柬埔寨卫生部举办医疗教育研讨会 旨在提升医疗人才培养质量

សិក្ខាសាលាពិគ្រោះយោបល់ ស្តីពីលទ្ធផលនៃការសិក្សាស្រាវជ្រាវសម្រាប់ការពង្រឹងការអប់រំ និងការគ្រប់គ្រងបុគ្គលិកវិស័យសុខាភិបាល នៅក្នុងប្រទេសកម្ពុជា —— រាជធានីភ្នំពេញ៖ ថ្ងៃពុធ ទី២៩ ខែមេសា ឆ្នាំ២០២៦​ នៅសណ្ឋាគារ ហៃយ៉ាត់ រីជិនស៊ី ភ្នំពេញ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល និងជានាយកគ្រប់គ្រងគម្រោងពង្រឹងប្រព័ន្ធអប់រំមុនបម្រើការការងារ (SPESHP) និងឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល បានអញ្ជើញចូលរួមជាអធិបតី ក្នុងសិក្ខាសាលាពិគ្រោះយោបល់ ស្តីពីលទ្ធផលនៃការសិក្សាស្រាវជ្រាវសម្រាប់ការពង្រឹងការអប់រំ និងការគ្រប់គ្រងបុគ្គលិកវិស័យសុខាភិបាល នៅក្នុងប្រទេសកម្ពុជា។ គោលបំណងនៃសិក្ខាសាលានេះ មានដូចខាងក្រោម៖ ១.ដើម្បីប្រមូលនូវមតិជាធាតុចូលបន្ថែមពីសមាជិកសមាជិកាពាក់ព័ន្ធក្នុងសិក្ខាសាលា ដើម្បីបំពេញបង្រ្គប់នូវលទ្ធផល នៃការសិក្សាស្រាវជ្រាវនេះ ២.ដើម្បីផ្តល់ជាគំនិតជូនដល់ក្រសួងសុខាភិបាល ក៏ដូចជាផ្នែកបណ្តុះបណ្តាលវិស័យសុខាភិបាល ដោយផ្អែកលើស្ថានភាពជាក់ស្តែង ក្នុងការពង្រឹងកិច្ចបណ្តុះបណ្តាលឲ្យមានគុណភាព និងសមត្ថភាព ដើម្បីឆ្លើយតបទៅនឹងតម្រូវការ ពិសេសស្របតាមគោលនយោបាយរបស់រាជរដ្ឋាភិបាល ក៏ដូចជាក្រសួងសុខាភិបាល ក្នុងការពង្រឹងវិស័យសុខាភិបាលឆ្ពោះទៅរកការក្របដណ្តប់សុខភាពជាសកល។ សូមបញ្ជាក់ផងដែរថា អង្គពិធីនេះមានការអញ្ជើញចូលរួមពី ឯកឧត្តម លោកជំទាវ អនុរដ្ឋលេខាធិការ ទីប្រឹក្សា ថ្នាក់ដឹកនាំ នាយកដ្ឋានចំណុះក្រសួងសុខាភិបាល ឯកឧត្តមបណ្ឌិត រ័ត្ន ឆាង អគ្គលេខាធិការ នៃគណៈកម្មាធិការ ទទួលស្គាល់គុណភាពអប់រំនៃកម្ពុជា (Accreditation Committee of Cambodia-ACC) មជ្ឈមណ្ឌលជាតិ មន្ទីរពេទ្យជាតិ សាលាមធ្យមសិក្សាសុខាភិបាលភូមិភាគ ទាំង៤ គ្រឹះស្ថានបណ្តុះបណ្តាលវិស័យសុខាភិបាលសាធារណៈ និងឯកជន គណៈវិជ្ជាជីវៈទាំង៥ សមាគមវិជ្ជាជីវៈសុខាភិបាល ដៃគូអភិវឌ្ឍន៍ ទីប្រឹក្សា និងបុគ្គលិក នៃគម្រោង SPESHP សរុបចំនួន ៧០ នាក់។ ភ្ជាប់ជាមួយសិក្ខាសាលា ឯកឧត្តមសាស្ត្រាចារ្យ ក៏បានចូលរួមដឹកនាំកិច្ចប្រជុំបូកសរុបលទ្ធផលរបស់ក្រុមការងារបច្ចេកទេស របស់ធនាគារពិភពលោក ដែលបានមកបំពេញបេសកកម្មវាយតម្លៃលើការងារបន្ថែមថវិកា និងបន្តរយៈពេលគម្រោង (additional financing) ដឹកនាំដោយ លោកវេជ្ជបណ្ឌិត Sang Minh Le អ្នកឯកទេសជាន់ខ្ពស់ផ្នែកសុខាភិបាល នៃធនាគារពិភពលោក។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter)](https://x.com/MohCambodia) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)