中国广西遭遇台风洪灾 应急响应提升至二级

អាជ្ញាធរចិនបានប្រកាសកាលពីថ្ងៃចន្ទថា ឥទ្ធិពលនៃព្យុះទីហ្វុង ម៉ៃសាក់ (Maysak) បានបង្កឱ្យមានភ្លៀងធ្លាក់ខ្លាំង រហូតធ្លាយទំនប់អាងស្តុកទឹកមួយចំនួន នៅក្នុងទីក្រុងណាននីង នៃតំបន់ស្វយ័តក្វាងស៊ី ភាគខាងត្បូងប្រទេសចិន។ គ្រោះទឹកជំនន់នេះបានបណ្តាលឱ្យមនុស្សយ៉ាងហោចណាស់ ២នាក់ស្លាប់ ប៉ះពាល់ពលរដ្ឋ ៥៥,០០០នាក់ និង ៤៨,០០០នាក់ផ្សេងទៀតត្រូវបានជម្លៀសទៅកាន់ទីទួលសុវត្ថិភាព ខណៈទឹកទន្លេចំនួន ៥៩ បានហក់ឡើងហួសកម្រិតប្រកាសអាសន្ន។ បើទោះបីជាទឹកជំនន់ចាប់ផ្តើមស្រកចុះបន្តិចវិញនៅយប់ថ្ងៃចន្ទក៏ដោយ ប៉ុន្តែវិធានការព្រមានជាមុន និងការជម្លៀសពលរដ្ឋបន្ថែមនៅតែបន្តធ្វើឡើងយ៉ាងសកម្ម។ ជាការឆ្លើយតបបន្ទាន់ ក្រសួងគ្រប់គ្រងគ្រោះអាសន្នចិនបានបញ្ជាក់កាលពីថ្ងៃចន្ទថា រដ្ឋាភិបាលកណ្តាលបានបែងចែកសម្ភារសង្គ្រោះបន្ទាន់ចំនួន ១៥០,០០០មុខ ទៅកាន់តំបន់ក្វាងស៊ី ដើម្បីជួយគាំទ្រដល់កិច្ចការងារសង្គ្រោះ ក្រោយពេលទឹកជំនន់បានវាយប្រហារលើក្រុងណាននីង ក៏ដូចជាតំបន់ក្បែរខាងដូចជាក្រុងគុយហ្គាង (Guigang)។ ក្រសួងធនធានទឹកចិនបាន ដំឡើងកម្រិតឆ្លើយតបអាសន្នចំពោះការគ្រប់គ្រងទឹកជំនន់សម្រាប់តំបន់ក្វាងស៊ី ពីកម្រិតទី៣ (Level III) ទៅកាន់កម្រិតទី២ (Level II)៕