柬埔寨劳工部官员赴日本神奈川县举办推介会，展示柬埔寨劳动力潜

មន្រ្តីជាន់ខ្ពស់ក្រសួងការងារ ចូលរួមសិក្ខាសាលាស្ដីពីការផ្សព្វផ្សាយសក្តានុពលកម្លាំងពលកម្មកម្ពុជា និងពិភាក្សាការងារជាមួយអភិបាលក្រុងអាត់ស៊ូហ្គិ (ជប៉ុន)៖ នៅថ្ងៃទី៩ ខែតុលា ឆ្នាំ២០២៦ ឯកឧត្តម តាំង ផេងរិទ្ធី អគ្គនាយកនៃអគ្គនាយកដ្ឋានការងារ នៃក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញចូលរួមជាអធិបតីក្នុងសិក្ខាសាលាស្ដីពី “ការផ្សព្វផ្សាយសក្តានុពលកម្លាំងពលកម្មកម្ពុជា” នៅខេត្តកាណាហ្គាវ៉ា ប្រទេសជប៉ុន ដែលមានការចូលរួមពីតំណាងរាស្ត្រ សភាជាតិ សភាពាណិជ្ជកម្មខេត្ត និយោជក និងសមាគមគ្រប់គ្រងជប៉ុនសរុបប្រមាណ ៨០នាក់។ សិក្ខាសាលាផ្សព្វផ្សាយនេះសហការរៀបចំដោយក្រសួងការងារនិងបណ្តុះបណ្តាលវិជ្ជាជីវៈ និងក្រុមហ៊ុន Kojima Holdings Co., Ltd. ក្នុងគោលបំណងជំរុញ និងលើកកម្ពស់ការជ្រើសរើស បណ្តុះបណ្តាល និងបញ្ជូនជនទេសន្តរប្រវេសន៍ការងារខ្មែរទៅធ្វើការក្នុងខេត្តកាណាហ្គាវ៉ា ប្រទេសជប៉ុន ស្របតាមផែនការសកម្មភាពនៃការអនុវត្តអនុស្សរណៈនៃការយោគយល់គ្នារវាងក្រសួង និងក្រុមហ៊ុន កាលពីខែកុម្ភៈ ឆ្នាំ២០២៦ កន្លងទៅ។ ថ្លែងក្នុងសុន្ទរកថាបើកកម្មវិធី ឯកឧត្តមអគ្គនាយក បានលើកឡើងពីសាវតា និងបទពិសោធនៃការបញ្ជូនជនទេសន្តរប្រវេសន៍ការងារខ្មែរទៅធ្វើការនៅប្រទេសជប៉ុន ដែលបានបន្តកើនឡើងជារៀងរាល់ឆ្នាំ។ ឯកឧត្តមបានរំលេចអំពីសក្តានុពលនៃកម្លាំងពលកម្មកម្ពុជា ដែលមានយុវជនវ័យក្មេងច្រើន មានជំនាញ ពោរពេញដោយភាពស្វាហាប់ ឧស្សាហ៍ព្យាយាម និងមានឆន្ទៈក្នុងការយល់ដឹងអំពីបច្ចេកទេសទំនើបៗពីប្រទេសអភិវឌ្ឍន៍ផ្សេងៗ ដូចជាប្រទេសជប៉ុនជាដើម ដែលសក្តានុពល និងលក្ខខណ្ឌទាំងនេះគឺស័ក្តិសមបំផុតទៅនឹងតម្រូវការទីផ្សារការងារនៅប្រទេសជប៉ុន រួមទាំងក្នុងខេត្តកាណាហ្គាវ៉ា។ ដោយឡែក នៅព្រឹកថ្ងៃទី៩ ខែតុលា ឆ្នាំ២០២៦ ឯកឧត្តមអគ្គនាយក បានជួបសម្តែងការគួរសម និងពិភាក្សាការងារជាមួយលោក Takahiro Yamaguchi អភិបាលក្រុងអាត់ស៊ូហ្គិ និងលោក Nobuo Kosugi ប្រធានសភាពាណិជ្ជកម្ម និងឧស្សាហកម្មក្រុងអាត់ស៊ូហ្គិ។ នៅក្នុងជំនួបនេះ ឯកឧត្តមអគ្គនាយក បានស្នើស្ថាប័នទាំងពីរជួយជំរុញនិយោជក និងសមាគមក្នុងក្រុងអាត់ស៊ូហ្គិជ្រើសរើស និងទទួលយកជនទេសន្តរប្រវេសន៍ការងារខ្មែរមកធ្វើការនៅក្នុងក្រុមហ៊ុនរបស់ខ្លួនបន្ថែមទៀត និងបានអញ្ជើញមកទស្សនកិច្ចនៅកម្ពុជា ដើម្បីឈ្វេងយល់បន្ថែមអំពីកម្លាំងពលកម្មនៃប្រទេសកម្ពុជា៕ #MLVT #HENGSour