洪森嘲讽批评者未读新书 强调三角战略历史意义

សម្តេចតេជោ ហ៊ុន សែន ចំអកអ្នករិះគន់សៀវភៅស្តីពីយុទ្ធសាស្ត្រត្រីកោណ និងលើកឡើងពីការផ្សាយបន្តរបស់សារព័ត៌មានថៃមួយចំនួន សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានចេញសារលើបណ្តាញសង្គមហ្វេសប៊ុក ដោយសម្តែងការហួសចិត្តចំពោះការរិះគន់សៀវភៅស្តីពី «យុទ្ធសាស្ត្រត្រីកោណ» ដែលនិពន្ធដោយលោក អៀង ពិសី ដោយលើកឡើងថា អ្នករិះគន់មួយចំនួនបានចោទប្រកាន់ថា សៀវភៅនេះក្លែងបន្លំ បំភ្លៃ ឬកុហកប្រវត្តិសាស្ត្រ ទាំងដែលមិនទាន់បានអានសៀវភៅនៅឡើយ។ តាមសំណេររបស់សម្តេចតេជោ សៀវភៅដែលមានកម្រាស់ ១.១១១ ទំព័រនេះ រៀបរាប់អំពីយុទ្ធសាស្ត្រត្រីកោណ ដែលសម្តេចបានដាក់ចេញឱ្យអនុវត្តនៅថ្ងៃទី២ ខែធ្នូ ឆ្នាំ១៩៩៨ ក្នុងសម័យប្រជុំដំបូងនៃគណៈរដ្ឋមន្ត្រីថ្មី នីតិកាលទី២ នៃរដ្ឋសភា។ សៀវភៅនេះត្រូវបានផ្សព្វផ្សាយដោយបញ្ញវន្តវ័យក្មេងចំនួន ៤នាក់ ដែលជាមន្ត្រីបម្រើការនៅព្រឹទ្ធសភា កាលពីប៉ុន្មានថ្ងៃមុន។ សម្តេចតេជោបានចំអកចំពោះអ្នកដែលសម្តេចហៅថា «ក្រុមជ្រុលនិយម» ដោយលើកឡើងថា ការប្រឆាំងនឹងសៀវភៅទាំងដែលមិនទាន់បានអាន បង្ហាញពីការប្រឆាំងគ្រប់រឿង រួមទាំងរឿងដែលខ្លួនមិនទាន់បានដឹងច្បាស់ផងដែរ។ ជាមួយគ្នានេះ សម្តេចតេជោក៏បានលើកឡើងពីការផ្សាយបន្តរបស់សារព័ត៌មានថៃមួយចំនួន ចំពោះការរិះគន់សៀវភៅនេះ ដោយសម្តែងការហួសចិត្ត និងចោទជាសំណួរថា តើមានការសហការរវាងក្រុមដែលសម្តេចហៅថា «ជ្រុលនិយមខ្មែរ» ជាមួយសារព័ត៌មានថៃមួយចំនួនដែរឬទេ។ នៅចុងបញ្ចប់នៃសំណេរ សម្តេចតេជោបានថ្លែងអំណរគុណដល់សារព័ត៌មានថៃមួយចំនួន ដែលសម្តេចលើកឡើងថា តែងតែជួយផ្សព្វផ្សាយព័ត៌មានពាក់ព័ន្ធនឹងសម្តេច រួមទាំងរឿងរ៉ាវដែលសម្តេចបានលើកឡើងដោយប្រើពាក្យប្រៀបធៀបថា «ឆ្កែបានជិះរទេះ» ផងដែរ៕