柬埔寨邮政法草案二轮技术会议召开 旨在完善行业监管

ឯកឧត្តម​ កេង​ សុម៉ារិទ្ធ រដ្ឋលេខាធិការ​ និងជាប្រធានក្រុមការងារដឹកនាំការត្រួតពិនិត្យផ្នែកទោសប្បញ្ញត្ដិនៃសេចក្ដីព្រាងច្បាប់ និងលិខិតបទដ្ឋានគតិយុត្ដនានា បានអញ្ជើញដឹកនាំកិច្ចប្រជុំបច្ចេកទេស ដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពីប្រៃសណីយ៍ ===================== ទីស្តីការក្រសួងយុត្តិធម៌៖ នាព្រឹកថ្ងៃទី១១ ខែសីហា ឆ្នាំ២០២៦ ឯកឧត្តម​ កេង​ សុម៉ារិទ្ធ រដ្ឋលេខាធិការ​ និងជាប្រធានក្រុមការងារដឹកនាំការត្រួតពិនិត្យផ្នែកទោសប្បញ្ញត្ដិនៃសេចក្ដីព្រាងច្បាប់ និងលិខិតបទដ្ឋានគតិយុត្ដនានា បានអញ្ជើញដឹកនាំកិច្ចប្រជុំបច្ចេកទេស​លើកទី២ ជាមួយតំណាងក្រសួងប្រៃសណីយ៍ និងទូរគមនាគមន៍ ដេីម្បីពិនិត្យ​ និងពិភាក្សាលេីសេចក្តីព្រាងច្បាប់ស្តីពីប្រៃសណីយ៍ នៅសាលប្រជុំនៃទីស្តីការក្រសួងយុត្តិធម៌។ កិច្ចប្រជុំនេះ ក៏មានការចូលរួមពីលោកជំទាវ សុន សុខាលីដា ប្រតិភូរាជរដ្ឋាភិបាល និងអគ្គនាយកនៃអគ្គនាយកដ្ឋានកិច្ចការអយ្យការ និងព្រហ្មទណ្ឌក្រសួងយុត្តិធម៌ ព្រមទាំងសហការីដែលជាសមាសភាពក្រុមការងារដឹកនាំការត្រួតពិនិត្យផ្នែកទោសប្បញ្ញត្តិនៃសេចក្តីព្រាងច្បាប់ និងលិខិតបទដ្ឋានគតិយុត្តនានារបស់ក្រសួងយុត្តិធម៌​ ចំនួន​ ៩​ រូប​ រួមជាមួយនឹងក្រុមការងារនៃក្រសួងប្រៃសណីយ៍ និងទូរគមនាគមន៍ ដែលដឹកនាំដោយ ឯកឧត្តម ម៉ម អំណត់ រដ្ឋលេខាធិការ, ឯកឧត្ដម ហាក់ សុខហេង រដ្ឋលេខាធិការ, ឯកឧត្ដម ប៊ិន ប៊ុនឆិល រដ្ឋលេខាធិការ, ឯកឧត្ដម ប៊ិន សក្ដា អនុរដ្ឋលេខាធិការ និងសហការីនៃក្រសួងប្រៃសណីយ៍ និងទូរគមនាគមន៍ សរុប ១០រូប។ កិច្ចប្រជុំនេះ ត្រូវបានរៀបចំឡើងដើម្បីពិនិត្យ និងពិភាក្សាលេីផ្នែកទោសប្បញ្ញតិ្តនៃសេចក្តីព្រាងច្បាប់ស្តីពីប្រៃសណីយ៍ ដើម្បីធានាដល់ប្រសិទ្ធភាពនៃការគ្រប់គ្រងកិច្ចដំណើរការរបស់ប្រតិបត្ដិករ និងអ្នកប្រើប្រាស់សេវាប្រៃសណីយ៍ក្នុងព្រះរាជាណាចក្រកម្ពុជា ស្របតាមស្ថានភាពវិវត្តជាក់ស្តែងនៃសង្គម សេដ្ឋកិច្ច និងធានាបាននូវសង្គតិភាពផ្នែកគតិយុត្តជាមួយបទប្បញ្ញត្តិជាធរមានដទៃទៀតក្នុងប្រទេសកម្ពុជា។