洪玛奈总理邀请翁森安公开讨论边境文件

សម្តេចធិបតី ហ៊ុន ម៉ាណែត រង់ចាំចម្លើយពីលោក អ៊ុំ សំអាន ជុំវិញការអញ្ជើញយកឯកសារព្រំដែនមកជជែកគ្នា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ថា មកដល់ពេលនេះ មានរយៈពេល៤ថ្ងៃ ហើយ ដែលសម្តេចនៅមិនទាន់ទទួលបានចម្លើយច្បាស់លាស់ពីលោក អ៊ុំ សំអាន ពាក់ព័ន្ធនឹងការអញ្ជើញរូបលោក និងក្រុមជំនាញព្រំដែន ឱ្យនាំយកឯកសារ និងភស្តុតាងពាក់ព័ន្ធនឹងព្រំដែនកម្ពុជា-ថៃ នៅចន្លោះបង្គោលសីមាលេខ៥២ និងលេខ៥៩ មកពិភាក្សាជាមួយក្រុមការងារជំនាញព្រំដែននៃរដ្ឋលេខាធិការដ្ឋានកិច្ចការព្រំដែន។ សម្តេចធិបតីបានលើកឡើងថា ការពិភាក្សានេះមានគោលបំណងបង្ហាញពីតម្លាភាព គណនេយ្យភាព ភាពត្រឹមត្រូវ និងការទទួលខុសត្រូវចំពោះមុខប្រជាពលរដ្ឋ ជាពិសេសក្នុងពេលដែលបញ្ហាព្រំដែនកម្ពុជា-ថៃមិនទាន់ត្រូវបានដោះស្រាយបញ្ចប់។ សម្តេចធិបតីបានកត់សម្គាល់ថា ក្នុងរយៈពេលប៉ុន្មានថ្ងៃកន្លងមកនេះ លោក អ៊ុំ សំអាន បានបង្ហោះសារជាបន្តបន្ទាប់ ដោយលើកឡើងពីការព្រួយបារម្ភអំពីសុវត្ថិភាពផ្ទាល់ខ្លួន និងការលះបង់ដើម្បីផលប្រយោជន៍ជាតិ។ សម្តេចក៏បានលើកឡើងពីការដាក់លក្ខខណ្ឌជាច្រើនចំពោះរាជរដ្ឋាភិបាល ដែលតាមការយល់ឃើញរបស់សម្តេច ហាក់ដូចជាការគេចវេះពីការចូលរួមពិភាក្សាលើបញ្ហាជាក់លាក់នេះ។ សម្តេចធិបតីបានបញ្ជាក់ថា ការអញ្ជើញនេះគឺដើម្បីពិភាក្សាអំពីតំបន់មួយនៃខ្សែព្រំដែនចន្លោះបង្គោលសីមាលេខ៥២ និងលេខ៥៩ ដែលលោក អ៊ុំ សំអាន ធ្លាប់ចោទប្រកាន់ថា មន្ត្រីជំនាញព្រំដែនរបស់រាជរដ្ឋាភិបាលបានអនុញ្ញាតឱ្យភាគីថៃបោះបង្គោលចូលក្នុងដីកម្ពុជា។ សម្តេចធិបតីបានចោទជាសំណួរថា ប្រសិនបើមិនអាចចូលរួមពិភាក្សា ឬមិនមានឯកសារមកបង្ហាញលើតំបន់ជាក់លាក់មួយនេះ តើអាចមានសមត្ថភាពដោះស្រាយបញ្ហាព្រំដែនទាំងមូលបានដែរឬទេ។ ជាចុងក្រោយ សម្តេចធិបតី ហ៊ុន ម៉ាណែត បានបញ្ជាក់ថា សម្តេចនៅតែរង់ចាំចម្លើយច្បាស់លាស់ពីលោក អ៊ុំ សំអាន ចំពោះការអញ្ជើញឱ្យចូលរួមពិភាក្សា និងបង្ហាញឯកសារពាក់ព័ន្ធនឹងព្រំដែនកម្ពុជា-ថៃ នៅចន្លោះបង្គោលសីមាលេខ៥២ និងលេខ៥៩។