柬埔寨勋爵协会赴日招商 聚焦汽车零部件与绿色能源

«គណៈប្រតិភូសមាគមឧកញ៉ាកម្ពុជា បញ្ចប់បេសកកម្មគោះទ្វារទាក់ទាញ និងជំរុញវិនិយោគនៅក្នុងប្រទេសជប៉ុន ដោយបានចូលរួមជំនួបជាមួយថ្នាក់ដឹកនាំក្រុមហ៊ុន Sumitomo Electric Industries, Ltd. និងវេទិកាវិនិយោគកម្ពុជា នៅទីក្រុងអូសាកា» អូសាកា៖ បន្ទាប់ពីបញ្ចប់ដោយជោគជ័យនូវបេសកកម្ម និងភារកិច្ចការងារក្នុងទឹកដីនៃរាជធានីតូក្យូ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានដឹកនាំគណៈប្រតិភូជាន់ខ្ពស់កម្ពុជាធ្វើដំណើរទៅកាន់ទីក្រុងអូសាកាដើម្បីបន្តបេសកកម្មគោះទ្វារទាក់ទាញ និងជំរុញការវិនិយោគ។ ជាមួយគ្នានេះ ដែរ គណៈប្រតិភូ នៃសមាគមឧកញ៉ាកម្ពុជា ដែលដឹកនាំដោយ អ្នកឧកញ៉ា សៀ ឬទ្ធី ក៏បានចូលរួមនៅក្នុងជំនួបក៏ដូចជាវេទិការធុរកិច្ចនានាផងដែររួមមាន៖ ១. ជួបសម្តែងការគួរសម និងពិភាក្សាការងារជាមួយ លោក Masayoshi Matsumoto ប្រធានសហព័ន្ធសេដ្ឋកិច្ចកាន់សៃ និងជាប្រធានក្រុមហ៊ុន Sumitomo Electric Industries, Ltd. នាព្រឹកថ្ងៃសុក្រ ទី១២ ខែមិថុនា ឆ្នាំ២០២៦ (ម៉ោងក្នុងតំបន់) ដោយនៅក្នុងឱកាសនៃជំនួបដ៏មានសារៈសំខាន់នេះភាគីទាំងពីរបានពិភាក្សាគ្នាយ៉ាងលម្អិត និងបានផ្លាស់ប្តូរទស្សនៈទៅវិញទៅមកលើវិស័យឧស្សាហកម្មគ្រឿងបង្គំយានយន្តនៅកម្ពុជាសំដៅជំរុញគោលដៅយុទ្ធសាស្ត្រក្នុងការប្រែក្លាយកម្ពុជាទៅជាមជ្ឈមណ្ឌលកណ្តាល (Hub) សម្រាប់ឧស្សាហកម្មគ្រឿងបង្គុំយានយន្តនាពេលអនាគត។ បន្ថែមពីលើនេះ អង្គប្រជុំក៏បានលើកយកវិស័យថាមពលកកើតឡើងវិញមកពិភាក្សាគ្នាយ៉ាងស៊ីជម្រៅ ដោយផ្តោតលើការអភិវឌ្ឍប្រភពថាមពលបៃតង ការបង្កើនប្រសិទ្ធភាពថាមពល និងការប្រើប្រាស់បច្ចេកវិទ្យាឆ្លាតវៃក្នុងការគ្រប់គ្រងបណ្តាញអគ្គិសនីនៅក្នុងតំបន់ ដើម្បីគាំទ្រដល់ខ្សែច្រវាក់ផលិតកម្មប្រកបដោយនិរន្តរភាព និងឆ្លើយតបទៅនឹងការប្តេជ្ញាចិត្តរបស់កម្ពុជាក្នុងការកាត់បន្ថយការបំភាយឧស្ម័នកាបូនផងដែរ។ ២. ចូលរួម «វេទិកាវិនិយោគកម្ពុជា» ដែលបានប្រារព្ធឡើងនៅក្នុងសភាពាណិជ្ជកម្ម និងឧស្សាហកម្មនៃទីក្រុងអូសាកា (Osaka Chamber of Commerce and Industry - OCCI)។ វេទិកាធុរកិច្ចកម្រិតខ្ពស់នេះ ត្រូវបានរៀបចំឡើងក្រោមកិច្ចសហការយ៉ាងជិតស្និទ្ធរវាង ក.អ.ក., មជ្ឈមណ្ឌលអាស៊ាន-ជប៉ុន (AJC), សភាពាណិជ្ជកម្ម និងឧស្សាហកម្មអូសាកា (OCCI) និងអង្គការពាណិជ្ជកម្មក្រៅប្រទេសជប៉ុន (JETRO) ក្រោមមូលបទ «ឱកាសក្នុងវិស័យចីរភាព និងយុទ្ធសាស្ត្រ» ។កម្មវិធីនេះមានការអញ្ជើញចូលរួមផងដែរពីសំណាក់ លោកស្រី Kyoko Hirose អនុប្រធាន OCCI, លោក Hiromitsu Morishima ប្រធានគណៈកម្មាធិការធុរកិច្ចអន្តរជាតិនៃ OCCI, លោកបណ្ឌិត Kunihiko Hirabayashi អគ្គលេខាធិការនៃមជ្ឈមណ្ឌលអាស៊ាន-ជប៉ុន (AJC), លោក Yasushi Ninomiya អគ្គនាយកនៃអង្គការ JETRO ប្រចាំតំបន់អូសាកា, ព្រមទាំងសមាសភាពតំណាងក្រុមហ៊ុន-សហគ្រាសឈានមុខរបស់ជប៉ុនប្រមាណ ៨០ ក្រុមហ៊ុន។ «វេទិកាវិនិយោគកម្ពុជា» នាឱកាសនេះបានទទួលផ្លែផ្កាយ៉ាងត្រចះត្រចង់ក្នុងការឆ្លុះបញ្ចាំងពីសន្ទុះនៃការចាប់អារម្មណ៍ខ្ពស់ និងការបង្កើនទំនុកចិត្តពីសំណាក់ធុរជន និងវិនិយោគិនជប៉ុនមកលើបរិយាកាសធុរកិច្ចនៅកម្ពុជា ព្រមទាំងជាជំហានឆ្ពោះទៅមុខដ៏រឹងមាំក្នុងការជំរុញទំនាក់ទំនងសេដ្ឋកិច្ច និងពាណិជ្ជកម្មទ្វេភាគីកម្ពុជា-ជប៉ុន ឱ្យកាន់តែរីកចម្រើនប្រកបដោយចីរភាព និងបរិយាបន្ន។