洪玛尼副总理主持金边公立学校教师内部选拔考试

ឯកឧត្តមឧបនាយករដ្ឋមន្ត្រី ហ៊ុន ម៉ានី អញ្ជើញបើកស្លាកនីតិវិធី (Seal) បន្ទប់តម្កល់សន្លឹកកិច្ចការ ដើម្បីចាប់ផ្តើមដំណើរការកែនាព្រឹកនេះ នាព្រឹកព្រលឹមថ្ងៃទី១៥ ខែតុលា ឆ្នាំ២០២៦ នេះ ចាប់ផ្ដើមពីម៉ោង ៦:៣០នាទីព្រឹក ដំណើរការបើកប្រអប់ និងកែសន្លឹកកិច្ចការនៃការប្រឡងប្រជែងផ្ទៃក្នុង សម្រាប់គ្រូបង្រៀនជាមន្ត្រីរាជការក្របខ័ណ្ឌ ដើម្បីផ្ទេរកន្លែងការងារពីគ្រឹះស្ថានសិក្សាសាធារណៈទូទាំងប្រទេស មកបំពេញតម្រូវការគ្រូបង្រៀនបន្ថែមនៅតាមគ្រឹះស្ថានសិក្សាសាធារណៈ ក្នុងភូមិសាស្ត្ររដ្ឋបាលរាជធានីភ្នំពេញ បានចាប់ផ្តើម នៅមណ្ឌលសាលាភូមិន្ទរដ្ឋបាល។ ក្នុងឱកាសនេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង បានអញ្ជើញចុះពិនិត្យផ្ទាល់ និងធ្វើការបើកស្លាកនីតិវិធី (Seal) បន្ទប់តម្កល់សន្លឹកកិច្ចការ ដើម្បីធានាបាននូវសុក្រឹតភាព និងភាពត្រឹមត្រូវ មុននឹងប្រគល់ជូនអនុគណៈកម្មការ ដើម្បីដំណើរការកែ។ ដើម្បីធានាសុក្រឹតភាព និងផ្តល់ទំនុកចិត្កក្នុងដំណើរការកែសន្លឹកកិច្ចការបេក្ខជន គ្រប់ដំណាក់កាលទាំងអស់ ទាំងការកាត់ក្បាលសន្លឹកកិច្ចការ ការចុះលេខកូដសម្ងាត់ និងការអនុវត្តនីតិវិធីនានា គឺត្រូវបានអនុវត្តឡើងស្របតាមបទប្បញ្ញត្តិស្តង់ដាប្រឡង និងស្ថិតក្រោមការឃ្លាំមើល និងត្រួតពិនិត្យជាប់ជាប្រចាំ ពីសំណាក់អង្គភាពប្រឆាំងអំពើពុករលួយ (ACU) អនុគណៈកម្មការពិនិត្យនិងវាយតម្លៃ ព្រមទាំងអ្នកសង្កេតការណ៍តំណាងសាកលវិទ្យាល័យ និងសាធារណជនស្ម័គ្រចិត្ត ព្រមទាំងមានការចូលរួមសហការ និងធ្វើជាសាក្សីផ្ទាល់ពីសំណាក់តំណាងក្រសួងអប់រំ យុវជន និងកីឡា និងក្រសួងសេដ្ឋកិច្ចនិងហិរញ្ញវត្ថុ។ សូមជម្រាបថា សន្លឹកកិច្ចការដែលកំពុងដំណើរការនាព្រឹកនេះ គឺជាសន្លឹកកិច្ចការរបស់បេក្ខជនជាលោកគ្រូ អ្នកគ្រូ ដែលទើបតែបានបញ្ចប់ដំណើរការប្រឡងប្រជែងផ្ទៃក្នុងយ៉ាងជោគជ័យ កាលពីរសៀលម្សិលមិញនេះ។