柬埔寨商务部与私营部门探讨胡椒国家政策草案

(ភ្នំពេញ)៖ នាព្រឹកថ្ងៃពុធ ទី១៦ ខែកញ្ញា ឆ្នាំ២០២៦ នៅសណ្ឋាគារ Baitong Hotel & Resort ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារបច្ចេកទេស និងលោក Bryan Fornari ប្រធានផ្នែកសហប្រតិបត្តិការនៃប្រតិភូសហភាពអឺរ៉ុបប្រចាំកម្ពុជា (EUD) បានអញ្ជើញចូលរួមជាគណៈអធិបតីក្នុង «សិក្ខាសាលាពិគ្រោះយោបល់ជាមួយវិស័យឯកជនលើការរៀបចំសេចក្តីព្រាងគោលនយោបាយជាតិស្តីពីម្រេច»។ សិក្ខាសាលានេះរៀបចំឡើងក្នុងគោលបំណងពិនិត្យ ពិភាក្សា និងប្រមូលធាតុចូលបន្ថែមពីវិស័យឯកជន ជាពិសេសលើការកំណត់នូវបញ្ហាប្រឈម ឱកាស និងសំណូមពរ ដើម្បីជាធាតុចូលក្នុងការរៀបចំសេចក្តីព្រាងគោលនយោបាយនេះឱ្យកាន់តែមានភាពពេញលេញ ច្បាស់លាស់ និងគ្រប់ជ្រុងជ្រោយ ព្រមទាំងមានការអញ្ជើញចូលរួមពីមន្ត្រីតំណាងក្រសួងពាណិជ្ជកម្ម តំណាងគម្រោង EU-German CAPSAFE សហព័ន្ធម្រេច និងគ្រឿងទេសកម្ពុជា សមាគម/សហគមន៍ម្រេច ក្រុមហ៊ុននាំចេញ សហគ្រាសកែច្នៃ និងមន្ត្រីកសិកម្មមកពីខេត្តកំពត និងខេត្តត្បូងឃ្មុំ ជាច្រើនរូប។ ថ្លែងក្នុងពិធីបើកសិក្ខាសាលានេះ ឯកឧត្តមរដ្ឋលេខាធិការ បានលើកឡើងពីសារៈសំខាន់នៃការរៀបចំគោលនយោបាយម្រេចកម្ពុជានេះ ដែលនឹងក្លាយទៅជាផែនទីបង្ហាញផ្លូវដ៏សំខាន់ក្នុងការកំណត់ទិសដៅឱ្យបានច្បាស់លាស់សម្រាប់កម្ពុជា ដើម្បីទាញយកអត្ថប្រយោជន៍ពីផលិតកម្មម្រេច តាមរយៈការបង្កើតតម្លៃបន្ថែមនៅក្នុងខ្សែច្រវាក់តម្លៃ ជួយបង្កើនប្រាក់ចំណូលកសិករនៅតាមតំបន់ជនបទ និងជំរុញការនាំចេញម្រេចកម្ពុជាទៅកាន់ទីផ្សារអន្តរជាតិ ជាពិសេសទីផ្សារសហភាពអឺរ៉ុប។ ជាមួយគ្នានេះ ឯកឧត្តមរដ្ឋលេខាធិការ បានថ្លែងអំណរគុណដល់តំណាងភាគីពាក់ព័ន្ធទាំងអស់ ដែលបានចូលរួមពិភាក្សា និងផ្តល់យោបល់យ៉ាងផុសផុល ដែលជាធាតុចូលបន្ថែម ដើម្បីឱ្យការរៀបចំសេចក្តីព្រាងគោលនយោបាយជាតិស្តីពីម្រេចនេះ កាន់តែគ្រប់ជ្រុងជ្រោយ និងមានប្រសិទ្ធភាពក្នុងការអនុវត្ត៕ … ភ្ជាប់មកកាន់ក្រសួងពាណិជ្ជកម្ម តាមតំណភ្ជាប់ខាងក្រោម៖ Connect with Ministry of Commerce: 🌐 [Facebook ](https://web.facebook.com/moc.gov.kh) 🌐 [Telegram](https://t.me/mocnewsfeed) 🌐 [Website](https://www.moc.gov.kh/) 🌐 [YouTube](https://www.youtube.com/@mocgovkhcambodia) 🌐 [X (Twitter](https://twitter.com/MoCCambodia))