柬埔寨基层民众质疑公共预算去向 呼吁提升财政透明度

ថវិកាឃុំមានច្រើន តែហេតុអ្វីផ្លូវនៅតែខូច? ប្រជាពលរដ្ឋសួរ៖ «លុយយកទៅណា?» តើចំណាយទៅលើអ្វីខ្លះ? ហេតុអ្វីការអភិវឌ្ឍនៅតែមិនឃើញមាន? ប្រជាពលរដ្ឋមួយចំនួនបានសម្តែងការភ្ញាក់ផ្អើល និងងឿងឆ្ងល់ បន្ទាប់ពីបានដឹងថា ថវិកាដែលឃុំទទួលបានសម្រាប់បម្រើការងារ និងអភិវឌ្ឍមូលដ្ឋានក្នុងមួយឆ្នាំៗ មានចំនួនមិនតិចនោះទេ។ អ្វីដែលប្រជាពលរដ្ឋចង់ដឹង និងស្នើសុំការបំភ្លឺ គឺ តើថវិកាទាំងនោះត្រូវបានយកទៅប្រើប្រាស់លើអ្វីខ្លះ? ហើយហេតុអ្វីបានជាឃុំមួយចំនួនមានការអភិវឌ្ឍរីកចម្រើន មានផ្លូវល្អ និងហេដ្ឋារចនាសម្ព័ន្ធកាន់តែប្រសើរ ខណៈឃុំមួយចំនួនទៀត ផ្លូវក្នុងភូមិនៅតែមានការលំបាកក្នុងការធ្វើដំណើរ ជាពិសេសនៅរដូវភ្លៀង? ប្រជាពលរដ្ឋលើកឡើងថា ផ្លូវខ្លះមានសភាពពិបាកធ្វើដំណើររៀងរាល់ឆ្នាំ ហើយនៅពេលរាយការណ៍ទៅអាជ្ញាធរមូលដ្ឋាន ក៏ទទួលបានការឆ្លើយតបថា «មិនមានសមត្ថភាព ឬមិនមានថវិកាធ្វើ»។ ចំណុចនេះហើយដែលធ្វើឱ្យប្រជាពលរដ្ឋសួរថា៖ ប្រសិនបើឃុំមានថវិកាសម្រាប់អភិវឌ្ឍមូលដ្ឋាន ហេតុអ្វីបានជាបញ្ហាផ្លូវ និងហេដ្ឋារចនាសម្ព័ន្ធមួយចំនួននៅតែបន្តកើតមានជារៀងរាល់ឆ្នាំ? ប្រជាពលរដ្ឋមួយចំនួនក៏លើកឡើងថា ប្រសិនបើមានការរៀបចំផែនការអភិវឌ្ឍជាបន្តបន្ទាប់ ទោះបីក្នុងមួយឆ្នាំធ្វើបានតែបន្តិចក៏ដោយ ប៉ុន្តែបើធ្វើជារៀងរាល់ឆ្នាំ នោះស្ថានភាពផ្លូវ សោភ័ណភាព និងហេដ្ឋារចនាសម្ព័ន្ធក្នុងភូមិ-ឃុំ គួរតែមានការរីកចម្រើនជាបន្តបន្ទាប់។ អ្វីដែលធ្វើឱ្យប្រជាពលរដ្ឋកាន់តែមានចម្ងល់ គឺនៅពេលមានការងារមួយចំនួនត្រូវអនុវត្តនៅក្នុងមូលដ្ឋាន ពួកគេតែងតែឃើញមានការចុះរៃអង្គាស ឬស្នើសុំការចូលរួមថវិកាពីប្រជាពលរដ្ឋជាបន្ថែម។ ដូច្នេះ ប្រជាពលរដ្ឋស្នើសុំឱ្យអាជ្ញាធរពាក់ព័ន្ធបង្ហាញព័ត៌មានឱ្យបានច្បាស់លាស់ និងតម្លាភាពថា៖ ថវិកាឃុំមួយឆ្នាំៗមានចំនួនប៉ុន្មាន? ចំណាយលើអ្វីខ្លះ? គម្រោងអភិវឌ្ឍន៍មានអ្វីខ្លះ? និងអនុវត្តបានកម្រិតណា? ការបង្ហាញព័ត៌មានទាំងនេះ មិនមែនជាការចោទប្រកាន់អាជ្ញាធរឃុំនោះទេ ប៉ុន្តែជាការឆ្លើយតបចំពោះសំណួរ និងកង្វល់របស់ប្រជាពលរដ្ឋ ដែលចង់ឃើញការប្រើប្រាស់ថវិកាសាធារណៈមានប្រសិទ្ធភាព តម្លាភាព និងផ្តល់ផលប្រយោជន៍ជាក់ស្តែងដល់មូលដ្ឋាន។ តើឃុំរបស់លោកអ្នកមានការអភិវឌ្ឍបានកម្រិតណា? ហើយបញ្ហាដែលប្រជាពលរដ្ឋកំពុងជួបប្រទះ មានការដោះស្រាយបានដល់ណាហើយ? (ពីខ្ញុំប៊ុនធឿនហៅខ្លាពីរ)