឋាននៃ គ.ត.គ.ស. ជាច្រើនរូប។ សិក្ខាសាលានេះ រៀបចំឡើងក្នុងគោលបំណង ដើម្បីបញ្ជ្រាបការយល់ដឹងពីវិធីសាស្ត្រនៃការប្រមូល បញ្ចូល និងបំពេញទិន្នន័យឱ្យបានត្រឹមត្រូវ ច្បាស់លាស់ រួមទាំងនីតិវិធីពិនិត្យគុណភាពទិន្នន័យ និងមានទឡ្ហីករណ៍វាយតម្លៃគោលនយោបាយឱ្យកាន់តែមានប្រសិទ្ធិភាព ជាពិសេសផ្តល់ឱកាសឱ្យភាគីពាក់ព័ន្ធទាំងអស់បានពិភាក្សា ផ្លាស់ប្តូរយោបល់ និងចែករំលែកបទពិសោធ ដើម្បីចូលរួមចំណែកអនុវត្តគោលនយោបាយជាតិនេះឱ្យទទួលបានប្រសិទ្ធផល និងប្រសិទ្ធភាពខ្ពស់។ ក្នុងមតិបើកសិក្ខាសាលា ឯកឧត្តមរដ្ឋលេខាធិការ បានលើកឡើងពីសារៈសំខាន់នៃការតាមដាន និងវាយតម្លៃ ការវាស់វែងលទ្ធផលនៃការអនុវត្តគោលនយោបាយជាតិស្វាយចន្ទី ក៏ដូចជាការកំណត់បញ្ហាប្រឈម និងស្វែងរកដំណោះស្រាយសមស្រប និងបានស្នើសុំឱ្យក្រសួង-ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ វិស័យឯកជន និងដៃគូអភិវឌ្ឍន៍រួមគ្នាលើកកម្ពស់វិស័យស្វាយចន្ទីឱ្យមានការរីកចម្រើនប្រកបដោយចីរភាព។ ជាមួយគ្នានេះ ឯកឧត្តមរដ្ឋលេខាធិការ ក៏បានថ្លែងអំណរគុណចំពោះក្រសួង-ស្ថាប័ន និងភាគីពាក់ព័ន្ធទាំងអស់ សម្រាប់កិច្ចសហការយ៉ាងជិតស្និទ្ធនាពេលកន្លងមក និងលើកទឹកចិត្តឱ្យបន្តកិច្ចសហការនេះឱ្យកាន់តែស្អិតរមួតបន្ថែមទៀត ជាពិសេស បានជំរុញឱ្យអង្គសិក្ខាសាលា បន្តយកចិត្តទុកដាក់ចំពោះបទបង្ហាញរបស់ជំនាញការ និងការណែនាំពីវិធីសាស្ត្រនៃការប្រមូល បញ្ចូល និងបំពេញទិន្នន័យឱ្យបានត្រឹមត្រូវ ច្បាស់លាស់ រួមទាំងនីតិវិធីពិនិត្យគុណភាពទិន្នន័យ និងមានទឡ្ហីករណ៍វាយតម្លៃ ដើម្បីយកទៅប្រើប្រាស់ក្នុងការចូលរួមអនុវត្តគោលនយោបាយជាតិស្តីពីស្វាយចន្ទីឱ្យកាន់តែមានប្រសិទ្ធិភាព និងសុក្រឹត្យភាព។ សូមបញ្ជាក់ជូនថា គោលនយោបាយជាតិស្តីពីស្វាយចន្ទីឆ្នាំ២០២២-២០២៧ ត្រូវបានធ្វើការវាយតម្លៃពាក់កណ្តាលអាណត្តិកាលពីឆ្នាំ២០២៥ កន្លងទៅ និងត្រូវធ្វើការវាយតម្លៃចុងអាណត្តិនៅក្នុងឆ្នាំ២០២៧ ខាងមុខនេះ៕ … ភ្ជាប់មកកាន់ក្រសួងពាណិជ្ជកម្ម តាមតំណភ្ជាប់ខាងក្រោម៖ Connect with Ministry Of Commerce: 🌐 [Facebook ](https://web.facebook.com/moc.gov.kh)🌐 [Telegram ](https://t.me/mocnewsfeed)🌐 [Website ](https://www.moc.gov.kh/)🌐 [YouTube ](https://www.youtube.com/@mocgovkhcambodia)🌐 [X (Twitter](https://twitter.com/MoCCambodia))