卫生部在安东医院举办医疗质量与安全培训

វគ្គបណ្តុះបណ្តាល ស្តីពី “បរិយាកាសការងារដែលមានសុវត្ថិភាព ស្មារតីបុគ្គលិកមានភាពរឹងមាំ គុណភាពថែទាំ និង​ព្យាបាល​មានការរីកចម្រើន” ។ _______ រាជធានីភ្នំពេញ៖ ព្រឹកថ្ងៃអង្គារ ទី២៣ ខែមិថុនា ឆ្នាំ២០២៦ នៅមន្ទីរពេទ្យព្រះអង្គឌួង លោកជំទាវសាស្ត្រាចារ្យ អុឹម សិទ្ធិការ្យ រដ្ឋលេខាធិការក្រសួងសុខាភិបាល បានអញ្ជើញជាអធិបតី ក្នុងពិធីបើកវគ្គបណ្តុះបណ្តាល ស្តីពី “បរិយាកាសការងារដែលមានសុវត្ថិភាព ស្មារតីបុគ្គលិកមានភាពរឹងមាំ គុណភាពថែទាំ និង​ព្យាបាល​មានការរីកចម្រើន” ដោយមានការទទួលស្វាគមន៍ពីលោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង។ វគ្គបណ្តុះបណ្តាលនេះ មានគោលបំណងដើម្បី​ពង្រឹកសមត្ថភាពរបស់គិលានុបដ្ឋាក-យិកា និងឆ្មបអំពីវប្បធម៌គ្មានការស្តីបន្ទោស ការថែទាំដោយផ្តោតលើអ្នកជំងឺជាចម្បង និងការពង្រឹងស្មារតីឱ្យមានភាពរឹងមាំ។ លោកជំទាវសាស្ត្រាចារ្យបានមានប្រសាសន៍អំពីសារៈសំខាន់ ការអនុវត្ត វប្បធម៌គ្មាន​ការស្តី​បន្ទោស (Just Culture/Blame-Free Culture) គឺជាមូលដ្ឋានគ្រឹះដ៏សំខាន់​បំផុតមួយ ដើម្បីធានាបាននូវ សុវត្ថិភាពអ្នកជំងឺ (Patient Safety) ប្រកបដោយប្រសិទ្ធភាព។ ការថែទាំ​ដែល​ផ្តោតលើអ្នកជំងឺជាចម្បង (Patient-Centered Care) និងសុវត្ថិភាព​អ្នកជំងឺ (Patient Safety) គឺជាធាតុផ្សំពីរដែលមិនអាចកាត់ផ្តាច់ពីគ្នាបាន ដើម្បី​ធានា​គុណភាព​សេវាសុខាភិបាល។ ការ​ថែទាំ​សុខភាពផ្លូវចិត្ត របស់បុគ្គលិកក្នុងពេលបំពេញការងារ គឺជាកត្តា​គន្លឹះដែល​មិនអាចខ្វះ​បានក្នុងការ​ធានា​ដល់​សុវត្ថិភាព​អ្នកជំងឺដើម្បីបុគ្គលិកផ្ចង់អារម្មណ៍ ការសម្រេចចិត្ត និង​ការ​ផ្តល់សេវាថែទាំ និងព្យាបាលចំពោះ​សុវត្ថិភាព​របស់​អ្នកជំងឺ​ផ្ទាល់។ សូមបញ្ជាក់ថា វគ្គបណ្តុះបណ្តាលមានការចូលរួមពីមន្ទីរពេទ្យព្រះអង្គឌួង មន្ទីរពេទ្យថ្នាក់ជាតិ និងមន្ទីរសុខាភិបាល នៃរដ្ឋបាលខេត្តទាំងបី គឺខេត្តតាកែវ កំពត និងខេត្តកែប ចំនួន ១០០​រូប និងតាម​ប្រព័ន្ធនិម្មិតចំនួន ៣៥០រូប។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter)](https://x.com/MohCambodia) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)