国际劳工组织高度评价柬埔寨消除童工进展

សាររបស់លោកស្រី Kaori NAKAMURA-OSAKA នាយិកាប្រចាំតំបន់អាស៊ី និងប៉ាស៊ីហ្វិក នៃអង្គការអន្តរជាតិខាងការងារ (ILO) ក្នុងឱកាសខួបលើកទី២៥ នៃទិវាពិភពលោកប្រឆាំងពលកម្មកុមារ ឆ្នាំ២០២៦ លោកស្រី Kaori NAKAMURA-OSAKA បានវាយតម្លៃខ្ពស់ចំពោះវឌ្ឍនភាពដ៏គួរឱ្យកត់សម្គាល់របស់តំបន់អាស៊ី និងប៉ាស៊ីហ្វិក ក្នុងការប្រឆាំងពលកម្មកុមារ ដោយក្នុងរយៈពេលបួនឆ្នាំកន្លងមកនេះ ចំនួនកុមារដែលស្ថិតក្នុងពលកម្មកុមារបានថយចុះពី ៤៩ លាននាក់ មកនៅត្រឹម ២៨ លាននាក់ ដែលជាការធ្លាក់ចុះដ៏ធំធេងបំផុតនៅលើពិភពលោក។ ក្នុងន័យនេះ លោកស្រីបានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កម្ពុជា ដែលបាននិងកំពុងរួមចំណែកយ៉ាងសំខាន់ក្នុងការសម្រេចបាននូវចក្ខុវិស័យរួមរបស់អាស៊ាន ក្នុងការកសាងតំបន់ដែលគ្មានពលកម្មកុមារ។ លោកស្រីក៏បានកោតសរសើរចំពោះរាជរដ្ឋាភិបាលកម្ពុជា និងភាគីពាក់ព័ន្ធទាំងអស់ ដែលបានបង្ហាញនូវការប្តេជ្ញាចិត្តខ្ពស់ និងសកម្មភាពក្នុងការទប់ស្កាត់ និងឈានទៅលុបបំបាត់ទម្រង់ធ្ងន់ធ្ងរនៃពលកម្មកុមារ តាមរយៈការពង្រឹងអភិបាលកិច្ចការងារ ការពង្រីកឱកាសទទួលបានការអប់រំប្រកបដោយគុណភាព និងការលើកកម្ពស់ប្រព័ន្ធគាំពារសង្គមសម្រាប់គ្រួសារងាយរងគ្រោះ។ ជាមួយគ្នានេះ លោកស្រីបានអំពាវនាវឱ្យរដ្ឋាភិបាល និយោជក អង្គការវិជ្ជាជីវៈ ដៃគូអភិវឌ្ឍន៍ សហគមន៍ និងសាធារណជនទាំងមូល បន្តពង្រឹងភាពជាដៃគូ និងបង្កើនសកម្មភាពរួមឱ្យកាន់តែមានប្រសិទ្ធភាព ដើម្បីធានាថា កុមារគ្រប់រូបទទួលបានការការពារ ការអប់រំប្រកបដោយគុណភាព និងឱកាសអភិវឌ្ឍសក្តានុពលពេញលេញ ដោយគ្មានកុមារណាម្នាក់ត្រូវបង្ខំឱ្យធ្វើការដែលប៉ះពាល់ដល់សុខភាព សុវត្ថិភាព ការអប់រំ និងអនាគតរបស់ខ្លួនឡើយ។ "ប្តេជ្ញាលុបបំបាត់ទម្រង់ធ្ងន់ធ្ងរនៃពលកម្មកុមារនៅគ្រប់ខ្សែច្រវាក់ផលិតកម្ម ដើម្បីកសាងភាពធន់ និងការងារសមរម្យ"៕ #MLVT #HENGSour