商业部任命柴桢省商业局长 推动地方商业监管

ឯកឧត្តម កឹម ស៊ីថន រដ្ឋលេខាធិការប្រចាំការ និងជាតំណាងដ៏ខ្ពង់ខ្ពស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម អញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីរពាណិជ្ជកម្មខេត្តស្វាយរៀង ... **(ស្វាយរៀង)៖** នារព្រឹកថ្ងៃអង្គារ ទី១៨ ខែសីហា ឆ្នាំ២០២៦ ឯកឧត្តម កឹម ស៊ីថន រដ្ឋលេខាធិការប្រចាំការ និងជាតំណាងដ៏ខ្ពង់ខ្ពស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម អញ្ជើញជាអធិបតីក្នុងពិធីប្រកាសចូលកាន់មុខតំណែង លោក ឆាំ ឆតារា ប្រធានមន្ទីរពាណិជ្ជកម្មខេត្តស្វាយរៀង ជំនួសលោក មាក ឆវណ្ណារុន ដែលបានចូលនិវត្តន៍។ ពិធីនេះត្រូវបានប្រារព្ធឡើងនៅសាលាខេត្តស្វាយរៀង ដោយមានការអញ្ជើញចូលរួមពីក្រុមប្រឹក្សាខេត្តតំណាង ឯកឧត្តម ម៉ែន វិបុល ប្រធានក្រុមប្រឹក្សាខេត្ត, ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង ព្រមទាំងថ្នាក់ដឹកនាំក្រសួងពាណិជ្ជកម្ម អាជ្ញាធរដែនដី និងមន្ត្រីរាជការតំណាងមន្ទីរ-អង្គភាពពាក់ព័ន្ធក្នុងខេត្តស្វាយរៀង ជាច្រើនរូប។ ក្នុងឱកាសនោះ ឯកឧត្តមរដ្ឋលេខាធិការប្រចាំការ បានសម្តែងការអបអរសាទរចំពោះលោកប្រធានមន្ទីរថ្មី និងវាយតម្លៃខ្ពស់ចំពោះកិច្ចខិតខំប្រឹងប្រែង និងសមិទ្ធផលនានារបស់លោកប្រធានមន្ទីរដែលបានចូលនិវត្តន៍ ព្រមទាំងបានកោតសរសើរចំពោះថ្នាក់ដឹកនាំ និងមន្ត្រីរាជការនៃមន្ទីរពាណិជ្ជកម្មខេត្តស្វាយរៀងទាំងអស់ ដែលបានរួមចំណែកយ៉ាងសកម្មក្នុងការអភិវឌ្ឍវិស័យពាណិជ្ជកម្មនៅថ្នាក់មូលដ្ឋាននាពេលកន្លងមក។ ជាពិសេស ឯកឧត្តមរដ្ឋលេខាធិការប្រចាំការ បានវាយតម្លៃខ្ពស់ចំពោះរដ្ឋបាលខេត្តស្វាយរៀង ដែលបានរួមចំណែកជំរុញការអភិវឌ្ឍលើវិស័យពាណិជ្ជកម្ម វិនិយោគ និងទេសចរណ៍ ឱ្យមានការរើកចម្រើនគួរឱ្យកត់សម្គាល់។ ជាមួយគ្នានេះ ឯកឧត្តមរដ្ឋលេខាធិការប្រចាំការ បានគូសបញ្ជាក់ថា ខេត្តស្វាយរៀង ដែលមាននិមិត្តរូប «ទន្លេវ៉ៃគោ» គឺជាទឹកដីប្រវត្តិសាស្ត្រមួយនៅភូមិភាគបូព៌ានៃប្រទេសកម្ពុជាមានឈ្មោះល្បីល្បាញខាងវិស័យកសិកម្ម ជាពិសេសការដាំដុះស្រូវ និងជាតំបន់ព្រំដែនដ៏សំខាន់។ ក្រោមការដឹកនាំប្រកបដោយចក្ខុវិស័យ និងម្លប់នៃសន្តិភាព ខេត្តស្វាយរៀងបានប្រែក្លាយពីខេត្តកសិកម្មបែបប្រពៃណី ទៅជា «ប៉ូលសេដ្ឋកិច្ច និងឧស្សាហកម្ម» ដ៏សំខាន់មួយរបស់ជាតិ ដែលមានសក្តានុពលស្នូលចំនួន ៣ គឺ៖ ទី១.សក្តានុពលឧស្សាហកម្ម និងតំបន់សេដ្ឋកិច្ចពិសេស(SEZ) ទី២.