柬埔寨卫生部与以色列达成医疗合作 重点引入AI与远程医疗

ជំនួបសម្តែងការគួរសម និងពិភាក្សាការងារជាមួយ លោកជំទាវបណ្ឌិត Alona Fisher-Kamm ឯកអគ្គរដ្ឋទូតអ៊ីស្រាអែលប្រចាំព្រះរាជាណាចក្រកម្ពុជា ដើម្បីពិនិត្យលទ្ធភាពលើកិច្ចសហប្រតិបត្តិការវិស័យសុខាភិបាល។ **________ រាជធានីភ្នំពេញ៖ ព្រឹកថ្ងៃពុធ ទី២៤ ខែមិថុនា ឆ្នាំ២០២៦ **នៅទីស្តីការក្រសួងសុខាភិបាល ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបសម្តែងការគួរសម និងពិភាក្សាការងារជាមួយ លោកជំទាវបណ្ឌិត Alona Fisher-Kamm ឯកអគ្គរដ្ឋទូតអ៊ីស្រាអែលប្រចាំព្រះរាជាណាចក្រកម្ពុជា ដើម្បីពង្រឹង និងពង្រីកកិច្ចសហប្រតិបត្តិការលើវិស័យសុខាភិបាលរវាងប្រទេសទាំងពីរ។ ក្នុងឱកាសនោះ ឯកឧត្តមសាស្រ្តាចារ្យរដ្ឋមន្ត្រី បានសម្តែងការស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះបេសកកម្មការទូតដ៏សកម្មរបស់ភាគីអ៊ីស្រាអែល ក្នុងការជំរុញទំនាក់ទំនងទ្វេភាគី ពិសេសលើវិស័យសុខាភិបាល ដែលជាសសរស្តម្ភដ៏សំខាន់មួយ។ ជាលទ្ធផល ភាគីទាំងពីរបានផ្លាស់ប្តូរមតិ និងឯកភាពលើទិសដៅអាទិភាពសំខាន់ៗ លើការពិនិត្យលទ្ធភាពសហប្រតិបត្តិការដូចខាងក្រោម៖ ១)**ការអភិវឌ្ឍសុខាភិបាលឌីជីថល និងបច្ចេកវិទ្យា៖** ជំរុញការប្រើប្រាស់ទូរវេជ្ជសាស្ត្រ (Telemedicine) បញ្ញាសិប្បនិម្មិតវេជ្ជសាស្ត្រ (Medical AI) និងការធ្វើរោគវិនិច្ឆ័យពីចម្ងាយ ដើម្បីពង្រីកវិសាលភាពសេវាថែទាំសុខភាពឱ្យកាន់តែខិតជិតប្រជាពលរដ្ឋនៅតាមខេត្ត និងតំបន់ជនបទ។ ២)**ការអភិវឌ្ឍធនធានមនុស្ស និងបណ្តុះបណ្តាលជំនាញ៖** ភាគីអ៊ីស្រាអែលនឹងពិនិត្យលទ្ធភាពផ្តល់អាហារូបករណ៍ កម្មវិធីផ្លាស់ប្តូរចំណេះដឹង និងវគ្គបណ្តុះបណ្តាលបច្ចេកទេសដល់គ្រូពេទ្យ គិលានុបដ្ឋាក និងមន្ត្រីគ្រប់គ្រងសុខាភិបាលកម្ពុជា លើផ្នែកវះកាត់ឯកទេស សេវាសង្គ្រោះបន្ទាន់ និងប្រព័ន្ធគ្រប់គ្រងមន្ទីរពេទ្យ។ ៣)**សុខភាពកុមារ និងវេជ្ជសាស្ត្រគ្រោះមហន្តរាយ៖** ផ្តោតលើការពិនិត្យជំងឺអូទីសឹម (Autism) និងការថែទាំកុមារដំណាក់កាលដំបូង ព្រមទាំងការសិក្សាដកស្រង់បទពិសោធន៍ពីអ៊ីស្រាអែលលើផ្នែកវេជ្ជសាស្ត្រគ្រោះមហន្តរាយ ការឆ្លើយតបបន្ទាន់ និងការថែទាំរបួស ដើម្បីពង្រឹងសមត្ថភាពមន្ត្រីជួរមុខ។ ឯកឧត្តមសាស្ត្រាចារ្យរដ្ឋមន្ត្រី បានគូសបញ្ជាក់ថា កិច្ចសហប្រតិបត្តិការទាំងនេះ គឺស្របគ្នាយ៉ាងល្អឥតខ្ចោះជាមួយ**យុទ្ធសាស្ត្រអាទិភាពរបស់ក្រសួងសុខាភិបាល** ក្រោមការដឹកនាំរបស់រាជរដ្ឋាភិបាលកម្ពុជា ក្នុងការឈានទៅសម្រេចបាននូវ**ការគ្របដណ្តប់សុខភាពជាសកល (UHC)** ដោយផ្តោតលើ៖ ការលើកកម្ពស់សុខភាព, ការបង្ការ-គ្រប់គ្រងជំងឺឆ្លងនិងមិនឆ្លង, ការត្រៀមឆ្លើយតបនឹងជំងឺរាតត្បាត, ការពង្រឹងគុណភាពសេវា និងនវានុវត្តន៍ឌីជីថល។ ជាទីបញ្ចប់ ឯកឧត្តមសាស្ត្រាចារ្យរដ្ឋមន្ត្រី បានណែនាំឱ្យក្រុមការងារបច្ចេកទេសរបស់ក្រសួងសុខាភិបាល សហការជិតស្និទ្ធជាមួយស្ថានទូតអ៊ីស្រាអែល ដើម្បីបង្កើតយន្តការទំនាក់ទំនងផ្លូវការ និងបន្តពិនិត្យលទ្ធភាពរួមគ្នាលើការស្រាវជ្រាវវេជ្ជសាស្ត្រ កិច្ចសហការខ្សែសង្វាក់ផ្គត់ផ្គង់ និងការតភ្ជាប់ទំនាក់ទំនងរវាងស្ថាប័នសុខាភិបាលនៃប្រទេសទាំងពីរ ឱ្យលេចចេញជាលទ្ធផលជាក់ស្តែងក្នុងពេលឆាប់ៗខាងមុខ។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter](https://x.com/MohCambodia)) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)