柬埔寨劳工部举办全球催化剂路线图技术咨询研讨会

ក្រសួងការងារ និងបណ្តុះបណ្តាលវិជ្ជាជីវៈ រៀបចំសិក្ខាសាលាពិគ្រោះយោបល់បច្ចេកទេសលើក្របខណ្ឌតាមដាន និងវាយតម្លៃផែនទីបង្ហាញផ្លូវកាតាលីករសកល ដើម្បីជំរុញការងារសមរម្យ និងការគាំពារសង្គមនៅកម្ពុជា (ភ្នំពេញ)៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ និងជាអនុប្រធានប្រចាំការនៃក្រុមការងារ ក.ផ.ក.អ. តំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញជាអធិបតីក្នុងពិធីបើក «សិក្ខាសាលាពិគ្រោះយោបល់បច្ចេកទេស ស្តីពីក្របខណ្ឌតាមដាន ត្រួតពិនិត្យ និងវាយតម្លៃផែនទីបង្ហាញផ្លូវរបស់កម្ពុជាសម្រាប់កាតាលីករសកលស្តីពីការងារសមរម្យ និងការគាំពារសង្គមសម្រាប់អន្តរកាលយុត្តិធម៌» ដែលប្រារព្ធឡើងនៅសណ្ឋាគារ Fairfield by Marriott ភ្នំពេញ នាថ្ងៃទី៧ ខែមេសា ឆ្នាំ២០២៦ ដោយមានការចូលរួមពីទីភ្នាក់ងារអង្គការសហប្រជាជាតិ ដៃគូអភិវឌ្ឍន៍ ព្រមទាំងថ្នាក់ដឹកនាំ និងមន្ត្រីបច្ចេកទេសមកពីក្រសួង-ស្ថាប័នពាក់ព័ន្ធ តំណាងភាគីនិយោជក កម្មករនិយោជិត និងអង្គការសង្គមស៊ីវិល ក្នុងគោលបំណងពិនិត្យ និងកែលម្អក្រខ័ណ្ឌតាមដាន និងវាយតម្លៃ (RMF) នៃផែនទីបង្ហាញផ្លូវកាតាលីករសកល ដើម្បីជំរុញការងារសមរម្យ និងការគាំពារសង្គមនៅកម្ពុជា។ លោកជំទាវរដ្ឋលេខាធិការប្រចាំការ បានថ្លែងបើកអង្គសិក្ខាសាលា ដោយបានគូសបញ្ជាក់ថា កម្ពុជាបានចូលរួមជា «ប្រទេសត្រួសត្រាយផ្លូវ» នៅចុងឆ្នាំ២០២៣ និងអនុវត្តផែនទីបង្ហាញផ្លូវ ២០២៥-២០២៨ ដោយផ្តោតលើសេដ្ឋកិច្ចក្រៅប្រព័ន្ធ ជំនាញ និងការគាំពារសង្គម មានគោលដៅយុទ្ធសាស្ត្រ ៥ សំខាន់ៗរួមមាន ការអនុម័តគោលនយោបាយម៉ាក្រូសេដ្ឋកិច្ចគាំទ្រការបង្កើតការងារ ការអភិវឌ្ឍជំនាញ ការពង្រីកការគាំពារសង្គមឆ្ពោះទៅការគ្របដណ្តប់សុខភាពជាសកល ការជំរុញសេដ្ឋកិច្ចក្នុងប្រព័ន្ធ និងការបង្កើតបរិយាកាសទីផ្សារការងារប្រកបដោយបរិយាបន្ន។ ជាមួយគ្នានេះ លោកជំទាវ សុវណ្ណ វណ្ណារតន៍ បានថ្លែងអំណរគុណយ៉ាងជ្រាលជ្រៅចំពោះលេខាធិការដ្ឋាន ក.ផ.ក.អ. ទីភ្នាក់ងារអង្គការសហប្រជាជាតិ ដៃគូអភិវឌ្ឍន៍ និងគ្រប់ភាគីពាក់ព័ន្ធទាំងអស់ដែលបានខិតខំប្រឹងប្រែងសហការរៀបចំឯកសារ និងសិក្ខាសាលានេះឡើង។ លោកជំទាវសង្ឃឹមយ៉ាងមុតមាំថា លទ្ធផលដែលទទួលបានពីកិច្ចពិភាក្សានេះ នឹងក្លាយជាមូលដ្ឋានគ្រឹះដ៏រឹងមាំសម្រាប់ជំរុញការអនុវត្តផែនទីបង្ហាញផ្លូវរបស់កម្ពុជាឱ្យសម្រេចបានជោគជ័យតាមការរំពឹងទុក ក្នុងគោលដៅលើកកម្ពស់ជីវភាពប្រជាពលរដ្ឋ និងអភិវឌ្ឍសេដ្ឋកិច្ចជាតិឱ្យកាន់តែរីកចម្រើនរឹងមាំបន្ថែមទៀត៕ #MLVT #HENGSour