皇家行政学院启动机构改革 贯彻精简而非扩张方针

មិនខុសពីក្រសួង-ស្ថាប័នទេ សាលាភូមិន្ទរដ្ឋបាល ក៏កំពុងកែលម្អនូវរចនាសម្ព័ន្ធរបស់ខ្លួនឱ្យបានល្អប្រសើរ ស្របតាមអភិក្រម “ពង្រឹងជាជាងពង្រីក” និង “រៀបចំផ្ទះឱ្យរៀបរយ” នាព្រឹកថ្ងៃទី៧ ខែកក្កដា ឆ្នាំ២០២៦ ក្រុមប្រឹក្សាសាលាភូមិន្ទរដ្ឋបាល ដឹកនាំដោយ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល បានអញ្ជើញដឹកនាំកិច្ចប្រជុំពិនិត្យតាមដានវឌ្ឍនភាពការងារសម្រេចបាន និងរៀបចំផែនការការងារបន្ត ក្នុងក្របខ័ណ្ឌសាលាភូមិន្ទរដ្ឋបាល។ កិច្ចប្រជុំប្រព្រឹត្តទៅក្នុងបរិវេណសាលាភូមិន្ទរដ្ឋបាល ដោយមានការអញ្ជើញចូលរួមពី សមាជិក សមាជិកាក្រុមប្រឹក្សា ព្រមទាំងគណៈគ្រប់គ្រងសាលាភូមិន្ទរដ្ឋបាល ជាច្រើនរូប។ របៀបវារៈសំខាន់ៗត្រូវបានលើកយកមកពិភាក្សា។ ក្នុងនោះ កិច្ចប្រជុំបានបង្ហាញពីការរៀបចំកែលម្អនូវរចនាសម្ព័ន្ធថ្មីរបស់សាលាភូមិន្ទរដ្ឋបាល ដោយក្រុមការងារបានរៀបចំសេចក្តីព្រាងកែសម្រួល «ព្រះរាជ្យក្រឹត្យស្តីពីការរៀបចំ និងការប្រព្រឹត្តទៅនៃសាលាភូមិន្ទរដ្ឋបាល» និងសេចក្តីព្រាងកែសម្រួល «អនុក្រឹត្យស្តីពីលក្ខន្តិកៈសាលាភូមិន្ទរដ្ឋបាល»។ ផ្អែកលើការរៀបចំកែសម្រួលថ្មីនេះ បានបង្ហាញថាសាលាភូមិន្ទរដ្ឋបាលបានអនុវត្តទៅតាមកម្មវិធីកំណែទម្រង់របស់រាជរដ្ឋាភិបាល ដោយបានរៀបចំកែលម្អអង្គភាពរបស់ខ្លួន និងបានកាត់បន្ថយនូវអង្គភាពមួយចំនួន “បង្រួមមិនពង្រីក” ព្រមទាំងបានគិតគូរដល់ការកំណត់វិសាលភាពបន្ថែមនៃបេសកកម្មរបស់ខ្លួន។ ជាលទ្ធផលស្មារតីនៃអង្គប្រជុំ គឺទទួលបានការសាទរ និងការឯកភាពពីសំណាក់ សមាជិក សមាជិកានៃក្រុមប្រឹក្សាសាលាភូមិន្ទរដ្ឋបាល និងសមាជិក សមាជិកានៃអង្គប្រជុំទាំងមូល។