柬埔寨中级艺术学校正式更名为国家艺术学校 旨在提升艺术教育标准

តើអ្នកដឹងទេ? ** «សាលាមធ្យមវិចិត្រសិល្បៈ» ផ្លាស់ប្តូរឈ្មោះទៅជា «សាលាជាតិវិចិត្រសិល្បៈ»** យោងតាមអនុក្រឹត្យរបស់រាជរដ្ឋាភិបាលកម្ពុជា ស្តីពី «ការរៀបចំនិងការប្រព្រឹត្តទៅរបស់ក្រសួងវប្បធម៌និងវិចិត្រសិល្បៈ» ចុះថ្ងៃទី២០​ ខែមេសា ឆ្នាំ២០២៦ បានផ្លាស់ប្តូរឈ្មោះ «សាលាមធ្យមវិចិត្រសិល្បៈ» ទៅជា «សាលាជាតិវិចិត្រសិល្បៈ»។ តាមរយៈអនុក្រឹត្យនេះ សាលាជាតិវិចិត្រសិល្បៈ ជាគ្រឹះស្ថានសិក្សាដែលមានភារកិច្ចរួមមាន៖ (១)អប់រំ និងបណ្តុះបណ្តាលធនធានមនុស្ស លើវិស័យសិល្បៈវប្បធម៌កម្រិតបឋម និងកម្រិតមធ្យមសិក្សាបច្ចេកទេស, (២)រៀបចំ និងអភិវឌ្ឍកម្មវិធីសិក្សាឱ្យសមស្របតាមស្តង់ដាជាតិសមត្ថភាព និងកម្រិតគុណវុឌ្ឍជាតិ ដើម្បីឆ្លើយតបទៅនឹងកំណើនសេដ្ឋកិច្ច និងតម្រូវការទីផ្សារការងារ, (៣)រៀបចំយន្តការជ្រើសរើសសិស្សចូលរៀនមុខជំនាញសិល្បៈ តាមឧបនិស្ស័យ និងលើកទឹកចិត្តសិស្ស ឱ្យរៀនចប់សព្វគ្រប់នូវកម្មវិធីសិក្សា, (៤)សិក្សាស្រាវជ្រាវ ចងក្រង និងតម្កល់ឯកសារវិធីសាស្ត្របង្រៀន និងឯកសារបច្ចេកទេសសិល្បៈ, (៥)សម្របសម្រួល និងសហប្រតិបត្តិការជាមួយគ្រឹះស្ថានសិក្សាជាតិ និងអន្តរជាតិ អង្គការអន្តរជាតិ អង្គការមិនមែនរដ្ឋាភិបាល និងស្ថាប័នពាក់ព័ន្ធ ដើម្បីធ្វើឱ្យប្រសើរឡើងនូវការអប់រំបច្ចេកទេស និងវិជ្ជាជីវៈសិល្បៈ, (៦)សហការរៀបចំផែនការអភិវឌ្ឍសាលាជាតិ និងកសាងសមត្ថភាព ក៏ដូចជាធ្វើវិក្រឹត្យការមន្ត្រីរាជការ បុគ្គលិកជំនាញបច្ចេកទេស និងគ្រូបង្រៀន តាមសំណូមពរជាក់ស្តែង សម្រាប់បម្រើការបណ្តុះបណ្តាលប្រកបដោយគុណភាព, (៧)សហការ និងសម្របសម្រួលជាមួយមន្ទីរវប្បធម៌និងវិចិត្រសិល្បៈរាជធានី ខេត្ត និងស្ថាប័នពាក់ព័ន្ធ ក្នុងការរៀបចំផែនការអភិវឌ្ឍ និងការកសាងសមត្ថភាពគ្រូបង្រៀន សម្រាប់កិច្ចដំណើរការសាលាវិចិត្រសិល្បៈភូមិភាគ, (៧)កែលម្អហេដ្ឋារចនាសម្ព័ន្ធ និងសម្ភារៈរូបវន្តសម្រាប់បម្រើការបណ្តុះបណ្តាលបច្ចេកទេសសិល្បៈប្រកបដោយគុណភាពពិតប្រាកដ, (៨)គ្រប់គ្រងការងាររដ្ឋបាល ធនធានមនុស្ស និងហិរញ្ញវត្ថុរបស់សាលាក្នុងក្របខ័ណ្ឌនៃការអនុវត្តភារកិច្ច ធ្វើរបាយការណ៍ស្តីពី សកម្មភាពការងាររបស់សាលាជាតិវិចិត្រសិល្បៈប្រចាំខែ ត្រីមាស ឆមាស នព្វមាស និងប្រចាំឆ្នាំជូនថ្នាក់ដឹកនាំ និង (៩)អនុវត្តភារកិច្ចផ្សេងទៀតតាមការប្រគល់ពីរដ្ឋមន្ត្រី ឬរដ្ឋលេខាធិការ ឬអនុរដ្ឋលេខាធិការទទួលបន្ទុក។ សូមជម្រាបថា សាលា​មធ្យម​វិចិត្រសិល្បៈ ជា​គ្រឹះស្ថាន​រដ្ឋ​ដ៏​ធំ​តែមួយគត់​នៅក្នុង​ប្រទេស​កម្ពុជា ដែល​បណ្ដុះបណ្ដាល​មូលដ្ឋានគ្រឹះ​ផ្នែក​សិល្បៈ  និងដើរតួនាទី​យ៉ាងសំខាន់​ក្នុងការ​ថែរក្សា ការពារ បណ្ដុះបណ្ដាល និង​ផ្ទេរ​ចំណេះដឹង​ផ្នែក​សិល្បៈ​អត្តសញ្ញាណ​ជាតិ ក៏ដូចជា​សីលធម៌​ក្នុងការ​រស់នៅ ទៅដល់​ពន្លក​ទំពាំង​។ មាន​បង្រៀន​សិល្បៈ​ច្រើន​ជំនាញ គ្រឹះស្ថាន​មធ្យមសិក្សា​វិចិត្រសិល្បៈ មាន​៥​សាលា​ធំៗ​នៅក្នុង​នោះ រួមមាន សាលា​របាំ សាលា​តូរ្យតន្ត្រី សាលា​សៀក សាលា​សូន​រូប និង​សាលា​ល្ខោន​៕