实居省乌栋市部署教育提升与2027选举工作

ថ្ងៃអាទិត្យ ២រោច ខែស្រាពណ៍ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៣០ ខែសីហា ឆ្នាំ២០២៦ ឯកឧត្តម លី ច័ន្ទតុលា ជាប្រធានក្រុមការងារចុះជួយសង្កាត់វាលពង់ និងលោកជំទាវ ឈីវ ភិរម្យ បានជួបប្រជុំការងារប្រចាំខែ ជាមួយប្រធាន អនុប្រធាន សមាជិកគណៈកម្មាធិការគណបក្សសង្កាត់វាលពង់ និងគណៈសាខាបក្សទាំង២៧ភូមិ រួមជាមួយក្រុមការងារចុះជួយសង្កាត់វាលពង់ ដែលប្រព្រឹត្តទៅក្នុងស្នាក់ការគណបក្សសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ។ ខ្លឹមសារនៃកិច្ចប្រជុំនេះរួមមានដូចខាងក្រោម៖ ១.ការរាយការណ៍អំពីវឌ្ឍភាពក្នុងសង្កាត់ ស្ថានភាពសន្តិសុខ សណ្ដាប់ធ្នាប់ក្នុងមូលដ្ឋាន ដោយលោក ម៉ា រស់។ ២.ការអនុវត្តផែនការសកម្មភាពឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ/សង្កាត់អាណត្តិទី៦ នៅឆ្នាំ២០២៧ និងបោះឆ្នោតជ្រើសតាំងតំណាងរាស្ត្រ នីតិកាលទី៨ នៅឆ្នាំ២០២៨។ ៣.ការធ្វើបច្ចុប្បន្នភាពសមាជិកគណបក្សប្រជាជនកម្ពុជាក្នុងសង្កាត់វាលពង់។ ៤.ការចិញ្ចឹមចលនា ការពង្រឹង និងពង្រីកសមាជិកគណបក្ស។ ៥.របាយការណ៍វឌ្ឍនភាពនៃការអនុវត្តយុទ្ធនាការដោះស្រាយ និងផ្តល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋក្នុងសង្កាត់វាលពង់។ ៦.ការអភិវឌ្ឍន៍ហេដ្ឋារចនាសម្ព័ន្ធក្នុងសង្កាត់។ ៧.បញ្ហាប្រឈមផ្សេងៗ និងសំណូមពររបស់ភូមិនីមួយៗ។ ក្នុងកិច្ចប្រជុំនេះ លោកជំទាវ ឈីវ ភិរម្យ បានបង្ហាញពីសកម្មភាពរបស់ក្រុមការងារចុះជួយសង្កាត់វាលពង់ លើវិស័យអប់រំ ដោយយកចិត្តទុកដាក់ទាំងកម្រិតបឋមសិក្សា និងកម្រិតវិទ្យាល័យ ក្នុងនោះផងដែរ លោកជំទាវ បានផ្តួចផ្តើមគំនិតបង្កើតគម្រោង ”ប្រកួតសរសេរសៀវភៅ” ក្នុងកម្រិតបឋមសិក្សា ក្នុងគោលបំណងធ្វើយ៉ាងណាឱ្យកុមារជៀសឆ្ងាយពីការលេងទូរស័ព្ទ ហើយងាកមកប្រឹងប្រែងអាន ប្រឹងប្រែងសរសេរសៀវភៅ ព្រមទាំងគម្រោង “គួរវ៉ាកង” ដែលបង្រៀនបន្ថែមដោយសិស្សពូកែស្ម័គ្រចិត្តពីអនុវិទ្យាល័យ និងវិទ្យាល័យវាលពង់ សម្រាប់សិស្សដែលត្រៀមចូលថ្នាក់ទី៣ក្នុងឆ្នាំសិក្សាថ្មី ក្នុងគោលដៅពង្រឹង និងបំប៉នគ្រឹះចំណេះដឹង។ បន្ថែមពីនេះការរៀបចំការប្រកួតសិស្សពូកែប្រចាំសង្កាត់វាលពង់ ទាំង៦កម្រិត(ថ្នាក់ទី១-ថ្នាក់ទី៦) នៃសាលាបឋមសិក្សាទាំង៩ នៅក្នុងឆ្នាំ២០២៧។