缅甸自杀式无人机坠入泰国 爆炸致3死2伤 边境局势紧张

🚨ដ្រូនអត្តឃាតមីយ៉ាន់ម៉ា ហោះចូលដី ថៃ ផ្ទុះស្លាប់ ពលរដ្ឋ ៣នាក់ និងរបួសធ្ងន់ ២នាក់ទៀត ដ្រូនអត្តឃាតមួយគ្រឿង ដែលហោះពីប្រទេសមីយ៉ាន់ម៉ា ចូលទឹកដីរបស់ថៃ បានផ្ទុះ បណ្តាលឲ្យពលរដ្ឋថៃ ៣នាក់ស្លាប់ និង ២នាក់ទៀត រងរបួសធ្ងន់។ តាមការផ្សាយរបស់ Amarin, ហេតុការណ៍នេះ កើតឡើងនៅរសៀលថ្ងៃអង្គារ ទី២ ខែមិថុនា ឆ្នាំ២០២៦ ក្នុងស្រុក Phop Phra ខេត្ត Tak ជាប់ព្រំដែនមីយ៉ាន់ម៉ា ដែលកំពុងមានការប្រយុទ្ធគ្នា យ៉ាងស្វិតស្វាញ រវាងកងកម្លាំងប្រឆាំង និងទាហានរបស់រដ្ឋាភិបាល។ យោងតាមរបាយការណ៍ ដ្រូនមួយគ្រឿងនេះ បានហោះពីខាងមីយ៉ាន់ម៉ា ហើយក៏ធ្លាក់ក្បែរដើមឈើមួយដើម ក្នុងចម្ការម្ទេសនៃភូមិ Moo 1 ប៉ុន្តែវាមិនបានផ្ទុះភ្លាមៗទេ។ នៅពេលឃើញដ្រូននេះ គ្រួសារមួយបាននាំគ្នាទៅមើល រួចយកដៃប៉ះ ក៏ធ្វើឲ្យដ្រូនផ្ទុះ ស្លាប់មនុស្ស ៣នាក់នៅនឹងកន្លែង រួមមានឪពុកម្តាយ និងកូនប្រុស ខណៈមនុស្ស ២នាក់ទៀតរងរបួសធ្ងន់។ តាមការពិនិត្យ អាជ្ញាធរថៃ សន្និដ្ឋានថា ដ្រូននេះគឺហោះវង្វេង មកពីខាងមីយ៉ាន់ម៉ា ដោយមានផ្ទុកគ្រាប់បែកនៅក្នុងនោះផង។ ទោះបីជាយ៉ាងណា ភ្លាមៗ ថៃ មិនទាន់មានប្រតិកម្មអ្វីជាមួយមីយ៉ាន់ម៉ាទេ ដោយគ្រាន់តែអះអាងថា ខ្លួនកំពុងបើកការស៊ើបអង្កេត៕ ប្រភព៖ កោះសន្តិភាព