柬埔寨青年联合会接待新加坡青年代表团 开展为期3天交流

សូមស្វាគមន៍យ៉ាងកក់ក្ដៅចំពោះគណៈប្រតិភូយុវជន YLC នៃសមាគមប្រជាជនសិង្ហបុរី (People’s Association Singapore) ក្នុងឱកាសអញ្ជើញមកទស្សនកិច្ចសិក្សានៅព្រះរាជាណាចក្រកម្ពុជា ក្នុងដំណើរទស្សនកិច្ចរយៈពេល៣ថ្ងៃ គណៈប្រតិភូនឹងចុះជួប និងស្វែងយល់ពីសកម្មភាពរបស់យុវជន នៅសហគមន៍នានា។ ដោយឡែក នាថ្ងៃទី០១ ខែឧសភា ឆ្នាំ២០២៦នេះ គណៈប្រិភូបានចូលជួបពិភាក្សាការងារ ជាមួយ ក្រុមការងារ ស.ស.យ.ក. រាជធានីភ្នំពេញ ដែលដឹកនាំដោយឯកឧត្តម គង់ ច័ន្ទវាសនា សមាជិកគណៈកម្មាធិការកណ្តាល និងជាអនុប្រធាន ស.ស.យ.ក. រាជធានីភ្នំពេញ នៅទីស្នាក់ការ ស.ស.យ.ក រាជធានីភ្នំពេញ។ ក្នុងឱកាសដ៏មានន័យនេះ គណៈប្រតិភូទាំងពីរបានចូលរួមសិក្សា ស្វែងយល់ និងផ្លាស់ប្តូរយោបល់អំពីវប្បធម៌ ប្រពៃណី និងបរិបទសង្គមរបស់ប្រទេសទាំងពីរ តាមរយៈបទបង្ហាញ និងការចែករំលែកបទពិសោធន៍ជាក់ស្តែង។ កិច្ចពិភាក្សានេះបានរួមចំណែកយ៉ាងសំខាន់ក្នុងការលើកកម្ពស់ការយល់ដឹង ការគោរពគ្នាទៅវិញទៅមក និងការកសាងទំនាក់ទំនងរឹងមាំរវាងយុវជននៃប្រទេសទាំងពីរ។ គួរបញ្ជាក់ថា ដំណើរទស្សនកិច្ចរបស់គណៈប្រតិភូយុវជននៃសមាគមប្រជាជនសិង្ហបុរីនេះ គឺជាផ្នែកមួយនៃការអនុវត្តអនុស្សារណៈនៃការយោគយល់គ្នា (MoU) រវាង សហភាពសហព័ន្ធយុវជនកម្ពុជា និងសមាគមប្រជាជនសិង្ហបុរី ដែលបានចាប់ផ្តើមអនុវត្តតាំងពីឆ្នាំ២០១៣មក។ តាមរយៈកិច្ចសហប្រតិបត្តិការដ៏មានអត្ថន័យនេះ ស្ថាប័នទាំងពីរបានអនុវត្តសកម្មភាពជាច្រើន រួមមានការផ្លាស់ប្តូរទស្សនកិច្ច ការបណ្តុះបណ្តាល កម្មវិធីអភិវឌ្ឍសមត្ថភាព និងសកម្មភាពសង្គមផ្សេងៗ សម្រាប់ទាំងថ្នាក់ដឹកនាំ និងយុវជនជាប្រចាំ។ ដំណើរទស្សនកិច្ចនេះមិនត្រឹមតែជាឱកាសសម្រាប់ការសិក្សា និងបង្កើនចំណេះដឹងប៉ុណ្ណោះទេ ប៉ុន្តែថែមទាំងជាស្ពានភ្ជាប់មិត្តភាព និងការសហការយូរអង្វែង រវាងយុវជននៃប្រទេសកម្ពុជា និងសិង្ហបុរីក្នុងអនាគតផងដែរ។ **👉🏽តំណភ្ជាប់ទៅកាន់បណ្តាញសង្គមរបស់ ស.ស.យ.ក. **🌐 [**uyfc.org**](https://www.uyfc.org/)** **📱 [**Facebook**](https://www.facebook.com/uyfccambodia)** **📱 [**YouTube**](https://www.youtube.com/@unionofyouthfederationcambodia)** **📱 [**Telegram**](https://t.me/uyfc_news)** **📱** **[**TikTok**](https://www.tiktok.com/@uyfccambodia?_t=8fUJ9WcjHX8)