司法部启动免费法律咨询项目

ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ បានអញ្ជើញជាអធិបតីក្នុងពិធី ដាក់ឱ្យដំណើរការគម្រោងផ្តល់សេវាប្រឹក្សាយោបល់ផ្នែកច្បាប់ជូនប្រជាពលរដ្ឋ ដោយឥតគិតថ្លៃ និងការចុះអនុស្សរណៈនៃការយោគយល់គ្នារវាង នាយកដ្ឋានដោះស្រាយវិវាទក្រៅប្រព័ន្ធតុលាការ និងជំនួយផ្នែកច្បាប់ និងអង្គការនារីដើម្បីសន្តិភាព ===================== នាថ្ងៃព្រហស្បតិ៍ ១៣រោច ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១០ ខែកញ្ញា ឆ្នាំ២០២៦ ដោយទទួលការអនុញ្ញាតដ៏ខ្ពង់ខ្ពស់ពី ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ បានអញ្ជើញជាអធិបតីក្នុងពិធី ដាក់ឱ្យដំណើរការគម្រោងផ្តល់សេវាប្រឹក្សាយោបល់ផ្នែកច្បាប់ជូនប្រជាពលរដ្ឋ ដោយឥតគិតថ្លៃ និងការចុះអនុស្សរណៈនៃការយោគយល់គ្នារវាង នាយកដ្ឋានដោះស្រាយវិវាទក្រៅប្រព័ន្ធតុលាការ និងជំនួយផ្នែកច្បាប់ និងអង្គការនារីដើម្បីសន្តិភាព។ ពិធីនេះ មានការអញ្ជើញចូលរួមជាគណៈអធិបតីពីសំណាក់ ឯកឧត្តម ប៉ូច សោភ័ណ អនុរដ្ឋលេខាធិការក្រសួងយុត្តិធម៌, ឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការរដ្ឋប្បវេណី, ឯកឧត្តម ឃ្លោក ដារ៉ា ប្រតិភូរាជរដ្ឋាភិបាល និងជាអគ្គនាយក, លោកជំទាវ ញាន សុចិត្ត្រា អគ្គនាយកនៃអគ្គនាយកដ្ឋានអភិវឌ្ឍន៍នៃក្រសួងកិច្ចការនារី, លោកស្រី សៅ សុធារី នាយិកាប្រតិបត្តិនៃអង្គការនារីដើម្បីសន្តិភាព, លោកស្រី Matilda Bogne តំណាងប្រចាំប្រទេសនៃការិយាល័យឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិ និងដោយមានការអញ្ជើញចូលរួមពីសំណាក់ តំណាងក្រសួងកិច្ចការនារី, តំណាងក្រសួងមហាផ្ទៃ, តំណាងក្រសួងសង្គមកិច្ច, អង្គការសង្គមស៊ីវិល, ដៃគូអភិវឌ្ឍន៍ និងតំណាងស្ថានទូតព្រីតថេន, ស្ថានទូតអាល្លឺម៉ង់ និងស្ថានទូតអូស្ត្រាលីប្រចាំកម្ពុជា និងមន្រ្តីនៃអគ្គនាយកដ្ឋានកិច្ចការរដ្ឋប្បវេណី សរុប ៧០ រូប។ កម្មវិធីនេះក៏ជាវេទិកា ដើម្បីផ្សព្វផ្សាយ និងបញ្ជ្រាបព័ត៌មានអំពីកម្មវិធីជាអាទិភាពដ៏សំខាន់មួយគឺការលើកកម្ពស់ការផ្តល់សេវាជំនួយផ្នែកច្បាប់ នៅក្នុងក្របខ័ណ្ឌនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ប៉ិនប្រសប់ និងជាក់ស្តែងនិយមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាសក្ខីភាពមួយលើកិច្ចសហការរួមគ្នា រវាង ក្រសួងយុត្តិធម៌ និងអង្គការដៃគូ ក្នុងការពង្រឹង និងលើកកម្ពស់យន្តការដោះស្រាយវិវាទនៅថ្នាក់មូលដ្ឋាន និងជំនួយផ្នែកច្បាប់ សំដៅធ្វើឱ្យប្រសើរឡើងនូវសិទ្ធិទទួលបានយុត្តិធម៌សម្រាប់បុគ្គលគ្រប់រូប។