外交部公务员招录考试顺利结束 洪玛尼现场签署最终结果

ឯកឧត្តមឧបនាយករដ្ឋមន្ត្រី ហ៊ុន ម៉ានី អញ្ជើញចុះហត្ថលេខាលើលទ្ធផលប្រឡងក្របខ័ណ្ឌក្រសួងការបរទេស និងសហប្រតិបត្តិការអន្តរជាតិ រយៈពេលពេញមួយថ្ងៃ ចាប់ពីម៉ោង ៧ព្រឹក ដល់ម៉ោង ៥ល្ងាច ដំណើរការប្រឡងប្រជែងជ្រើសរើសមន្រ្តីរាជការ សម្រាប់ក្របខ័ណ្ឌក្រសួងការបរទេស និងសហប្រតិបត្តិការអន្តរជាតិ បានបញ្ចប់ទៅដោយរលូន។ ខណៈនេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង កំពុងមានវត្តមាននៅក្នុងមណ្ឌលប្រឡងសាលាភូមិន្ទរដ្ឋបាល ដើម្បីអញ្ជើញពិនិត្យ និងចុះហត្ថលេខាលើលទ្ធផលប្រឡងដោយផ្ទាល់។ ក្នុងដំណើរការពិនិត្យនិងចុះហត្ថលេខានេះ មានការអញ្ជើញចូលរួមពីសមាជិក-សមាជិកានៃគណៈកម្មការ អនុគណៈកម្មការនានា តំណាងក្រសួងការបរទេសនិងសហប្រតិបត្តិការអន្តរជាតិ តំណាងក្រសួងសេដ្ឋកិច្ចនិងហិរញ្ញវត្ថុ តំណាងអង្គភាពប្រឆាំងអំពើពុករលួយ ព្រមទាំងអ្នកសង្កេតការណ៍ស្ម័គ្រចិត្ត ជាច្រើនរូប ដើម្បីធានាបាននូវ តម្លាភាព យុត្តិធម៌ និងសុក្រឹតភាពច្បាស់លាស់ពេញលេញ។ នាពេលនេះ ក្រុមការងាររបស់គណៈកម្មការរៀបចំការប្រឡង កំពុងបន្តនីតិវិធីចុងក្រោយយ៉ាងមមាញឹក និងសកម្មបំផុត ដើម្បីឱ្យការចេញប្រកាសលទ្ធផលជូនដល់បេក្ខជនទាំងអស់ដែលកំពុងទន្ទឹងរង់ចាំបានឆាប់រហ័ស។