国家母婴中心新建15层治疗大楼正式动工

ពិធីបញ្ចុះបឋមសិលាសាងសង់អគារថែទាំព្យាបាលថ្មី នៃមជ្ឈមណ្ឌលជាតិគាំពារមាតា និងទារក។ —— រាជធានីភ្នំពេញ៖ ព្រឹកថ្ងៃពុធ ទី១៤ ខែតុលា ឆ្នាំ២០២៦ នៅមជ្ឈមណ្ឌលជាតិគាំពារមាតា និងទារក បានរៀបចំពិធីបញ្ចុះបឋមសិលាសាងសង់អគារថែទាំព្យាបាលថ្មី ក្រោមអធិបតីភាពលោកជំទាវសាស្រ្តាចារ្យ អ៉ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាល នៃមជ្ឈមណ្ឌលជាតិគាំពារមាតា និងទារក។ អគារថែទាំព្យាបាលថ្មីនេះ មានកម្ពស់ ១៥ជាន់ ដែលអាចបំពាក់គ្រែសម្រាកព្យាបាលសរុបជាង ២០០គ្រែ បរិក្ខារវេជ្ជសាស្ត្រទំនើបៗ បន្ទប់វះកាត់ប្រកបដោយស្តង់ដា ដែលមានផ្នែកថែទាំទារក (NCU & NICU) ផ្នែកសម្ភព ផ្នែករោគស្រ្តី ផ្នែកជំងឺទូទៅ និងវះកាត់ ផ្នែកមន្ទីរពិសោធន៍ សាលប្រជុំ និងបណ្តុះបណ្តាល។ អគារថែទាំព្យាបាលកម្ពស់ ១៥ជាន់ ដែលមាន ២០០គ្រែនេះ គឺជាសមិទ្ធផលថ្មីមួយទៀត និងជាការយកចិត្តទុកដាក់ពីថ្នាក់ដឹកនាំក្នុងការឆ្លើយតបទៅនឹងតម្រូវការចាំបាច់ នៃសេវាថែទាំសុខភាពមាតា និងទារក នៅមជ្ឈមណ្ឌលជាតិគាំពារមាតា និងទារក ដែលរួមចំណែកយ៉ាងសំខាន់ក្នុងការកាត់បន្ថយអត្រាមរណភាពមាតា និងទារក ព្រមទាំងផ្តល់នូវបរិស្ថានព្យាបាលដែលមានសុវត្ថិភាព និងទំនុកចិត្តខ្ពស់។ តាមការគ្រោងទុក គម្រោងសាងសង់អគារថែទាំព្យាបាលថ្មីនេះនឹងត្រូវបញ្ចប់ជាស្ថាពរនៅចុងឆ្នាំ២០២៨។ សូមបញ្ជាក់ជូនថា ពិធីបញ្ចុះបឋមសិលាសាងសង់អគារថ្មីនេះ មានការអញ្ជើញចូលរួមពី សមាជិកក្រុមប្រឹក្សាភិបាល ឯកឧត្ដម លោកជំទាវ ទីប្រឹក្សាក្រសួងសុខាភិបាល និងថ្នាក់ដឹកនាំ ប្រធានការិយាល័យ អនុប្រធានការិយាល័យ ប្រធានផ្នែក ជំនួយការប្រធានផ្នែក ប្រធានកម្មវិធីជាតិ អនុប្រធានកម្មវិធីជាតិ នាយសាល ជំនួយការនាយសាល មន្ត្រីរាជការ បុគ្គលិក នៃមជ្ឈមណ្ឌលជាតិគាំពារមាតា និងទារក។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)