柬埔寨旅游部与TNAOT News合作 6月起对华免签14天

[English Below] ក្រសួងទេសចរណ៍ និងសារព័ត៌មាន TNAOT News នឹងចុះអនុស្សរណៈនៃការយោគយល់គ្នា (MoU) លើកិច្ចសហប្រតិបត្តិការទេសចរណ៍ ដើម្បីផ្សព្វផ្សាយសក្តានុពលទេសចរណ៍ និងកាលានុវត្តភាពវិនិយោគ របស់កម្ពុជាទៅកាន់ឆាកអន្តរជាតិ និងប្រទេសចិន ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកស្រី ហាន លី (Doris) អគ្គនាយិកាក្រុមហ៊ុន TNAOT News និងសហការី ចូលជួបសម្តែងករគួរសម និងពិភាក្សាការងារលើការពង្រឹងកិច្ចសហប្រតិបត្តិការទេសចរណ៍ និងការផ្សព្វផ្សាយកិត្តិនាមកម្ពុជាទៅដល់បណ្តាប្រទេសនានា ជាពិសេសប្រទេសចិន។ ក្នុងកិច្ចជំនួបពិភាក្សានេះ លោកស្រី ហាន លី បានរាយការណ៍អំពីលទ្ធផលការងារកន្លងមករបស់សារព័ត៌មាន TNAOT News ក្នុងការចូលរួមផ្សព្វផ្សាយវិស័យទេសចរណ៍ វប្បធម៌ និងកាលានុវត្តភាពវិនិយោគរបស់កម្ពុជា ទៅកាន់ប្រជាជនចិន និងអន្តរជាតិ តាមរយៈសារព័ត៌មានពីរភាសា (ខ្មែរ-ចិន) និងបណ្តាញសង្គមផ្លូវការជាច្រើនទាំងនៅកម្ពុជា និងប្រទេសចិន ក្នុងនាមជាស្ថាប័នផ្សព្វផ្សាយព័ត៌មាន និងអ្នកផលិតវីដេអូឯកសារទេសចរណ៍ មាតិកាកម្សាន្តផ្សេងៗ ដែលផ្សព្វផ្សាយគោលដៅទេសចរណ៍របស់កម្ពុជា។ ទន្ទឹមនឹងនេះ ភាគីក្រុមហ៊ុន ក៏បានរាយការណ៍អំពីការចូលរួមរៀបចំព្រឹត្តិការណ៍ផ្សព្វផ្សាយសក្តានុពលទេសចរណ៍ និងកាលានុវត្តភាពវិនិយោគរបស់កម្ពុជាជាច្រើននាពេលកន្លងមក និងបានស្នើសុំចុះអនុស្សរណៈនៃការយោគយល់គ្នាជាមួយក្រសួងទេសចរណ៍ផងដែរ។ ជាកិច្ចឆ្លើយតប ឯកឧត្តមរដ្ឋមន្ត្រី បានកោតសរសើរ វាយតម្លៃខ្ពស់ និងថ្លែងអំណរគុណចំពោះការចូលរួមយ៉ាងសកម្មរបស់សារព័ត៌មាន TNAOT News ក្នុងការអភិវឌ្ឍ និងផ្សព្វផ្សាយវិស័យទេសចរណ៍កម្ពុជាកន្លងមក។ ទន្ទឹមនឹងនេះដែរ ឯកឧត្តមរដ្ឋមន្ត្រី ក៏បានស្នើសារព័ត៌មានបន្តជួយផ្សព្វផ្សាយស្ថានភាពពិតរបស់កម្ពុជា ជាពិសេសស្ថិរភាពនយោបាយ សន្តិសុខ សុវត្ថិភាព និងសកម្មភាពបង្ក្រាបបទឧក្រិដ្ឋកម្មអនឡាញ ដែលរាជរដ្ឋាភិបាលកម្ពុជាកំពុងអនុវត្តយ៉ាងម៉ឺងម៉ាត់ និងជាប់ជាប្រចាំ ព្រមទាំងបន្តសហការផ្សព្វផ្សាយឱ្យបានទូលំទូលាយអំពីយុទ្ធនាការលើកលែងទិដ្ឋាការសម្រាប់ប្រជាជនចិន ក្នុងដំណាក់កាលសាកល្បង ដើម្បីជំរុញកំណើនភ្ញៀវទេសចរចិនមកកម្ពុជា ក្នុងរដូវកាលបៃតង និងបង្កើនទំនុកចិត្តរបស់ភ្ញៀវទេសចរ និងវិនិយោគិនចិនមកកម្ពុជា ព្រមទាំងការផ្សព្វផ្សាយកាលានុវត្តភាពវិនិយោគរបស់កម្ពុជា និងទាក់ទាញវិនិយោគិនចិនពីបណ្តាខេត្ត និងតំបន់ឧស្សាហកម្មនានារបស់ប្រទេសចិន មកវិនិយោគនៅកម្ពុជា ជាពិសេសក្នុងវិស័យទេសចរណ៍។ សូមជម្រាបផងដែរថា ក្នុងឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិប្រមាណ ៥,៥៧ លាននាក់ ក្នុងនោះភ្ញៀវទេសចរចិនមានជាង ១,២ លាននាក់ កើនឡើងជិត៤២% និងស្ថិតក្នុងលំដាប់ទី២ នៃភ្ញៀវទេសចរអន្តរជាតិមកកម្ពុជា។ ដោយឡែក ក្នុងរយៈពេល៤ខែដំបូងនៃឆ្នាំ២០២៦ កម្ពុជាទទួលបានភ្ញៀវទេសចរចិនជាង ២៤ម៉ឺននាក់ ឈរនៅលំដាប់ទី១។ គួរបញ្ជាក់ផងដែរថា រាជរដ្ឋាភិបាលកម្ពុជា បានសម្រេចផ្តល់ការលើកលែងទិដ្ឋាការសម្រាប់ប្រជាជនចិន ដែលអាចស្នាក់នៅកម្ពុជាបានរយៈពេល១៤ថ្ងៃ ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ដើម្បីទាក់ទាញភ្ញៀវទេសចរចិនមកកម្ពុជាកាន់តែច្រើនក្នុងរដូវកាលបៃតង។ រាជធានីភ្នំពេញ ថ្ងៃទី១២ ខែឧសភា ឆ្នាំ២០២៦។