柬埔寨首次参加在白俄罗斯明斯克举办的INNOPROM工业展，

ព្រះរាជាណាចក្រកម្ពុជា ចូលរួមពិព័រណ៍ឧស្សាហកម្មអន្តរជាតិ INNOPROM.Belarus លើកទី២ ឆ្នាំ២០២៦ ... (មីនស្គ៍, បេឡារុស្ស)៖ ព្រះរាជាណាចក្រកម្ពុជា បានចូលរួមជាលើកដំបូងនៅក្នុងពិព័រណ៍ឧស្សាហកម្មអន្តរជាតិ INNOPROM.Belarus លើកទី២ ដែលត្រូវបានរៀបចំឡើងចាប់ពីថ្ងៃទី៣០ ខែកញ្ញា ដល់ថ្ងៃទី២ ខែតុលា ឆ្នាំ២០២៦ នៅទីក្រុងមីនស្គ៍ សាធារណរដ្ឋបេឡារុស្ស។ ក្នុងឱកាសនៃការចូលរួមនេះ ក្រសួងពាណិជ្ជកម្មនៃព្រះរាជាណាចក្រកម្ពុជា បានរៀបចំពន្លាជាតិកម្ពុជា ដែលមានទំហំ ៣៦ម៉ែត្រការ៉េ ក្រោមពាក្យស្លោក «Cambodia – Basket of Wonders» ដោយបានដាក់បង្ហាញនូវផលិតផលកម្ពុជាយ៉ាងសម្បូរបែប ដែលឆ្លុះបញ្ចាំងពីធនធានកសិកម្ម សិប្បកម្មប្រពៃណី និងវិស័យផលិតកម្មដែលកំពុងរីកចម្រើន រួមមាន៖ ផលិតផលម៉ាកសម្គាល់ភូមិសាស្ត្រ (GI) ដូចជា ម្រេចកំពត គ្រាប់ស្វាយចន្ទីកំពង់ធំ ផ្កាអំបិលកំពត-កែប និងស្ករត្នោតកំពង់ស្ពឺ ព្រមទាំងកាហ្វេ ស្វាយសម្ងួត មី គ្រឿងទេស ផលិតផលសិប្បកម្ម ផលិតផលថ្មម៉ាប់ ស្បែកជើង ផលិតផលចម្លាក់ប្រាក់និងស្ពាន់ និងផលិតផលកម្ពុជាផ្សេងៗទៀត ជូនដល់ភ្ញៀវទេសចរ អ្នកបញ្ជាទិញ អ្នកនាំចូល អ្នកចែកចាយ ព្រមទាំងធុរជនបេឡារុស្ស និងអន្តរជាតិ ដែលមកចូលរួមក្នុងពិព័រណ៍នេះ ផងដែរ។ សូមជម្រាបជូនថា ការចូលរួមរបស់កម្ពុជា នៅក្នុងពិព័រណ៍នេះ គឺជាផ្នែកមួយនៃកិច្ចខិតខំប្រឹងប្រែងរបស់ក្រសួងពាណិជ្ជកម្ម ក្នុងការធ្វើពិពិធកម្មទីផ្សារនាំចេញ ពង្រឹងការតភ្ជាប់ពាណិជ្ជកម្មអន្តរជាតិ ផ្សព្វផ្សាយផលិតផល និងម៉ាកយីហោកម្ពុជា ព្រមទាំងសម្រួលដល់ការភ្ជាប់ទំនាក់ទំនងពាណិជ្ជកម្មរវាងសហគ្រាសកម្ពុជា និងដៃគូអន្តរជាតិ។ ជាមួយគ្នានេះ ពិព័រណ៍នេះបានផ្តល់វេទិកាសម្រាប់ធុរជនកម្ពុជា ក្នុងការស្វែងរកឱកាសពង្រីកវត្តមានរបស់ខ្លួននៅប្រទេសបេឡារុស្ស និងទីផ្សារសហភាពសេដ្ឋកិច្ចអឺរ៉ាស៊ី (EAEU) ឱ្យកាន់តែទូលំទូលាយ ខណៈពេលដែលកំពុងស្វែងរកដៃគូដែលមានសក្តានុពលក្នុងវិស័យនានា រួមមាន ពាណិជ្ជកម្ម ការចែកចាយ ការវិនិយោគ ការផលិត និងកិច្ចសហប្រតិបត្តិការខ្សែច្រវាក់ផ្គត់ផ្គង់៕ … ភ្ជាប់មកកាន់ក្រសួងពាណិជ្ជកម្ម តាមតំណភ្ជាប់ខាងក្រោម៖ Connect with Ministry Of Commerce: 🌐 [Facebook ](https://web.facebook.com/moc.gov.kh) 🌐 [Telegram](https://t.me/mocnewsfeed) 🌐 [Website](https://www.moc.gov.kh/) 🌐 [YouTube](https://www.youtube.com/@mocgovkhcambodia) 🌐 [X (Twitter](https://twitter.com/MoCCambodia))