金边271路与371路交叉口路面出现多处坑洼，尤其在雨天积水

📷កំណាត់ផ្លូវ ២៧១ កែង ៣៧១ កំពុងរងការខូចខាត កើតជាជង្ហុកតូចធំ បង្កហានិភ័យដល់អ្នកធ្វើដំណើរ ប្រជាពលរដ្ឋ ដែលធ្វើដំណើរឆ្លងកាត់កំណាត់ផ្លូវ ២៧១ បានសម្តែងការព្រួយបារម្ភយ៉ាងខ្លាំង និងបានស្នើសុំឱ្យអាជ្ញាធរមូលដ្ឋាន ឬមន្ទីរសាធារណការ និងដឹកជញ្ជូន រាជធានីភ្នំពេញ មេត្តាចុះពិនិត្យ និងជួសជុលសម្រួលផ្លូវនេះឡើងវិញ ដើម្បីជៀសវាងគ្រោះថ្នាក់ចរាចរណ៍ជាយថាហេតុ។ កំណាត់ផ្លូវ ២៧១ ចាប់ពីចំណុចមុខច្រកចូលវត្តដំបូកខ្ពស់ រហូតដល់កែងផ្លូវ ៣៧១ ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ កំពុងរងការខូចខាតជាច្រើនកន្លែង ដោយកើតមានជាជង្ហុកតូចធំជាបន្តបន្ទាប់។ ខណៈនៅពេលមានភ្លៀងធ្លាក់ ឬ មានទឹកដក់ក្នុងជង្ហុកទាំងនោះ បានបាំងបិទជម្រៅរណ្តៅ ធ្វើឱ្យអ្នកធ្វើដំណើរតាមម៉ូតូ ពិបាកមើលឃើញ ដែលតែងតែបង្កជាគ្រោះថ្នាក់ដួល ឬខូចខាតយានយន្តជាញឹកញាប់។ ជាមួយគ្នា ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរឆ្លងកាត់ផ្លូវនោះ សូមអំពាវនាវដល់អាជ្ញាធរ និងភាគីពាក់ព័ន្ធ មេត្តាចាត់កម្លាំងចុះជួសជុល ឬ លុបជង្ហុកទាំងនោះជាបន្ទាន់ កុំឱ្យការខូចខាតច្រើនជាងនេះ និងដើម្បីធានាសុវត្ថិភាពក្នុងការធ្វើដំណើររបស់ប្រជាពលរដ្ឋ៕