柬埔寨司法部刑事事务总局召开2026年上半年工作总结会议

ឯកឧត្តមបណ្ឌិត គឹម សន្តិភាព អញ្ជើញដឹកនាំកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅការងារឆមាសទី២ ឆ្នាំ២០២៦ របស់អគ្គនាយកដ្ឋានកិច្ចការទោសព្រហ្មទណ្ឌ ==================== ​ក្រសួងយុត្តិធម៌៖ នាព្រឹកថ្ងៃអង្គារ ទី០៤ ខែសីហា ឆ្នាំ២០២៦ ឯកឧត្តមបណ្ឌិត គឹម សន្តិភាព រដ្ឋលេខាធិការក្រសួងយុត្តិធម៌ ទទួលបន្ទុកអគ្គនាយកដ្ឋានកិច្ចការទោសព្រហ្មទណ្ឌ បានអញ្ជើញជាអធិបតីដឹកនាំកិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅការងារបន្តសម្រាប់ឆមាសទី២ ឆ្នាំ២០២៦ របស់អគ្គនាយកដ្ឋានកិច្ចការទោសព្រហ្មទណ្ឌ។ ​ជាកិច្ចចាប់ផ្តើម ឯកឧត្តមបណ្ឌិត រដ្ឋលេខាធិការ បានស្តាប់របាយការណ៍ស្តីពីសមិទ្ធផលការងារ និងបញ្ហាប្រឈមក្នុងឆមាសទី១ ដែលរាយការណ៍ដោយ ឯកឧត្តម ជាម សត្យា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការទោសព្រហ្មទណ្ឌ។ ជាមួយគ្នានេះ កិច្ចប្រជុំក៏បានបើកវេទិកាពិភាក្សាដកស្រង់មតិយោបល់យ៉ាងផុសផុលពីសំណាក់ថ្នាក់ដឹកនាំ និងមន្ត្រីជំនាញនៃនាយកដ្ឋានចំណុះ ដើម្បីអនុញ្ញាតឱ្យគ្រប់ភាគីបង្ហាញពីស្ថានភាពជាក់ស្តែងនៃការបំពេញភារកិច្ច និងបញ្ហាទាក់ស្ទះនាពេលកន្លងមក។ ​ឆ្លងតាមការស្តាប់របាយការណ៍ និងការពិភាក្សាដេញដោល អង្គប្រជុំបានផ្តោតលើការដោះស្រាយបញ្ហាប្រឈមគន្លឹះៗដោយឈរលើស្មារតីយោគយល់ និងការស្វែងរកដំណោះស្រាយរចនាសម្ព័ន្ធការងារឱ្យមានភាពច្បាស់លាស់។ ​មានប្រសាសន៍បូកសរុប និងតម្រង់ទិសក្នុងឱកាសនោះ ឯកឧត្តមបណ្ឌិត បានសម្តែងនូវការវាយតម្លៃខ្ពស់ និងកោតសរសើរចំពោះស្មារតីទទួលខុសត្រូវ និងការខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃអគ្គនាយកដ្ឋានកិច្ចការទោសព្រហ្មទណ្ឌ។ បន្ថែមលើនេះ ឯកឧត្តមបណ្ឌិត បានផ្តល់អនុសាសន៍ណែនាំ និងផ្តាំផ្ញើឱ្យបន្តអនុវត្តផែនការសកម្មភាពឆមាសទី២ ឆ្នាំ២០២៦ ឱ្យកាន់តែមានសុក្រឹតភាព ប្រសិទ្ធភាព និងភាពច្បាស់លាស់ ដោយប្រកាន់ខ្ជាប់នូវអភិក្រមការងារ៖ «ងាយស្រួល លឿន ត្រឹមត្រូវ និងច្បាស់លាស់»។ ​សូមបញ្ជាក់ថា កិច្ចប្រជុំនេះមានការអញ្ជើញចូលរួមពី ឯកឧត្តម ឃឹម សារី អនុរដ្ឋលេខាធិការក្រសួងយុត្តិធម៌ ឯកឧត្តម ជាម សត្យា ប្រតិភូរាជរដ្ឋាភិបាល និងជាអគ្គនាយក ព្រមទាំងលោក លោកស្រី ជាអគ្គនាយករង ប្រធាន-អនុប្រធាននាយកដ្ឋាន ប្រធាន-អនុប្រធានការិយាល័យ និងមន្ត្រីរាជការក្រោមឱវាទអគ្គនាយកដ្ឋានកិច្ចការទោសព្រហ្មទណ្ឌជាច្រើនរូប។