洪玛尼出席第六届柬埔寨4.0论坛 探讨AI对就业影响

នារសៀលថ្ងៃទី២ ខែកញ្ញា ឆ្នាំ២០២៦ ឯកឧត្តម ហ៊ុន ម៉ានី ប្រធានក្រុមប្រឹក្សាភិបាល នៃមជ្ឈមណ្ឌលកម្ពុជា ៤.០ និងជាប្រធានសហភាពសហព័ន្ធយុវជនកម្ពុជា បានអញ្ជើញចូលរួមជាអធិបតីក្នុង «វេទិកាកម្ពុជា ៤.០ លើកទី៦» ស្តីពី «ឥទ្ធិពលនៃ AI លើទីផ្សារការងារ និងអនាគតនៃការងារ» ដែលប្រព្រឹត្តទៅនៅអគារ The Kampus ។ វេទិកានេះមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាតំណាងមកពីក្រសួង-ស្ថាប័ន វិស័យឯកជន អង្គការមិនមែនរដ្ឋាភិបាល សមាគមពាក់ព័ន្ធ គ្រឹះស្ថានអប់រំនានា ប្អូនៗនិស្សិត និងសមាជិក សមាជិកា ស.ស.យ.ក.។ ជាកិច្ចចាប់ផ្ដើម ឯកឧត្តម អាំង សុវណ្ណរ័ត្ន នាយកប្រតិបត្តិនៃមជ្ឈមណ្ឌលកម្ពុជា ៤.០ បានធ្វើការស្វាគមន៍យ៉ាងកក់ក្តៅចំពោះ ឯកឧត្តម លោកជំទាវ លោក លោកស្រី ជាតំណាងមកពីក្រសួង-ស្ថាប័ន វិស័យឯកជន អង្គការមិនមែនរដ្ឋាភិបាល សមាគមពាក់ព័ន្ធ គ្រឹះស្ថានអប់រំនានា ប្អូនៗនិស្សិត និងសមាជិក សមាជិកា ស.ស.យ.ក. ដែលបានចំណាយពេលវេលាដ៏មានតម្លៃចូលរួមក្នុងព្រឹត្តិការណ៍នាថ្ងៃនេះ។ បន្ថែមលើនេះ ឯកឧត្តមនាយកប្រតិបត្តិ ក៏បានធ្វើការរាយការណ៍អំពីសមិទ្ធផល និងវឌ្ឍនភាពការងារចម្បងៗដែលមជ្ឈមណ្ឌលកម្ពុជា ៤.០ សម្រេចបាននាពេលកន្លងមក ព្រមទាំងបានគូសបញ្ជាក់អំពីសារៈសំខាន់នៃការរៀបចំ «វេទិកាកម្ពុជា ៤.០ លើកទី៦» ក្រោមប្រធានបទ «ឥទ្ធិពលនៃ AI លើទីផ្សារការងារ និងអនាគតនៃការងារ»។ ប្រសាសន៍ទៅកាន់អង្គពិធី ឯកឧត្តម ហ៊ុន ម៉ានី បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារពាក់ព័ន្ធដែលបានរៀបចំជា«វេទិកាកម្ពុជា ៤.០ លើកទី៦» ស្តីពី «ឥទ្ធិពលនៃ AI លើទីផ្សារការងារ និងអនាគតនៃការងារ» ទៅកាន់អ្នកចូលរួមនាឱកាសនោះ។ ជាមួយគ្នានោះ ឯកឧត្តម ហ៊ុន ម៉ានី បានគូសបញ្ជាក់ថាសកម្មភាពការងារនេះ បានចូលរួមចំណែកយ៉ាងសំខាន់ ក្នុងការអភិវឌ្ឍមូលធនមនុស្សនៅកម្ពុជា ឱ្យក្លាយទៅជាពលរដ្ឋឌីជីថល ជាពិសេសការអភិវឌ្ឍសមត្ថភាព យុវជនឱ្យមានចំណេះដឹង និងជំនាញឌីជីថល គំនិតច្នៃប្រឌិត និងភាពបត់បែន ដើម្បីអាចចូលរួមបានយ៉ាងពេញលេញ នៅក្នុងដំណើរការនៃការជំរុញ បរិវត្តកម្មឌីជីថលនៅកម្ពុជា។ នាឱកាសនោះ ឯកឧត្តមប្រធាន ក៏បានចែករំលែកនូវទស្សនៈជាធាតុចូលមួយចំនួនជូនទៅកាន់អង្គវេទិកាផងដែរ ដោយបានលើកទឹកចិត្តឱ្យចូលរួមផ្សព្វផ្សាយបន្តអំពីខ្លឹមសារនៃអង្គវេទិកានេះ ដល់សាធារណជន និងភាគីពាក់ព័ន្ធ សំដៅជំរុញការត្រៀមខ្លួនរបស់កម្លាំងពលកម្មកម្ពុជា ឱ្យអាចបត់បែន សម្របខ្លួន និងរក្សាបាននូវភាពប្រកួតប្រជែងរបស់ខ្លួន។ កិច្ចខិតខំប្រឹងប្រែងរួមគ្នានេះ គឺជាកម្លាំងចលករដ៏មានសារៈសំខាន់មួយ ក្នុងការកសាងគ្រឹះសេដ្ឋកិច្ច និងសង្គមឌីជីថលនៅកម្ពុជា ដែលជាមូលដ្ឋានក្នុងការជួយជំរុញល្បឿននៃការឈានទៅសម្រេចបានចក្ខុវិស័យវែងឆ្ងាយនៃការអភិវឌ្ឍកម្ពុជា។