柬埔寨移民总局驱逐11名非法居留及持械泰国籍人员

បណ្ដេញជនជាតិថៃ ១១នាក់ ពាក់ព័ន្ធករណីលួចស្នាក់នៅ ធ្វើការខុសច្បាប់ និងកាន់កាប់អាវុធខុសច្បាប់ ចេញពីប្រទេសកម្ពុជា អនុវត្តតាមបទបញ្ជាយ៉ាងម៉ឺងម៉ាត់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និងការដឹកនាំផ្ទាល់ពី ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, នាថ្ងៃទី១៨ ខែកញ្ញា ឆ្នាំ២០២៦ ម្សិលមិញនេះ អគ្គនាយកដ្ឋានអន្តោប្រវេសន៍ បានចាត់វិធានការបណ្ដេញជនជាតិថៃចំនួន ១១នាក់ (ស្រី ៥នាក់) ចេញពីព្រះរាជាណាចក្រកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត។ ការបណ្ដេញចេញនេះ ធ្វើឡើងបន្ទាប់ពីសមត្ថកិច្ចរកឃើញថា ក្រុមនេះបានប្រព្រឹត្តបទល្មើសលួចឆ្លងដែន ស្នាក់នៅ និងធ្វើការងារខុសច្បាប់ ព្រមទាំងកាន់កាប់ និងប្រើប្រាស់អាវុធដោយគ្មានការអនុញ្ញាតនៅលើទឹកដីកម្ពុជា។ ប្រតិបត្តិការនេះស្តែងឱ្យឃើញពីជំហរយ៉ាងច្បាស់លាស់ និងដាច់ខាតរបស់រាជរដ្ឋាភិបាលកម្ពុជា ក្នុងការមិនអនុញ្ញាតឱ្យឧក្រិដ្ឋជន ឬជនបរទេសខុសច្បាប់ ប្រើប្រាស់ទឹកដីកម្ពុជាធ្វើជាទីតាំងប្រព្រឹត្តបទល្មើស ឬបង្កអសន្តិសុខឡើយ។ សូមជម្រាបថា សមត្ថកិច្ចនឹងបន្តបោសសម្អាត បង្ក្រាប និងបណ្ដេញចេញដោយគ្មានការលើកលែង ដើម្បីការពារកិត្តិយស សន្តិសុខជាតិ និងសុវត្ថិភាពសង្គម៕