柬埔寨投资委员会考察贡布省水泥生产投资项目

ការចុះត្រួតពិនិត្យការអនុវត្តគម្រោងវិនិយោគផលិតស៊ីម៉ង់ចំនួនពីរនៅក្នុងភូមិសាស្ត្រខេត្តកំពត ខេត្តកំពត៖ នៅថ្ងៃព្រហស្បតិ៍ ទី២៦ ខែមីនា ឆ្នាំ២០២៦ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានដឹកនាំគណៈប្រតិភូអន្តរក្រសួង រួមទាំងអាជ្ញាធរខេត្តកំពត ចុះបំពេញបេសកកម្មត្រួតពិនិត្យការអនុវត្តគម្រោងវិនិយោគផលិតស៊ីម៉ង់ចំនួនពីររួមមាន៖ ក្រុមហ៊ុន KAMPOT CEMENT CO., LTD. និងក្រុមហ៊ុន CHIP MONG INSEE CEMENT CORPORATION។ បេសកកម្មនេះ មានគោលបំណងស្វែងយល់ពីការអនុវត្តគម្រោង និងបញ្ហាប្រឈមនានា ដែលជាផ្នែកមួយ នៃការផ្តល់សេវាថែទាំវិនិយោគ ដូចមានចែងក្នុងច្បាប់ស្តីពីវិនិយោគ។ តាមរយៈការចុះត្រួតពិនិត្យនេះ គណៈប្រតិភូបានសង្កេតឃើញថាក្រុមហ៊ុនទាំងពីរបាននិងកំពុងដំណើរការយ៉ាងសកម្ម ដោយបានផ្តល់ឱកាសការងារ និងបណ្តុះបណ្តាលជំនាញដល់បងប្អូនប្រជាពលរដ្ឋខ្មែររាប់ពាន់នាក់ ដែលតាមរយៈការបណ្តុះបណ្តាលទាំងនេះបានផ្តល់លទ្ធភាពឱ្យក្រុមហ៊ុនអាចប្រើប្រាស់កម្លាំងពលកម្មក្នុងស្រុក រួមទាំងបុគ្គលិកជំនាញជាន់ខ្ពស់ផង ស្ទើរ១០០%។ គម្រោងវិនិយោគផលិតស៊ីម៉ង់ទាំងពីរនេះ មិនត្រឹមតែបានចូលរួមចំណែកយ៉ាងសំខាន់ក្នុងការធានានូវការផ្គត់ផ្គង់តម្រូវការស៊ីម៉ង់ក្នុងស្រុកសម្រាប់បម្រើដល់វិស័យសំណង់ប៉ុណ្ណោះទេ ប៉ុន្តែថែមទាំងបានចូលរួមលើកកម្ពស់ជីវភាពប្រជាពលរដ្ឋក្នុងមូលដ្ឋាន និងជំរុញកំណើនសេដ្ឋកិច្ចជាតិផងដែរ។ សូមគោរពជម្រាបថា បច្ចុប្បន្នកម្ពុជាមានរោងចក្រផលិតស៊ីម៉ង់ចំនួន៦ ដែលអាចផ្គត់ផ្គង់តម្រូវការស៊ីម៉ង់ក្នុងស្រុកដែលមានប្រមាណ ១០លានតោនក្នុងមួយឆ្នាំ បានគ្រប់គ្រាន់ទាំងស្រុង។ 🌐 Follow Us 🧭  [Website (CIB](https://cib-cdc.gov.kh/en)) | 👨‍💻 [Facebook|](https://www.facebook.com/cib.cdc.cambodia/) 💳 [Telegram](https://t.me/cib_cdc_cambodia)