金边德科市场发生火灾 多家果蔬批发摊位被毁

សោកស្តាយ! អគ្គិភ័យ បានលេបត្របាក់តូបលក់ផ្លែឈើបោះដុំអស់ជាច្រើន នៅផ្សារនាគមាស ភ្នំពេញ៖ ត្រឹមតែប្រមាណ២ម៉ោងប៉ុណ្ណោះ តូបលក់ផ្លែឈើបោះដុំ និងឃ្លាំងស្លុកផ្លែឈើ ជាច្រើនកន្លែង នៅក្នុងផ្សារនាគមាស ក្នុងសង្កាត់ផ្សារដើមគរ ខណ្ឌទួលគោក ត្រូវបានអគ្គិភ័យលេបត្របាក់។ ហេតុការណ៍ឆាបឆេះ កើតឡើង នៅម៉ោងប្រមាណ ១២ និង៣០នាទីថ្ងៃត្រង់ ថ្ងៃទី២៨ ខែសីហានេះ។ អណ្តាតភ្លើងក្រហមច្រាល បានឆេះរាលដាល ពីតូបមួយ ទៅមួយទៀត បង្កជាផ្សែងខ្មៅខ្មួលខ្មាញ់ហោះទៅលើអាកាស។ អាជ្ញាធរ បានប្រើប្រាស់រថយន្តពន្លត់អគ្គិភ័យ អស់ជាច្រើនគ្រឿង បាញ់ពន្លត់ មុននឹងអាចគ្រប់គ្រងភ្លើងកុំឱ្យឆេះរាលបន្ត នៅម៉ោងប្រមាណ២រសៀល។ គួរឱ្យសោកស្តាយ ភ្លើងបានឆេះលេបត្របាក់តូបលក់បន្លែ ផ្លែឈើ ឃ្លាំងស្តុក អស់ជាច្រើនរួចទៅហើយ។ លោក នេត វន្ថា ប្រធាននាយកដ្ឋាននគរបាលបង្ការ និងពន្លត់អគ្គិភ័យ មិនទាន់អាចទំហំខូចខាតនៃអគ្គិភ័យនេះនៅឡើយ។ លោក បញ្ជាក់ខ្លីប្រាប់ថ្មីៗមីឌៀថា ​អាជ្ញាធរកំពុងស្រង់របាយការណ៍សរុប និងរកមូលហេតុនៃការឆាបឆេះ​។ ដោយ៖ ជា យូគៀង