ពាណិជ្ជកម្មអន្តរជាតិ និងឡូជីស្ទីក និងទី៣.វិស័យកសិកម្មនិងកសិ-ឧស្សាហកម្ម ដែលជាមូលដ្ឋានសម្រាប់ជំរុញកំណើនសេដ្ឋកិច្ចប្រកបដោយចីរភាព។ បន្ថែមពីនេះ ឯកឧត្តមរដ្ឋលេខាធិការប្រចាំការ ក៏បានលើកឡើងពីសមិទ្ធផលសំខាន់ៗរបស់ក្រសួងពាណិជ្ជកម្មក្នុងការអនុវត្ត «យុទ្ធសាស្ត្របញ្ចកោណ ដំណាក់កាលទី១» របស់រាជរដ្ឋាភិបាលរួមមាន៖ ការកែទម្រង់រដ្ឋបាលសាធារណៈ និងការពង្រឹងអភិបាលកិច្ច ការជំរុញពាណិជ្ជកម្មក្នុងស្រុក ការពង្រឹងកម្មសិទ្ធិបញ្ញា និងការចុះបញ្ជីម៉ាកសម្គាល់ភូមិសាស្ត្រទំនិញ (GI) និងម៉ាកសមូហភាព ដើម្បីបង្កើនតម្លៃបន្ថែម និងភាពប្រកួតប្រជែងរបស់ផលិតផលកម្ពុជា ការពង្រីកទីផ្សារអន្តរជាតិ ការធ្វើសមាហរណកម្មពាណិជ្ជកម្មក្នុងក្របខណ្ឌតំបន់ និងសកល ការធ្វើទំនើបកម្មសេវាសាធារណៈ ការផ្សារភ្ជាប់ព័ត៌មានទីផ្សារ និងការពង្រីកការផ្តល់សេវាឌីជីថល ដើម្បីសម្រួលដល់ការធ្វើធុរកិច្ច និងការវិនិយោគ ព្រមទាំងការលើកកម្ពស់ការការពារអ្នកប្រើប្រាស់ ការប្រកួតប្រជែងដោយស្មោះត្រង់ និងការធានាសុវត្ថិភាពផលិតផលទំនិញ។ ក្នុងនាមជាអ្នកដឹកនាំក្រសួង និងជាតំណាងដ៏ខ្ពង់ខ្ពស់របស់លោកជំទាវរដ្ឋមន្ត្រី ឯកឧត្តមរដ្ឋលេខាធិការប្រចាំការ បានផ្តល់អនុសាសន៍គន្លឹះដល់ប្រធានមន្ទីរពាណិជ្ជកម្មខេត្តស្វាយរៀងថ្មី ដោយផ្តោតលើការបង្កើនការផ្សព្វផ្សាយ និងតម្រង់ទិសដល់អ្នកវិនិយោគនិងរោងចក្រក្នុងតំបន់សេដ្ឋកិច្ចពិសេសទាំង១២ អំពីវិធានដើមកំណើតទំនិញ និងនីតិវិធីនៃការនាំចេញ, ជំរុញនិងលើទឹកចិត្តដល់ការកែច្នៃកសិផលសម្រាប់ការនាំចេញ ជាពិសេសទំនិញសក្តានុពលរបស់ខេត្ត រួមមាន៖ ស្រូវ ដំឡូងមី អំពៅ និងជ័រកៅស៊ូ ដើម្បីបង្កើតតម្លៃបន្ថែម និងបង្កើនប្រាក់ចំណូលផ្ទាល់ដល់ប្រជាកសិករ។ មុននឹងបញ្ចប់ ឯកឧត្តមរដ្ឋលេខាធិការប្រចាំការ បានលើកទឹកចិត្តដល់ថ្នាក់ដឹកនាំ និងមន្ត្រីរាជការនៃមន្ទីរពាណិជ្ជកម្មខេត្តស្វាយរៀង បន្តយកចិត្តទុកដាក់បំពេញតួនាទីនិងភារកិច្ចរបស់ខ្លួន ប្រកបដោយឆន្ទៈមោះមុត ក្រមសីលធម៌វិជ្ជាជីវៈ តម្លាភាព គណនេយ្យភាព និងស្មារតីទទួលខុសត្រូវខ្ពស់ ដើម្បីរួមចំណែកអភិវឌ្ឍសេដ្ឋកិច្ចនិងពាណិជ្ជកម្មនៅមូលដ្ឋាន ឱ្យកាន់តែរីកចម្រើនបន្ថែមទៀត ស្របតាមបេសកកម្មរបស់ក្រសួងពាណិជ្ជកម្ម និងចក្ខុវិស័យរបស់រាជរដ្ឋាភិបាល៕ … ភ្ជាប់មកកាន់ក្រសួងពាណិជ្ជកម្ម តាមតំណភ្ជាប់ខាងក្រោម៖ Connect with Ministry of Commerce: 🌐 Facebook 🌐 Telegram 🌐 Website 🌐 YouTube 🌐 X (Twitter)