卫生部赴磅清扬省检查两所县级医院 提升服务质量

ការចុះពិនិត្យវឌ្ឍនភាព និងគាំទ្រការពង្រឹងគុណភាពសេវាមន្ទីរពេទ្យបង្អែកស្រុក ក្នុងខេត្តកំពង់ឆ្នាំង។ —— ខេត្តកំពង់ឆ្នាំង៖ ថ្ងៃសុក្រ ទី៣០ ខែតុលា ឆ្នាំ២០២៦ ឯកឧត្តមទន្តបណ្ឌិត អឿន បូរារ័ត្នន៍ និងឯកឧត្តមវេជ្ជបណ្ឌិត លី ឈួង រដ្ឋលេខាធិការក្រសួងសុខាភិបាល បានដឹកនាំក្រុមការងារបច្ចេកទេសចុះពិនិត្យវឌ្ឍនភាព និងគាំទ្រការពង្រឹងគុណភាពសេវាសុខាភិបាល នៅមន្ទីរពេទ្យបង្អែកកំពង់ត្រឡាច និងមន្ទីរពេទ្យបង្អែកបរិបូណ៌ ដើម្បីធានានូវប្រសិទ្ធភាព និងសុវត្ថិភាពខ្ពស់ជូនប្រជាពលរដ្ឋ។ ក្នុងឱកាសចុះបំពេញបេសកកម្មនេះ ឯកឧត្តមរដ្ឋលេខាធិការ បានពាំនាំនូវការសួរសុខទុក្ខ និងអំណរគុណយ៉ាងជ្រាលជ្រៅពីសំណាក់ ឯកឧត្តមសាស្ត្រាចារ្យរដ្ឋមន្ត្រី ជូនចំពោះថ្នាក់ដឹកនាំ និងមន្ត្រីសុខាភិបាលគ្រប់ជាន់ថ្នាក់ ដែលបានខិតខំលះបង់កម្លាំងកាយចិត្តក្នុងការលើកកម្ពស់សុខុមាលភាពប្រជាពលរដ្ឋ ស្របតាមយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាល នីតិកាលទី៧ នៃរដ្ឋសភា។ ទន្ទឹមនឹងនេះ ឯកឧត្តមរដ្ឋលេខាធិការ បានផ្តល់អនុសាសន៍គន្លឹះសំខាន់ៗមួយចំនួនដល់មន្ទីរពេទ្យ រួមមាន៖ ១. ហេដ្ឋារចនាសម្ព័ន្ធ និងបរិស្ថាន៖ រៀបចំផែនការអភិវឌ្ឍន៍មន្ទីរពេទ្យឱ្យមានសោភ័ណភាព អនាម័យ និងគុណភាពស្របតាមស្តង់ដារ។ ២. ការពង្រឹងជំនាញបច្ចេកទេសស្នូល៖ បង្កើនប្រសិទ្ធភាព និងសមត្ថភាពបច្ចេកទេសលើផ្នែកសង្គ្រោះបន្ទាន់ ផ្នែកវះកាត់ សង្គ្រោះទារក និងមន្ទីរពិសោធន៍។ ៣. ការពង្រីកវិសាលភាពសេវា៖ យកចិត្តទុកដាក់ខ្ពស់លើការផ្តល់សេវាឯកទេសសុខភាពមាត់ធ្មេញ ចក្ខុរោគ ផ្លូវចិត្ត និងការព្យាបាលដោយចលនា។ ៤. ការផ្គត់ផ្គង់ និងខ្សែច្រវាក់បញ្ជូន៖ គ្រប់គ្រង ថែទាំ ឱសថ បរិក្ខារពេទ្យ និងប្រព័ន្ធបញ្ជូនអ្នកជំងឺ ឱ្យស្របតាមលក្ខណៈបច្ចេកទេសត្រឹមត្រូវ និងទាន់ពេលវេលា។ បេសកកម្មនេះមានការចូលរួមពីថ្នាក់ដឹកនាំការិយាល័យសុខាភិបាលស្រុកប្រតិបត្តិ ថ្នាក់ដឹកនាំមន្ទីរពេទ្យ ព្រមទាំងមន្ត្រីពាក់ព័ន្ធមកពីមន្ទីរពេទ្យបង្អែកទាំងពីរផងដែរ។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter)](https://x.com/MohCambodia) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)