洪玛尼会见柬埔寨旅游协会 探讨提升旅游接待服务质量

[ឯកឧត្តមឧបនាយករដ្ឋមន្រ្តី ហ៊ុន ម៉ានី ទទួលជួបសមាគមទេសចរណ៍កម្ពុជា ដើម្បីពិភាក្សាការងារជំរុញវិស័យទេសចរណ៍ និងពង្រឹងបដិសណ្ឋារកិច្ច](https://www.facebook.com/share/p/1B8zmZCCzr/) នាព្រឹកថ្ងៃទី២៦ ខែឧសភា ឆ្នាំ២០២៦ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានអនុញ្ញាតឱ្យគណៈប្រតិភូសមាគមទេសចរណ៍កម្ពុជា ដឹកនាំដោយលោកជំទាវ ឆាយ ស៊ីវលីន ជាប្រធានសមាគម ចូលជួបសម្តែងការគួរសម និងពិភាក្សាការងារសំដៅពង្រឹងកិច្ចសហប្រតិបត្តិការដើម្បីអភិវឌ្ឍវិស័យទេសចរណ៍នៅកម្ពុជា។ គោលបំណងចម្បងនៃកិច្ចពិភាក្សា គឺដើម្បីស្នើសុំការគាំទ្រ និងកិច្ចសហការលើការអភិវឌ្ឍ ក៏ដូចជាជំរុញវិស័យទេសចរណ៍កម្ពុជាឱ្យកាន់តែមានសន្ទុះរីកចម្រើន។ ភាគីទាំងពីរបានធ្វើការផ្លាស់ប្តូរបទពិសោធគ្នាទៅវិញទៅមកពាក់ព័ន្ធនឹងការរៀបចំព្រឹត្តិការណ៍នានានៅតាមតំបន់គោលដៅទេសចរណ៍ ក៏ដូចជាព្រឹត្តិការណ៍ថ្នាក់ជាតិធំៗ។   បន្ថែមពីនេះ អង្គប្រជុំក៏បានផ្តោតការយកចិត្តទុកដាក់ខ្ពស់លើការពង្រឹង **«បដិសណ្ឋារកិច្ចទេសចរណ៍»** តាមរយៈចំណុចសំខាន់ៗមួយចំនួនរួមមាន៖ ការផ្សារភ្ជាប់ទំនាក់ទំនង និងជំរុញឱ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ, ការលើកកម្ពស់ការបណ្តុះបណ្តាលធនធានមនុស្សក្នុងវិស័យទេសចរណ៍, ការជំរុញយុទ្ធនាការផ្សព្វផ្សាយឱ្យកាន់តែទូលំទូលាយ, ការស្វែងយល់ស៊ីជម្រៅពីឥរិយាបទទេសចរណ៍ និងការបង្កើតភាពទាក់ទាញក្នុងការផ្គត់ផ្គង់សេវាកម្មទេសចរណ៍ប្រកបដោយគុណភាព។