柬德发展合作磋商金边举行 卫生部派员参加

កិច្ចពិគ្រោះយោបល់ ស្តីពីកិច្ចសហប្រតិបត្តិការអភិវឌ្ឍន៍ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់។ —— រាជធានីភ្នំពេញ៖ នាថ្ងៃព្រហស្បតិ៍ ទី០៥ ខែវិច្ឆិកា ឆ្នាំ២០២៦ នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការក្រសួងសុខាភិបាល និងមន្រ្តីនាយកដ្ឋានសហប្រតិបត្តិការអន្តរជាតិ បានអញ្ជើញចូលរួមកិច្ចពិគ្រោះយោបល់ ស្តីពីកិច្ចសហប្រតិបត្តិការអភិវឌ្ឍន៍ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់ ក្រោមអធិបតីភាព ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា លោកជំទាវ ស៊ីលឃ័រ រើហ្វ៊័រ (Silke Röfer) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសហព័ន្ធអាល្លឺម៉ង់ ប្រចាំព្រះរាជាណាចក្រកម្ពុជា និងលោកស្រី Michaela Henning អនុប្រធាននាយកដ្ឋានអាស៊ីអាគ្នេយ៍ នៃក្រសួងសហប្រតិបត្តិការសេដ្ឋកិច្ច និងអភិវឌ្ឍ (BMZ) សហព័ន្ធអាល្លឺម៉ង់ ជាសហប្រធាន។ កិច្ចពិគ្រោះយោបល់នេះ មានគោលបំណងពិនិត្យវឌ្ឍនភាព និងកំណត់ទិសដៅអាទិភាព នៃកិច្ចសហប្រតិបត្តិការអភិវឌ្ឍន៍រវាងប្រទេសទាំងពីរ ដើម្បីជំរុញកំណើនសេដ្ឋកិច្ចប្រកបដោយការប្រកួតប្រជែង និង បរិយាបន្ន ភាពធន់នឹងការប្រែប្រួលអាកាសធាតុ ព្រមទាំងពង្រឹងចំណងមិត្តភាព និងកិច្ចសហប្រតិបត្តិការទ្វេភាគីឱ្យកាន់តែរឹងមាំ។ ក្នុងកិច្ចពិគ្រោះយោបល់នេះ ភាគីទាំងពីរបានផ្លាស់ប្តូរទស្សនៈ និងលើកឡើងនូវគំនិតផ្តួចផ្តើមថ្មីៗ ក្នុងវិស័យអាទិភាពរួមមាន ការវិនិយោគ ពាណិជ្ជកម្ម ឧស្សាហកម្មវាយនភណ្ឌ ហេដ្ឋារចនាសម្ព័ន្ធ ថាមពល ការប្រែប្រួលអាកាសធាតុ និងសុខាភិបាល។ ជាមួយគ្នានេះ ភាគីអាល្លឺម៉ង់ បានលើកឡើង អំពីកំណែទម្រង់គោលនយោបាយកិច្ចសហប្រតិបត្តិការរបស់អាល្លឺម៉ង់ ជាមួយបណ្តាប្រទេសជាមិត្ត នាពេលអនាគត។ ក្នុងឱកាសនោះ ឯកឧត្តមវេជ្ជបណ្ឌិត ស៊ុង វិនតៈ បានរាយការណ៍ពីវឌ្ឍនភាព នៃកិច្ចសហប្រតិបត្តិការកម្ពុជា-អាល្លឺម៉ង់ ដោយបានគូសរំលេចពីគម្រោងសុខភាពតែមួយនៅកម្ពុជា ដែលបានទទួលការគាំទ្រថវិកាពីធនាគារអភិវឌ្ឍន៍អាល្លឺម៉ង់ ហើយគម្រោងនេះត្រូវបានទទួលស្គាល់ និងកោតសរសើរទាំងថ្នាក់តំបន់ និងសកល ជាពិសេសក្នុងអំឡុងពេលកិច្ចប្រជុំកំពូល ស្តីពីសុខភាពតែមួយ នៅទីក្រុងលីយ៉ុង (Lyon) ប្រទេសបារាំង ដែលគណៈប្រតិភូកម្ពុជាដឹកនាំដ៏ខ្ពង់ខ្ពស់បំផុតដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចូលរួមក្នុងកិច្ចប្រជុំកំពូលនោះ។ លើសពីនេះទៀត ឯកឧត្តមរដ្ឋលេខាធិការ បានគូសបញ្ជាក់វឌ្ឍនភាពសំខាន់ៗក្នុងការអនុវត្តគម្រោង សុខភាពតែមួយ ដែលជាគម្រោងពហុវិស័យ ដឹកនាំដោយក្រសួងសុខាភិបាល មានការចូលរួមពីក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន បានចូលរួមចំណែកយ៉ាងសំខាន់ក្នុងការបង្ការ ទប់ស្កាត់ និងឆ្លើយតបគ្រោះអាសន្នសុខភាពសាធារណៈ។ គម្រោងសុខភាពតែមួយ ក៏បានគាំទ្រដល់ការរៀបចំ និងបង្កើតនូវយុទ្ធសាស្ត្រជាតិ ស្តីពីសុខភាពតែមួយ ដែលបានបញ្ចប់ចប់សព្វគ្រប់ហើយ និងប្រកាសឱ្យប្រើប្រាស់ជាផ្លូវការនាពេលអនាគតដ៏ខ្លីខាងមុខនេះ។ ឯកឧត្តមរដ្ឋលេខាធិការ ក៏បានស្នើសុំឱ្យភាគីអាល្លឺម៉ង់ បន្តជួយបន្ថែមទៀតទៅលើវិស័យសុខាភិបាល ជាពិសេសក្នុងការអនុវត្តយុទ្ធសាស្ត្រជាតិ ស្តីពីសុខភាពតែមួយ (National One Health Strategy) គឺជាយុទ្ធសាស្រ្តរយៈពេល១០ឆ្នាំ ដែលនឹងរួមចំណែកដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs) ឈានទៅសម្រេចការគ្របដណ្តប់សុខភាពជាសកល (Universal Health Coverage) របស់កម្ពុជានៅឆ្នាំ២០៣៥ និងចក្ខុវិស័យកម្ពុជាឆ្នាំ២០៥០។ កិច្ចពិគ្រោះយោបល់នេះ មានការអញ្ជើញចូលរួមពីប្រតិភូតំណាងក្រសួងពាក់ព័ន្ធនៃរាជរដ្ឋាភិបាលកម្ពុជា ប្រតិភូតំណាងសហព័ន្ធអាល្លឺម៉ង់សម្រាប់សហប្រតិបត្តិការសេដ្ឋកិច្ច និងអភិវឌ្ឍ (BMZ) ស្ថានទូតអាល្លឺម៉ង់ ប្រចាំកម្ពុជា ធនាគារអភិវឌ្ឍន៍អាល្លឺម៉ង់ (KfW) ទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ)។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)