司法部举办针对网络诈骗及洗钱犯罪的调查培训，旨在强化执法人员

ឯកឧត្តម កេង សុម៉ារិទ្ធ រដ្ឋលេខាធិការ អញ្ជេីញចូលរួមធ្វេីបទបង្ហាញក្នុងវគ្គបណ្ដុះបណ្ដាលស្ដីពីការពង្រឹងជំនាញស៊ើបអង្កេតបទល្មើសសម្អាតប្រាក់ ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា =================== រាជធានីភ្នំពេញ ៖ នាព្រឹកថ្ងៃចន្ទ ៣កើត ខែភទ្របទ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១៤ ខែកញ្ញា ឆ្នាំ២០២៦ ដោយទទួលបានការចាត់តាំងដ៏ខ្ពង់ខ្ពស់ពី ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ , ឯកឧត្តម កេង សុម៉ារិទ្ធ រដ្ឋលេខាធិការ បានអញ្ជេីញធ្វើបទបង្ហាញក្នុងវគ្គបណ្ដុះបណ្ដាលស្ដីពីការពង្រឹងជំនាញស៊ើបអង្កេតបទល្មើសសម្អាតប្រាក់ ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា នៅនាយកដ្ឋានអង្គរក្ស។ វគ្គបណ្តុះបណ្តាលនេះត្រូវបានរៀបចំឡើងដោយ ក្រុមការងារប្រឆាំងការសម្អាតប្រាក់ និងហិរញ្ញប្បទានភេរវកម្ម នៃអគ្គស្នងការដ្ឋាននគរបាលជាតិ (បសប.ហភ) ដែលប្រព្រឹត្តទៅដោយមានការចូលរួមពី ឯកឧត្ដម ឧត្ដមសេនីយ៍ឯក ស៊ាង ធារិទ្ធ អគ្គស្នងការរង និងជាប្រធានក្រុមការងារ បសប.ហភ  ព្រមទាំងសមាជិកនៃវគ្គបណ្តុះបណ្តាលជាមន្ត្រីនគរបាលយុត្តិធម៌ ដែលទទួលដឹកនាំ​បង្ក្រាបបទល្មើសឆបោកតាមប្រព័ន្ធបច្ចេកវិទ្យា សរុបប្រមាណជា ៤០រូប។ វគ្គបណ្តុះបណ្តាលនេះ មានគោលបំណងក្នុងការផ្សព្វផ្សាយ និងបញ្រ្ជាបការយល់ដឹងអំពីច្បាប់ស្តីពីប្រឆាំងការឆបោកតាមប្រព័ន្ធបច្ចេកវិទ្យា ច្បាប់ស្តីពីការប្រឆាំងការសម្អាតប្រាក់ និងច្បាប់ដែលពាក់ព័ន្ធ ជូនដល់មន្ដ្រីអនុវត្ដច្បាប់ ជាពិសេសជានគរបាលដែលបំពេញការងារក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យា និងបទល្មើសសម្អាតប្រាក់។ នៅក្នុងវគ្គបណ្តុះបណ្តាលនេះ តំណាងក្រសួងយុត្ដិធម៌ក៏បានធ្វេីបទបង្ហាញអំពីគោលបំណង និងសារៈសំខាន់នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា, បទល្មេីសថ្មីចំនួន៥ និងនីតិវិធីពិសេសថ្មី ដោយមានវេទិកាសំណួរ-ចម្លេីយ ជូនដល់សមាជិកនៃវគ្គបណ្តុះបណ្តាលទាំងអស់ផងដែរ។